Sa Ou Ala A’e i le Talalelei

Taofia le igoa, Farani

Sa tausia au e ni matua e le talitonu i le Atua ma a o avea o se alii talavou sa ou lagonaina le sologa lelei o lou olaga e aunoa ma le Atua. Peitai, sa suia lena mea i le 1989, ina ua ava lo’u alāmeaai, ma ou taoto ai ua le iloa se mea mo le valu aso.

E i ai ni nai mea ou te manatuaina mai le taimi na ou i ai i le falemai, ae e malosi lo’u manatua o lo’u vaaia o se tamaloa e laei papae na tu i ou talaane ina ua maea lo’u taotoga ma ta’u mai ia te au ua oo i le taimi e “toefoi ai ma ia ou ala i luga.” Ina ua ou musu, sa ia faaopoopo mai, “Uso, ua e oti. O lou toe foi, po o lou nofo iinei.” Sa ou faia e pei ona ia fai mai ai ma ala ae ai i le luluti o tiga.

Ina ua ou tuua le falemai, sa ou faia ni miti uiga ese lea sa i ai ni tagata ou te lei feiloai lava i ai. Sa ou maua le lagona e faapea ua folafola mai ia te au e fai se mea, ae sa ou le iloa po o le a. Sa ou saili ma faitau e uiga i tapuaiga eseese. A o ou faitaua le Feagaiga Fou, sa ou iloaina e faapea afai o loo i ai le upumoni i le lalolagi, o le a maua la ia Iesu Keriso.

Sa ou saili mai le 1989 i le 1994. Sa ou le mautonu ma fenumiai a o ou sailia tagata ia sa ou vaai pea i ai i au miti. Sa oo ina faateleina le faigata ma lou le mautonu, ma oo ai ina ou tatalo lava au ia ma le naunautai mo ni tali.

E lei pine ona maea nei tatalo, ae ou feiloai i se tagata fou na ma faigaluega faatasi. Sa ia iloaina o loo ou tauivi ma ni faigata, ma sa ou tau atu ia te ia o loo ou saili mo le upumoni. Sa ia aumai ia te au se Tusi a Mamona, lea sa matuai ou musu e talia. Ae sa ia faatauanauina au e ave, ma e tasi lava le po na ou faitauina atoa ai. Sa vave ona ou iloaina o lea ua ou mauaina le mea sa ou sailia.

Ina ua matou feiloai ma faifeautalai, sa ou maofa i le vaaia o se tasi o i laua lea sa ou vaai ai i au miti. Sa vave ona ou talosagaina ina ia papatisoina au, ae sa ao ona ou aoao muamua i lesona uma.

A o ou suesueina le talalelei ma auai i le lotu, sa ou maua ai tagata uma ia mai i au miti. Sa ou iloa o le talalelei o le mea lea sa ou manaomia ona maua. O le aso o lou papatisoga o se tasi lea o aso aupito sili ona fiafia o lou olaga. Ono masina mulimuli ane, sa valaauina ai au o le peresitene o le paranesi. O lenei, ua toeitiiti 20 tausaga mulimuli ane, o loo ou auauna atu pea ma le fiafia i le Ekalesia. Faatasi ai ma lou aiga, o le talalelei o sa’u meatotino aupito sili lea ona taua.