O Au o se Kerisiano

Kathy Fjelstul Craig, Arizona, ISA

O au o se faiaoga o le vasega lua i se nuu ua lauiloa ai le Au Paia o Aso e Gata Ai. O lea sa faateia ai au i se tasi aso ina ua tau mai e se uo ia te au se tala a se isi faiaoga e uiga ia te au. Sa fai mai le faiaoga, “E te iloaina o Mrs. Craig e le o se Kerisiano?”

Sa mafatia lou loto. O lea e lei leva ona oti atu lou toalua sa ma mafuta mo le 28 tausaga, ma sa ou matua latalata lava i le Faaola ma lou Tama Faalelagi nai lo se isi lava taimi i lou olaga. Sa ou iloa e ao ona tuu atu lau molimau i lenei faiaoga, ae sa ou le mautinoa pe faapefea ona fai. Sa ou le manao e faatiga ia te ia, ae sa ou manao foi ia ona silafia o le Au Paia o Aso e Gata Ai o ni Kerisiano.

I le taeao na sosoo ai sa musumusu mai le Agaga Paia ia te au i le mea e tatau ona ou tau atu. A o ou taotooto ai i le moega, sa ou mafaufau i atavali uma sa i ai i lou fale e uiga i le soifuaga o Iesu Keriso. E tofu lava ia atavali taitasi ma se nofoaga faapitoa i lou loto ma sa fesootai i se taimi faapitoa i lou olaga. O le mafaufau ai i na atavali sa aumaia ai le tele o lagona agamalu e uiga i lou alofa mo le Faaola.

O se tasi o atavali patino o loo faaalia ai le faatoafilemuina e le Faaola o le sami sousou. O loo faamanatu mai ai ia te au e Na te faatoilaloina mea uma ma e auala mai ia te Ia, e mafai ai foi ona ou faatoilaloina mea uma, e aofia ai ma le lotonutimomoia o le oti o lou toalua.

A o faaauau ai ona ou manatunatu i atavali, sa lofituina ai i se lagona o le lotofaafetai mo faamanuiaga ua oo mai ia te au ona ou te auai i le Ekalesia a le Faaola.

I lena taeao i le aoga sa ou alu atu ai i le potu o lau uo lea ma tau atu ia te ia ou te manao ia ona silafia o au o se Kerisiano. Sa ou fesili atu ia te ia, “E fia ni atavali o le Faaola o i ai i lou fale?” Sa ia tau mai ia te au e leai ni atavali, ae na o ni satauro se lua o i ai i lona fale.

Sa ou faamatala atu ia te ia e uiga i atavali o le Faaola o i lou fale faapea ai ma le uiga o ata o loo faaalia i atavali nei ia te au. Ona ou tuu atu lea ia te ia o lau molimau e uiga ia Iesu Keriso ma Lana Togiola.

Sa ou tau atu foi i lau uo faigaluega sa na o le pau le auala na mafai ai ona ou onosaia le tausaga ua mavae o lou malamalama lea ia Iesu Keriso. Sa ou tau atu ia te ia le auala na fesoasoani ai Lona alofa mutimutivale agamalu ia te au ma lau fanau e onosaia taimi faigata o le oti o se tamā ma se tane.

Sa ou fusi ia te ia ona ou alu ese ai lea, ma sa ia tuu maia se faatoesega faamaoni. Sa leai ma se masalosalo i lo’u loto sa ia iloaina o au, o se tagata o Le Ekalesia a Iesu Keriso o le Au Paia o Aso e Gata Ai, o se Kerisiano.