Aisea e Faaipoipo ai i le Malumalu?
Tatou te talanoa soo e uiga i le faaipoipoga faalemalumalu i le Ekalesia. Pe ua e mafaufau ea pe aisea?
O loo i ai le tele o se talanoa talu ai nei e uiga i le faaipoipoga—o le a lona uiga, aisea tatou te faia ai, le matafaioi na te faia i le sosaiete. I le lotu tatou te talanoa soo e uiga i le faaipoipoga faalemalumalu. E te iloaina e taua ona ua e faalogo i ai i lenei mea talu ona aoaoina oe i lau lesona muamua e uiga i le talalelei, pe o oe o se Aveolela po o se tagata liliu mai i lou talavou.
Ae o nisi o outou atonu o loo outou tau mafaufau, “Pe Aisea?” Ia te outou atonu e sili atu nai lo na o se fesili po o le a le uiga atoa o le faaipoipoga faalemalumalu. E te fia iloaina—i lou loto, e le na o lou mafaufau—pe aisea e tatau ai ona e soona galue malosi ina ia e faaipoipo i le malumalu, aemaise lava i se taimi ua avea ai le faaipoipoga ma se manatu po o se faatulagaga ua foliga mai ua faavaivaia i malo i le lalolagi atoa.
Ia, e amata i le aoaoga faavae o le aiga.
O Le Aoaoga Faavae o le Aiga
Tatou te faaaogaina le upu aoaoga faavae e fesoasoani ai e faamatalaina le tele o mea i le Ekalesia. Mo se faataitaiga, o le Taiala i Tusitusiga Paia ua faamatalaina le mataupu a Keriso o “mataupu faavae ma aoaoga o le talalelei a Iesu Keriso.”1 O le a la le uiga ia i tatou pe a tatou talanoa e uiga i le aoaoga faavae o le aiga po o le aoaoga faavae o le faaipoipoga e faavavau?
“O Le Aiga: O Se Folafolaga i le Lalolagi” o loo ta’ua ai, “O le faaipoipoga i le va o se alii ma se tamaitai ua faauuina e le Atua ma o le aiga o le totonugalemu lea o le fuafuaga a Lē Foafoa mo le taunuuga e faavavau o Lana fanau.”2 I se isi faaupuga, pe a tatou talanoa pe aisea ua tatou i ai iinei i le lalolagi ma po o le a le mea e ao ona tatou faataunuuina ma avea ai i tatou, o loo noatia uma lava ia mea i le manatu o i tatou o le vaega o se aiga ma e mafai ona faaipoipo ma faavae ni aiga fou.
O loo taua foi i le folafolaga i le aiga e faapea: “O le fuafuaga paia o le fiafia ua mafai ai ona faaauau fegalegaleaiga faaleaiga i tala atu o le tuugamau. Ua mafai i sauniga paia ma feagaiga ua maua i malumalu paia ona toe foi atu ai tagata taitoatasi i le afioaga o le Atua ma toe faatasia ai aiga e faavavau.3
Ae o le a le mea e tupu i o tatou aiga pe a tatou feoti? Afai o loo e faaipoipo i le tulafono a le tou setete po o le atunuu, pe o le a i ai ea i lena tulafono se pule ia te oe pe a e oti? E leai, aua o na tulafono ua faia e tagata ma e na o le pau le taimi e i ai le pule, o le umi e te ola ai i lalo o lena pule. Ina ia faaauau mafutaga o faaipoipoga pe a e oti, e tatau ona faamauina faatasi na faaipoipoga i le nofoaga sao o i ai le pule lea e tumau i le faavavau atoa. O lena nofoaga o le malumalu, ma o lena pule o le perisitua lea (tagai MF&F 132:7, 15–19). E ala i le filifilia o se faaipoipoga faalemalumalu ma le tausia o na feagaiga, ua e filifili ai ia mafai ona ola e faavavau faatasi ma lou toalua.
O Le Mafuaaga Tatou te Popole ai
Atonu ua e iloaina lava lena aoaoga faavae, ae o loo e tuufesili pea, “Ae aisea ea e ala ai ona taua tele?” Atonu e le o se mataupu o le malamalama i le aoaoga faavae. Atonu e sili atu i lo se fesili faigofie e faatatau i le uiga o le faaipoipoga ma le aiga i lou loto. O le tali faigofie lava e faapea, o le fiafiaga ma le olioli aupito sili ua avanoa mai ia i tatou e oo mai e ala i le ola ai i le talalelei ma le mauaina ma le faatumauina o se faaipoipoga faalemalumalu.
I le konafesi aoao o Aperila 2013, sa faamalamalama mai ai e Elder L. Whitney Clayton o le Au Peresitene o Fitugafulu i le ala lenei: “E leai lava se isi sootaga o soo se ituaiga e mafai ona maua ai le fiafiaga tele, e fua mai ai mea lelei e tele, pe aumaia ai le faaleleia tele faaletagata.”4
Ua tatou iloa foi e faapea o le “fiafia i le olaga faaleaiga e mautinoa lava e ausiaina pe a faavae i luga o aoaoga a le Alii o Iesu Keriso.”5
A e mafaufau i ai, o le a e faaaluina se vaega tele o lou olaga e saunia ai mo suiga tetele e oo mai i le ala. O loo i ai le papatisoga, faauuina mai le Peraimeri ma agai atu i Alii Talavou po o Tamaitai Talavou, auai i le malumalu, ma le auai i sailiga o talafaasolopito o aiga ma sauniga o le malumalu mo ou tuaa. Mo alii talavou, o loo i ai le mauaina o le perisitua ma le siitia i tofi o le perisitua. Mo tamaitai talavou, o loo i ai le siitia atu i vasega a Tamaitai Talavou. O loo i ai le faauuga i le aoga maualuga po o se faauuga talitutusa. Ma le auala ua mafai ona faamisiona ai i le 18 po o le 19 tausaga. O loo tele mea e saunia ai ma tulimatai atu i ai.
Ae o le feagaiga aupito sili ona taua tatou te saunia ai o le faamauina lea i le malumalu. Pe a ola ma soifua tagata taitoatasi o aiga e tusa ma le fuafuaga o le fiafia ma tausia a latou feagaiga o le malumalu, latou te lagonaina le olioli moni.
O le talalelei o le ute atoa lava lea o le olaga. O le mafuaaga atoa lea ua tatou i ai iinei. A tatou mulimuli i le ala o le talalelei, o le a tau atu i le olioli. Ma o lena ala e tau atu i se faaipoipoga faalemalumalu, a le o le olaga nei po o le olaga a sau. E leai ni faamanuiaga o le a taofia mai fanau faamaoni a le Tama.
Sa fautua mai Elder Bruce R. McConkie (1915–85) o le Korama a Aposetolo e Toasefululua e faapea, “O le mea aupito sili ona taua e tasi e faia e soo se tagata o le Au Paia o Aso e Gata Ai i lenei lalolagi o le faaipoipo lea i le tagata sao, i le nofoaga sao, e ala i le pule sao.”6
Lesona i Aso Sa
O Le Autu o le Masina Lenei:Faaipoipoga ma le Aiga