Mo Le Malosi o le Autalavou
Matou te “Tautatala” i Nei Mea
O upu tatou te faaaogaina e atagia atu ai lagona o o tatou loto ma o tatou tagata moni.
A o avea ai o se epikopo, sa sau ai se alii talavou lelei lava i lou ofisa mo se faatalanoaga. A o ma talatalanoa, na ia ta’ua e na o le pau lava lona faafitauli tele o le palauvale. Sa faalogo pea o ia i gagana masoa i ona talaane, ma sa amata ai foi ona ia laulauvavale. Sa ia fai mai na ia taumafai lava e tuu ae sa le faamanuiaina, ma sa ia manao i ni fautuaga i le auala e mafai ai ona ia tuu le faaaogaina o le gagana masoa.
Sa vave ona ou mafaufau i ni fautuaga tali tutusa ia o loo maua nei i le Mo Le Malosi o le Autalavou: “Afai ua e atiaeina se mausa o le faaaogaina o le gagana e le o tusa ai ma le tausia o nei tulaga faatonuina—e pei o le palauvale, faatauemu, faitatala, po o le tautala atu ma le ita i isi—e mafai ona e sui. Tatalo mo se fesoasoani. Fai atu i lou aiga ma au uo e lagolago mai ia te oe.”1 Ou te momoo maimau pe ana faapea sa i ai lenei fautuaga i le Mo Le Malosi o le Autalavou i lena taimi.
O Se Aafiaga mai Lo’u Talavou
Sa ou faamatala atu i lenei alii talavou se aafiaga sa ou oo i ai a o ou talavou i se siosiomaga sa tele lava na faaaoga ai gagana le talafeagai. Sa foliga mai o soo se taimi lava na ou faalogo ai i soo se ituaiga o upu masoa, o na upu o le a faigofie atu ona mau i lou mafaufau nai lo mafaufauga lelei sa ou manao ia maua. Sa tau mai ia te au e se taitai perisitua lelei lava e faapea o le mafaufau e pei o se tamai masini teu faamaumauga ofoofogia lea e mafai ona tatou aveesea ni mafaufauga le talafeagai e ala i le vave tapeeseina i mea e tauleleia.
Sa tonu ia i maua ma se uo o le a ma faia faapea. Sa ma taulotoina ni viiga se lua, “Ua Naunau ia te Oe” (Viiga, nu. 57) ma le “Faapaia Mai Au” (Viiga, nu. 70), faapea ai ma le mataupu faavae o le faatuatua lona sefulutolu. Sa ma malilie faatasi po o ai lava o i maua e tautala i se mea le talafeagai, o le a ma usuina vave lava se tasi o ia viiga pe sii mai le mataupu faavae o le faatuatua.
Na vave lava ona ma iloaina ma te le fia mananao e usu leotele ia viiga i ni nofoaga patino. Sa ma matamumuli lava! O lea na ma sii maia ai le mataupu faavae o le faatuatua lona sefulutolu, ma faamamafaina le vaega, “Afai o i ai nisi mea e mama, matagofie, pe logoleleia, pe tauleleia, matou te saili atu i nei mea.” Sa aoga! Na ma iloaina a ma toe faia, o le a mou ese atu mafaufauga le talafeagai. E ala i le suia o se upu se tasi, na ma fatuina ai se mautauave faigofie: “Matou te tautatala i nei mea!” Pe a faia e se tasi o i maua lenei fasifuaitau, e ma te mafaufau, “Pe ua amiotonu ea au upu, nofomama, agalelei, amiomama, matagofie, pe logoleleia pe tauleleia?” (tagai Mataupu Faavae o le Faatuatua 1:13). Afai e leai, sa ma iloaina e i ai se ma galuega e fai.
O Le Mea e Mafai ona Tatou Faia
Ua tatou ola i se taimi o loo i ai le tele o [amioga] masoa, tufanua, ma le le mafaufau. E foliga mai e toetoe lava a le mafai ona puipuia atoatoa i tatou lava mai le faalogo atu pe vaai atu i mea o loo tatou mananao e aloese mai ai. O le ki e mo tatou ia mautinoa ia le avea i tatou ma e tauaveina ia mea masoa, tufanua, po o le le mafaufau. Atonu sa lagonaina e Paulo lenei mea ina ua ia fai mai, “Aua nei alu atu se upu leaga ai o outou gutu” (Efeso 4:29).
Ua ou vaaia nisi o le autalavou o faaaogaina gagana le talafeagai ona latou te manatu e fesoasoani lea ia latou au faatasi ai ma isi ae o isi e faaaogaina ona o se manao ia tumatilatila atu ai. O le mea moni, o mea nei ua foliga mai o mafuaaga tetele ia ua mafua ai ona see atu le autalavou i lenei mausa.
E aupito sili ona ou fiafia i na talavou o e “Lototetele ina ia ese mai,”2 e pei o se tasi o alii talavou sa i ai sana uo le lotu e fai upu masoa lava i le tele o taimi. O taimi uma lava e palauvale ai lana uo, na te talosaga faalelei lava o ia e tuu. Mulimuli ane sa tuu e lana uo. Sa matua fiafia lava lana uo ia te ia ma le auala na ia ola ai i lona olaga lea na ia manao ai e aoao atili e uiga i le Ekalesia. E lei leva lena, ae papatiso loa o ia.
O mea tatou te lagonaina i o tatou loto o mea ia tatou te mafaufau i ai, ma o mea tatou te mafaufau i ai o mea lava ia tatou te tautatala ai. O lea, e moni lava o upu tatou te faaaogaina e atagia atu ai lagona o o tatou loto ma o tatou tagata moni.
E pei lava foi ona faamatala lelei mai i le Mo Le Malosi o le Autalavou: “O se gagana mama ma atamai o se faamaoniga lea o se mafaufau atamai ma le lelei. O le gagana lelei e faagaeetia loto, faamalosiau, ma faamalo atu i isi e valaaulia ai le Agaga ia faatasi ma oe.”3
E mafai e i tatou taitoatasi ona olioli i faamanuiaga o le mauaina pea o le Agaga e faatasi ma i tatou, e pei ona folafola mai pe a tatou aai ma feinu i le faamanatuga i aso Sapati taitasi. O le a faalagolago lava ia i tatou—i le auala tatou te amio ai, o mea tatou te faia, ma, ioe, e oo lava i mea tatou te tautatala ai. Ou te faamoemoe o le a tatou le faaaogaina a tatou upu e laulauvavale ai pe faitatala ae ia faaali atu ai o i tatou o soo o lo tatou Faaola, o Iesu Keriso.