O Fesili Maoae, O Talanoaga Maoae
E nofo le tusitala i Iuta, ISA
E tele atu mea e faatupuina ai talanoaga i le potuaoga nai lo le fai atu o ni fesili. E manaomia ona tatou fai atua le ituaiga sao o fesili.
E fesili se faiaoga o le Aoga Sa, “O ai tagata muamua lava e toalua na i luga o le lalolagi?” Ua ia tepa atu ma le faamoemoe i lana vasega o talavou, ae leai ma se lima e sii i luga. Ua autilo tagata o le vasega i lalo i o latou vae pe na ona su’e a latou tusitusiga paia e aunoa ma se mafaufau i ai. “O se fesili faigofie,” ua fai atu ai le faiaoga. “E leai se tasi e iloaina le tali?”
I le potu e sosoo ai, i le vasega o Aoaoga Faavae o le Talalelei, ua fesili ai le faiaoga, “O le a le mataupu faavae aupito sili ona taua o le talalelei?”
Ua sii ma le popole e se taufafine lona lima. “Faatuatua?” Ua ia fesili atu ai.
“O se tali lelei tele lena,” ua tali atu ai le faiaoga, “ae e le o le tali tonu lea o loo ou sailia. E i ai se isi?”
Filemu.
E mafai ona fai e faiaoga ni fesili ona latou te mananao e faaaofia tagata o le vasega i a latou lesona. Latou te malamalama o tamaiti aoga e aofia ai i talatalanoaga, e tele atu mea latou te aoaoina nai lo i latou e na ona nofonofo ma faalogologo. Ae o fesili e pei o fesili ia e i luga e masani lava ona le aoga.
“O ai tagata muamua lava e toalua na i luga o le lalolagi?” o se fesili lē aoga ona ua iloa lelei lava le tali lea ua leai ai se tasi e fia tali atu—pe vaaia se manaomia e tali atu.
“O le a le mataupu faavae aupito sili ona taua i le talalelei?” o se fesili foi e le aoga. E leai ma se tasi e iloaina le tali o loo saili e le faiaoga vagana ai lava le faiaoga, lea o loo fai atu moni lava, “Mate mai le mea lea ou te mafaufau i ai.”
O fesili nei o mea moni; e tofu ma se tali patino. Ae o talanoaga maoae i le potuaoga e sau mai se ituaiga o fesili—e ese lava, mai fesili e aunoa ma se tali patino. O le ki lena.
Fai atu Fesili e Tatala ai Talanoaga
Afai o oe o se faiaoga o se vasega a le au matutua, e mafai ona e fesili atu, “O le a se mataupu faavae o le talalelei ua sili ona taua i lou olaga, ma aisea?” Atonu o le a taofi tagata o le vasega ma mafaufau e uiga i o latou aafiaga—ma e lelei lena. Afai e te malolo ma faatalitali mo ni nai sekone, o le a amata ona tasii i luga lima, ma o le a e faalogo atu i ni aafiaga moni mai le loto o loo i ai i tagata e uiga i le talalelei. O le a e matauina foi o ni manatu faaalia o se tasi tagata o le a faaosofia ai manatu faaalia mai isi tagata. E le pine, ae o le a maua e le vasega se talanoaga fiafia ma musuia!
Afai e te manao ia maua e le vasega se talanoaga e uiga i se mea patino e pei o le faatuatua, mafaufau e fai atu se mea faapenei: “O nei o le a tatou talanoa ai e uiga i le faatuatua, o le uluai mataupu faavae o le talalelei.” Ona fai atu lea o se fesili e uiga i le faatuatua lea e le o i ai sona tali patino:
-
“O le a se vaega o fai e le faatuatua i lou olaga?”
-
“Aisea e te manatu ai e finagalo le Alii ia tatou maua le faatuatua?”
-
“O a nisi o auala e mafai ona tatou faateleina ai lo tatou faatuatua?”
O le a e mauaina le tele o tali, ma a o e mauaina tali, atonu e te manao e tusi (i se tulaga faapuupuu) i luga o le laupapa. A uma ona e faia, o le a e mauaina se lisi matagofie e mafai ona e faaaogaina e fesoasoani ai e aotele la outou talanoaga.
O loo i ai se tulaga manuia faaopoopo i le fai atu o fesili e tatala ai talanoaga: E oo lava foi i tagata o le vasega e le o saofaga atu i le talanoaga o le a mafaufau e uiga i fesili. O lo latou malamalamaaga ma molimau e mafai ona tuputupu ae e ui latou te le i fai maia se tala.
Talanoaina o Tusitusiga Paia
E mafai ona aoga ia fesili e tatala ai talanoaga i le taimi o talanoaga o tusitusiga paia. E toatele faiaoga e manatu e faapea o le valaau atu i tagata o le vasega e faitau se fuaitau o mau o se ala lelei lea e faaaofia ai i latou. Ae paga lea, atonu e leai. O nisi tagata e le lelei le faitau ma e mafai ona tau memumemu i upu. O isi tagata o le vasega atonu e faigata ona tau faalogo atu i le tagata o loo faitau.
O le tagata aupito sili ona faigofie ona faalogo i totonu o se potuaoga o le faiaoga, lea o loo tu i le pito i luma o le vasega. Ma le isi, e mafai ona taofi i le ogatotonu o se fuaitau e fesili atu i se fesili ma faaosofia le talanoaga. A o e faitauina le faataitaiga lenei, tagai pe mafai ona e mataua le mea e fai e le faiaoga e uunaia ai le talanoaga:
Faiaoga: “O le asō o le a tatou talanoaina ai se tala ua lauiloa, le faataoto i le atalii faamaumau oa. Ae ou te manao ina ia tatou mafaufau e le gata i le atalii faamaumau oa ae faapena foi i isi tagata o lona aiga. Faamolemole susue a outou Tusi Paia i le Luka 15:11, i le itulau e 1305.” (O le tuuina atu o le numera o le itulau e fesoasoani lea i tamaiti atonu e le o masani i tusitusiga paia.)
A uma ona faatali mo tagata o le vasega sei maua a latou mau, ona amata faitau lea o le faiaoga: “‘O le tasi tagata e toalua ona atalii:
Ua fai atu le uii i lona tama, Sena e, ia e au mai ia te au lo’u tofi o le oa. Ona vaelua lea e ia o ana mea ia te i laua.’ Ia, o a nisi o mea ua mafai nei ona tatou iloaina e uiga i lenei aiga?” (Matau le fesili e tatala ai le talanoaga.)
Tamaitiiti aoga: “E foliga mai ua loto le tama e tuu atu i le uii mea ua ia manao ai.”
Faiaoga: “Ua ia loto i ai, a ea? E masani lava e le maua e se atalii lona tofi sei iloga e maliu lona tama. Ae e foliga mai o le tama o se tagata agaalofa ma agalelei. O le a ma se isi mea?”
Tamaitiiti aoga: “E foliga mai ia te au e manatu faapito le uii. E matua tele naua le mea ua ia talosagaina mai i se tama o loo soifua pea.”
Faiaoga: “Ioe, e sa’o. E foliga mai e na o ia lava o loo mafaufau i ai. Ae a le atalii matua?”
Tamaitiiti aoga: “E matua le magagana lava.” Ua toē le vasega.
Faiaoga: “Ioe, ma e mafai ona faamatalaina ai se mea e faatatau i ona uiga. Tatou vaavaai mo lena mea a o faaauau pea ona tatou faitau.”
A o outou faitauina lena faataitaiga, o le a se mea na e matauina sa faia e le faiaoga e uunaia ai le talanoaga? E mafai ona e faia se lisi—o le a avea ma a outou lisi ma faauigaga o lea tulaga, o lona uiga la o le a sao uma a outou tali. Aisea? Talu ai ona o le fesili muamua i le parakalafa lenei o se fesili e tatala ai talanoaga, ma afai lava e te taliina sea fesili ma le faamaoni, o le a e le tuu maia lava se tali sese. Afai e te fai atua ni fesili tali tutusa faapea i se potuaoga, o le a faapena foi ona moni mo tagata o le vasega, o lona uiga la o le a le pine foi ae latou iloa o le a talia lelei o latou manatu faaalia ma e saogalemu mo i latou ona tali mai.
Ma le isi, atonu sa e matauina na ou faia se mea e faatinoū ai lou mafaufau ae lei amata ona e faitau. Sa ou tusia, “A o e faitau, tagai pe mafai ona e iloaina le mea e faia e le faiaoga e uunaia ai le talanoaga.” Sa ou faia lenei mea ona sa ou iloaina o le a fesoasoani ia te oe e mafaufau ai e uiga i mea sa e faitauina ma saunia ai e auai i lenei “talanoaga” pe a uma.
Sa faalua ona faaaoga e le faiaoga lenei metotia i le faataitaiga: sa ia fai mai i le tasi taimi, “Ou te manao ia tatou mafaufau e le gata i le atalii faamaumau oa ae faapena foi i isi tagata o lona aiga,” ma na ia fai mai i le isi taimi, “Tatou vaavaai mo lena mea a o faaauau pea ona tatou faitau.” Ua tuu atu e nei fautuaga uma e lua i tagata o le vasega se mea e taulai atu i ai ina ia mafai ai ona latou saunia e tali atu i fesili e tatala ai talanoaga pe a fesili atu le faiaoga.
O le faia o lenei mea e fesoasoani lea i tagata o le vasega e faia ai se fesootaiga ma le fuaitau o loo faitauina. Nai lo le nofonofo faasamasamanoa i o latou nofoa, ae o la latou te faitau faatasi ma mafaufau tonu lava e uiga i mau. Ma pe a maea le faitauga, ua latou saunia e tali atu i fesili. Ona e manaomia lea o le tau na ona e valaau atu ia i latou ma faamaopoopo le talanoaga.
Ia matau foi i lenei ituaiga o talanoaga o loo e aoao moni atu lava mai tusitusiga paia, e le na o le tusi lesona. E ui lava e tatau ona faaaogaina le tusi lesona e saunia ai le lesona ma o se punavai sili o fesili e tatala ai talanoaga, ae e tatau ona avea tusitusiga paia ma taulaiga autu o lo tatou aoao atu ma le aoao mai.
Faatumauina le Taulai Atu
O loo i ai se luitau i le faia o le tele o talanoaga i potuaoga: e faigofie lava ona see ese ia talanoaga. E taua le saunia lelei o lau lesona ina ia mafai ona e iloa le mea e te fia manao e agai i ai ma ia e saunia ai, pe a talafeagai ai, ia toe faafoi mai le vasega i le autu moni o le talanoaga. E masani lava e na o le pau le mea e manaomia ona e saunia o sina taiala itiiti: “E mata’ina lena mea, ae ou te manatu ua fai si o tatou see ese ma le mataupu. Tatou toe foi atu nei i le tatou talanoaga o le faatuatua.”
E fesoasoani foi pe afai e te mauaina se folasaga manino ma le mata’ina ina ia iloa e tagata o le vasega le taulaiga o lau lesona. Ona faia lea o se talanoaga, e taialaina ai mea o talanoaina.
Ma le mea mulimuli, tuu atu se aotelega musuia o mea sa aoaoina. O upu o se viiga po o se solo e mafai ona maua ai se aotelega lelei. Na saunoa Peresitene Boyd K. Packer, Peresitene o le Korama a Aposetolo e Toasefululua, “Ta’u atu i le au faalogologo ia mea o le a e faamatalaina atu, ona ta’u atu lea i ai mea sa e tauina atu. O se auala aoga lava lena.”1
Ia mautinoa e faasoa atu lau molimau e uiga i upumoni o loo talanoaina.
Fefaasoaai o Lagona ma Aafiaga
Peitai, e tele atu mea o i ai i nei mea uma, nai lo le na ona maua o se talanoaga sili. Pe a talafeagai ai, o le a musuia e le Agaga ia tagata o le vasega i o latou manatu faaalia ina ia mafai ona latou faasoa mai mea ua finagalo le Alii e faalogo i ai le vasega. E pei ona fetalai atu le Alii i Ona soo, “Aua o le mea ua faapotopoto ai se toalua, po o se toatolu i lo’u igoa, ou te i ai faatasi ma i latou” (Mataio 18:20).
Ioe, e manaomia ona tatou faaeteete i le faasoa atu o aafiaga loloto patino pe paia foi. Ae o tala mai tagata o le vasega e mafai ona faaopoopo atu le tele o mea i soo se lesona. E pei ona fautua mai tusi lesona o Aoaoga Faavae o le Talalelei e faapea: “Faasoa atu malamalamaaga, lagona, ma aafiaga e fesootai ma le lesona. Valaaulia tagata o le vasega e fai lea lava mea e tasi.”2
E tele naua atu mea i talanoaga i potuaoga nai lo le faaosofia o tagata e fai ni manatu faaalia. I le faaiuga, o se mataupu faaleagaga maualuga lea e mafai ona aumaia le vasega ia latalata atili i le Atua.
A e faaaogaina nei metotia, o le a e vaaia le tuputupu ae i le faaleagaga ma le malamalama i le talalelei, e aofia ai ma oe lava ia. I lo le tau mafaufau pe faapefea ona faatumuina le taimi o lau vasega, o le a amata ona le lava sou taimi. O le a mafai foi ona e vaaia le faatoateleina o lau vasega ona o le a iloa e tagata o le vasega o le a avea i latou ma se vaega o se talanoaga maoae—aoaoina mai tusitusiga paia, mai le tasi ma le isi, ma mai le Agaga o le Alii.