Iakopo 1:5–6

Na aoao mai i tatou e Iakopo i le ala e tatalo atu ai i le Atua ina ia mafai ona tatou maua se tali.

5 Ae a fai ua leai se poto i so outou ina ole atu ia i le Atua, o Le foai tele mai i tagata uma ma le le toe tautaua; ona foaiina mai ai lea ia te ia.

6 A ia ole atu ma le faatuatua, aua lava nei masalosalo. Aua o lē masalosalo e tusa ia ma le peau o le sami ua sousou i le matagi ma felafolafoaiina ai.

Ole Atu i le Faatuatua

“O le tulaga manaomia e ole atu ai ma le faatuatua [o fautua mai ai] e le gata ina taua le faailoa atu ae ia faia, o le matafaioi valalua e ole atu ma ia faatino, o le tulaga manaomia o le talanoa atu ma ia faia.”

Elder David A. Bednar o le Korama a Aposetolo e Toasefululua, “Ole Atu ma le Faatuatua,” Liahona, Me 2008, 94.

Leai se Poto

I nisi tulaga po o le isi, tatou te le maua uma lava le ituaiga poto lea ua na o le Atua e mafai ona tuuina mai ia i tatou. “E le iloa e se tasi mea a le Atua, ua na o le Agaga o le Atua” (1 Korinito 2:11). O le a mea lena e tatau ai ona tatou ole atu ia te Ia.

Ole Atu i le Atua

“E auina atu talalo i lo tatou Tama Faalelagi i le suafa o Iesu Keriso. …

“O le faamoemoega o le tatalo, e le ina ia suia ai le finagalo o le Atua, ae ia faamautu ai mo i tatou lava ma isi ia faamanuiaga ua naunau le Atua e to mai, ae e tatau ona tatou ole atu ina ia mauaina.”

Taiala i Tusitusiga Paia, “Tatalo,” scriptures.lds.org.

Foai i Tagata Uma

“E le teena e ia se tasi e sau ia te ia, … ma ua tutusa tagata uma i le Atua.”

2 Nifae 26:33

Tele

Liberally—O le upu eleni e faaliliu mai ai le upu lenei o lona uiga o le “faigofie,” atonu e faatatau i le mafaufau tasi i le faamoemoega a le Atua ina ia tuuina mai ia i tatou ma le faamaoni ma le limafoai.

Le Toe Tautaua

O le a tali mai le Atua ia te oe ma na te le toe tautaua lava (faitio, otegia, pe tuuaia) oe mo le ole atu ia te Ia ma le faamaulalo mo se tali i se fesili taua.

Aua Lava Nei Masalosalo

“A oo mai taimi o le le mautinoa, ia avea au feagaiga ma mea e sili ona taua ma ia tonu foi ma atoatoa lou usiusitai. Ona mafai lea ona e ole atu i le faatuatua, aua lava nei masalosalo, e tusa ai ma mea e te manaomia, ona tali mai lea o le Atua.”

Elder D. Todd Christofferson o le Korama a Aposetolo e Toasefululua, “O Le Mana o Feagaiga,” Liahona, Me 2009, 22.