Agai i Luma i le Faatuatua
O le a se mea e tatau ona e faia pe afai e ao ia te oe ona faia se faaiuga ma ua e tatalo mo au filifiliga, ae e te le o mautinoa lava le mea e fai?
Sa ta’ua e Elder Jeffrey R. Holland o le Korama a Aposetolo e Toasefululua e faapea, “O le upumoni paia lea a o le i oo mai [ma le maea] o taimi maoae, e mautinoa lava … o taimi maoae faaleagaga, o iina e mafai ona oo mai ai taimi faigata, feteenaiga, ma le pogisa” (“Cast Not Away Therefore Your Confidence,” Liahona, Iuni 2000, 34).
Ae o feteenaiga e le faapea ua tuulafoaiina ai oe e le Tama Faalelagi. O loo i ai o Ia iina, ma o le a Ia taialaina oe. O nisi taimi e tatau ona tatou agai i luma i le faatuatua seia oo ina faamalamalamaina lo tatou ala. O nisi nei o malamalamaaga mai perofeta o ona po nei e uiga i le faatalitali ma le onosai mo ni tali ma le taitaiga.
Savali atu i le Tausiusiuga o le Malamalama
“E lei leva ona uma le valaauina o au e avea ma se Pulega Aoao, ae ou alu ia Elder Harold B. Lee mo se fautuaga. Sa ia faalogo mai ma le totoa tele i lo’u faafitauli ma fautua mai ou te alu e vaai ia Peresitene Tavita O. MaKei. Sa fautuaina au e Peresitene MaKei i le itu e tatau ona ou alu ai. Sa ou matuai naunau lava e usiusitai ae sa le mavaaia se ala e mafai ai ona ou faia e pei ona sa ia fautuaina ai au e fai.
“Sa ou toe foi atu ia Elder Lee ma tau atu ia te ia ou te le o vaaia se ala e agai ai i le itu sa fautuaina ai au ou te alu i ai. Sa ia fai mai, ‘O le faalavelave o oe, o lena e te manao ia e iloa atu le taunuuga mai le amataga.’ Sa ou tali atu ou te fia iloa tau lava o se laasaga se tasi pe lua i luma atu. Ona oo mai lea o le lesona o le olaga atoa: ‘E tatau ona e aoao ia savali atu i le tausiusiuga o le malamalama, ona sosoo ai lea ma ni nai laa i le pogisa; ona mafai lea ona susulu mai le malamalama ma faaali mai le ala i ou luma atu.’ Ona ia sii maia lea o upu nei e 24 mai le Tusi a Mamona:
‘Aua tou te masalosalo ona ua outou le vaaia, aua tou te le maua se molimau seia uma ona tofotofoina o lo outou faatuatua’” (Eteru 12:6).
Peresitene Boyd K. Packer, Peresitene o le Korama a Aposetolo e Toasefululua, “The Edge of the Light,” BYU Magazine, Mar. 1991, magazine.byu.edu.
Faaauau i Luma i le Faatuatua
“O le a lau mea e fai pe a uma ona e saunia ma le faaeteete, ua tatalo faatauanau, faatalitali mo se taimi umi mo se tali, ae e te le o lagonaina lava se tali? Atonu e te manao e faaali atu le faafetai pe a tupu mai lena mea, aua o se faamaoniga lena o [le faatuatuaga o le Tama Faalelagi]. Afai e te ola agavaa ma o loo ogatusa lau filifiliga ma aoaoga a le Faaola ma e manaomia ona e [faatinoina], ia faia loa ma le faatuatuaina. A o e mataalia i uunaiga a le Agaga, e tasi lava pe lua ni mea o le a tulai moni mai i le taimi talafeagai: a le o le oo mai o le pogisa o le mafaufau, e tau mai ai o se filifiliga e le lelei, po o le toafilemu po o le mu o le loto o le a lagonaina, e faamautu ai e sao lau filifiliga. Pe a e ola amiotonu ma o loo e faatinoina ma le faatuatua, o le a le tuuina oe e le Atua e agai ese mamao atu e aunoa ma se uunaiga o le lapataiga pe a fai na e faia se faaiuga sese.”
Elder Richard G. Scott o le Korama a Aposetolo e Toasefululua, “Faaaogaina o le Meaalofa Faalelagi o le Tatalo,” Liahona, May 2007, 10.
Aua Nei Faaaogaina se Fautuaga ona o Lo Outou Fefefe
“Aua nei tatou faaaogaina se fautuaga ona o lo tatou fefefe. Tau ina ia tatou manatuaina pea ina ia tatou olioli, tuu atu lo tatou faatuatua i le Atua, ma ola agavaa mo Ia e taitai i tatou. Ua agavaa i tatou uma e maua musumusuga patino e taiala ai i tatou i lo tatou olaga faaletino faataitai. Tau ina ia tatou ola ia tatala atu o tatou loto i taimi uma i musumusuga ma le faamafanafanaga a le Agaga.”
Peresitene James E. Faust (1920–2007), Fesoasoani Lua i le Au Peresitene Sili, “Aua Le Fefefe,” Liahona, Oke. 2002, 6.
Faatalitali ma le Onosai mo Faaaliga
“O le faateleina faifai malie o le susulu o le malamalama mai le oso a’e o le la, e pei lava o le mauaina o se savali mai le Atua i lea “fuaitau i luga o lea fuaitau, ma lea mataupu i luga o lea mataupu’ (2 Nifae 28:30). O le tele lava o taimi, e oo mai faaaliga i nai faaopoopoga laiti mo sina taimi, ma e tuuina mai e tusa ai ma o tatou manaoga, agavaa, ma sauniuniga. O na fesootaiga mai le Tama Faalelagi e faasolosolo malie mai ma le malū ma “toto ifo i o [tatou agaga] e pei o le sau mai le lagi” (MF&F 121:45).
Elder David A. Bednar o le Korama a Aposetolo e Toasefululua, “O Le Agaga o Faaaliga,” Liahona, May 2011, 88.
Ia Iloa O Le A Saunia e le Atua
“I [se] vaitaimi pisi lava o lo’u olaga, sa tuu mai ai e Elder Joseph B. Wirthlin se valaauga ia te au e avea o se peresitene o le siteki.
“I le taimi o le ma faatalanoaga ma ia, sa tele ni manatu na fetuleni mai i lo’u mafaufau, ae le gata i lea o le popole ma le atuatuvale ina nei le maua so’u taimi e pei ona manaomia ai e lenei valaauga. E ui sa ou lagona le faamaulalo ma le faamamaluina e le valaauga, ae sa tau mafaufau pe mafai ona ou taliaina. Ae sa na o sina mafaufauga puupuu aua sa ou iloa na valaauina e le Atua ia Elder Wirthlin ma o loo ia faia le galuega a le Alii. O le a se mea e mafai ona ou faia nai lo le taliaina?
“E i ai taimi e ao ona tatou faia ai ni mea i le faatuatua e aunoa ma le iloaina o taunuuga, ma le talitonuga o le a tuu mai e le Atua ni tali ma taitaiga pe a tatou faia i le faatuatua. Ma o lea sa ou taliaina ai ma le fiafia, i le iloaina o le a saunia mea uma e le Atua.”
President Dieter F. Uchtdorf, Fesoasoani Lua i le Au Peresitene Sili, “O Le Aisea o le Auaunaga Faale-Perisitua,” Liahona, May 2012, 59.