O Leo o Le Au Paia o Aso e Gata Ai
O Ai Ua Saunia i le Taimi Nei?
Ata na tusia e Richard Mia
I se tasi o aso Sa na sosoo ai ma le sauniga mulimuli o le konafesi aoao, sa ou lagona se musumusuga faapitoa e saini e alu i totonu o lau faitotoa o le FamilySearch ma faia ni talafaasolopito o aiga. Sa ou musu e galue i lau talafaasolopito o aiga aua ou te lei manuia lava i isi o au taumafaiga muamua. Ua uma ona faia e lou aiga le tele o galuega o le talafaasolopito o aiga, ma sa ou maua se manatu i lou mafaufau sa leai se mea o totoe e fai.
Sa ou saofai ma manava loloto e faailoa ai lou le mautonu a o ou tilotilo atu i le iuga sa ou taumafai e galue i ai mo le tele o tausaga, ma le faamoemoe o le aso mulimuli lea o le a ou maua ai ni faamatalaga. Sa amata lau suesuega masani e ala i faamaumauga o faamatalaga, faaipoipoga, ma aso fanau, ma i le maea ai o le itula sa ou le mauaina se mea. Ma ona musuia lea o au e le Agaga i le faaiuga atoa o le vaiaso i sauniga o le konafesi, sa musuia au e tatalo ma saili le tagata sa saunia mo o latou galuega ina ia faia i le taimi nei.
Ina ua uma lau tatalo, sa ou toe foi i lou lava igoa ma alu i luma e ala i le laina. Sa manino lou lagonaina o le taialaina o au e le Agaga mai le laina e tasi i le isi laina seia oo ina ou iu i le itu o le aiga a lou tamamatua. I le isi itula, sa faatumulia le potu i le Agaga, ma sa ou alu ese mai ma igoa e lima e ave i le malumalu. A o ou faamaeaina le talosagaina o igoa mo le malumalu, sa ou autilo ifo i lalo i nisi o faamaumauga sa ou mauaina ni faamatalaga. Sa faatumulia ou mata i loimata ma sa ou lagona se fiafia faalolotoina—sa oo mai le faamatalaga mai le au faavasega igoa o e sa volenitia o latou taimi e ta i totonu faamaumauga mo ou tuaa. I le faafetai ai, sa ou faavasegaina igoa mo isi tagata mo le isi itula.
Sa tupu lou molimau ma sa ou faafetai mo na mafuaaga e lua. O le mafuaaga muamua, i le taimi o le konafesi aoao, sa taitai au e le Agaga e faia galuega o talafaasolopito o aiga ma ia iloa igoa e sailia. Lona lua, o tagata o le Ekalesia i le lalolagi atoa o e sa faavasegaina igoa ina ia mafai ai e tagata e pei o au ona maua vave ma manino ia tuaa ma vave ona fai a latou galuega o le malumalu. Sa avea o se molimau mamana ma manino ia te au le salalau atu o le galuega a le Atua i luga o le lalolagi atoa.