Suesueina o Tusitusiga Paia mo le Malosi o le Aiga
Fausia se faavae malosi mo oe ma lou aiga e ala i le suesueina tumau atili ma le anoa o tusitusiga paia.
O manatu nei e mafai ona fesoasoani ia te oe ma lou aiga e selesele ai i taui o le faaleleia o le suesueina o tusitusiga paia. O nei faataitaiga ua na o ni fautuaga ma e mafai ona fetuunai i o outou lava manaoga taitoatasi ma manaoga faaleaiga.
Suesue ma se Fesili
O le o mai i tusitusiga paia e saili ai ni tali o se ala lelei lea e faaleleia ai au suesuega o tusitusiga paia. E mafai ona e aumai au suesuega i se tatalo, ma ole atu ia maua ni tali i au fesili patino. A o e faitau, ia faailoga ni mau ua taliina au fesili. Ia tusi ni faamatalaga i laina o au tusitusiga paia pe tusi i totonu o se isi api.
Pe a suesue o se aiga, e mafai ona e amata ia suesuega taitasi o tusitusiga paia i le fai atu lea i lau fanau pe o i ai ni a latou fesili o loo latou taumafai e tali. A o outou faitau, tagai mo ni mau ua taliina ai nei fesili, ona taofi lea ma talanoaina.
Suesue e ala i Autu
Filifili se autu e te fia aoao atili i ai, e pei o le tatalo, ma faitau le faamatalaga o loo i le Bible Dictionary po o le Taiala i Tusitusiga Paia. Ona faitau lea o mau ua lisiina i lalo o lena mataupu i le Taiala i Tusitusiga Paia, Faasinoupu, po o le Taiala Autu. I totonu o le lisi o mau, faailoga ia fuaiupu e aupito sili ona aoga. A uma ona faailoga au mau e sili ona e fiafia i ai e uiga i le tatalo, o le a i ai sau maufaasino patino e uiga i le autu. E mafai ona e makaina i se lanu faapitoa ia mau uma e te mauaina e uiga i se autu patino. Filifili se isi aoaoga faavae e te suesue i ai pe a maea ma faaaoga se lanu fou e maka ai fuaiupu.
Pe a suesue o se aiga, filifili faatasi se autu ma atofa atu i tamaiti taitasi e faitau le leoa ni nai fuaiupu ona faasoa mai lea o sana mau e fiafia i ai. Atonu e alu ai ni nai aso e faamaea ai se autu, o lea ia tuliloa ai mea tou te aoaoina e ala i le talanoaina ma tusi i lalo ni faamatalaga i le faaiuga o vaega suesue taitasi.
Suesue mo le Taitaiga
Sa faamatala mai i se tasi taimi e Peresitene Henry B. Eyring, Fesoasoani Muamua i le Au Peresitene Sili, le auala na ia faaaogaina ai suesuega o tusitusiga paia e saili ai le taitaiga faapitoa mo lona olaga ma le valaauga. A uma ona ia tatalo atu i le Tama Faalelagi e uiga i mea e fai, ona tusi lea i lalo e Peresitene Eyring se lisi o tali, e eseese lanu o aitema taitasi i luga o le lisi, ma faapipii se kopi i se seti taugofie o tusitusiga paia. Sa ia faamatala mai, “O le [tali muamua i luga o le lisi] o le ‘E ao ona avea au ma se molimau o Keriso o le Alo o le Atua.’ Ona ou faitauina lea o au tusitusiga paia e saili ai mo ni manatu e aoaoina ai au pe faapefea ona molimau atu o Keriso o le Alo o le Atua. Soo se taimi lava ou te tau ai i se mea, ou te makaina lava i le lanumoana. E lei pine ae ou atiaeina lau lava taiala autu i mea na ou mafaufau na finagalo ai le Alii ia te au e fai.”1
Pe a suesue o se aiga, filifili ni vaega tou te fia mananao e galulue faatasi ai. Tusi i lalo nei popolega ma tuu i latou i se mea e iloa ai. A o outou faitau, valaaulia tamaiti taitasi e tagai ma faailoga ni mau e faatatau i se popolega patino.
Afai e na o le faitauina o ni nai fuaiupu i se aso e faigata ma foliga mai ua le mafai ona fai ni suesuega loloto atu pe ua tau foi na o le faanonofo faatasi i lalo o lou aiga o se mea faigata, aua le faanoanoa ma aua le fiu. Na fautua mai Elder David A. Bednar o le Korama a Aposetolo e Toasefululua e faapea e ui e leai se vaega se tasi o suesuega o tusitusiga paia faaleaiga e foliga mai e manatuaina faapitoa pe faamanuiaina foi, ae o lo “tatou faia pea e le aunoa o nai mea iti faigofie, e mafai ona tulai mai ai taunuuga faaleagaga maoae.”2
A o tatou saili atu e faitau atili ia tusitusiga paia e le aunoa ma faaleleia lo tatou faitauina o tusitusiga paia i se suesuega anoa, o le a faamanuiaina a tatou taumafaiga e le Alii. O le a Ia taialaina i tatou a o tatou faatulagaina a tatou suesuega o tusitusiga paia ma o le a faia ia tauia atili mo i tatou ma mo o tatou aiga.
Alofa i le aiga
Faamagaloga
Molimau
Tatalo patino
Auaunaga
Aokuso