O Le Faatuatua e Tupu ai Vavega
Cheenee Lagunzad, Bulacan, Filipaina
Sa ou manao lava e avea ma se faifeautalai talu mai lou laitiiti. Sa amata i se manao faigofie ma sa faaauau ai pea ona tuputupu ae. Ae o le olaga i Filipaina sa faigata. Sa leai ni galuega a lou tama ma lou tuagane, o lea sa na o au ai na mafai ona fesoasoani i lou tina e tausi lo matou aiga. Ona sa ou fesoasoani i lou aiga i mea tautupe, o lea sa telegese ai le faaputuina o au tupe mo lau misiona.
Sa ou le mautinoa pe o le a faapefea ona lelei ia mea. I se tasi po sa ou faitau ai i le Eteru 12:12: “Aua afai e leai se faatuatua i totonu o le fanauga a tagata e le mafai e le Atua ona faia se vavega i totonu o i latou; o le mea lea, na te le faaali mai o ia lava seia mavae ona latou faatuatua muamua.” Ona ou faitau lea i se savali mai ia Peresitene Spencer W. Kimball (1895–1985) e faatatau i le faatuatua: “E faaaoga ai le faatuatua—le faatuatua le mavaaia—mo tagata talavou e faatino ai o latou tiutetauave faaleaiga pe a fetaiai ai ma tulaga le mautonu o mea tautupe. … E faaaoga le faatuatua e faatumu ai misiona faamamaluina. Ae ia iloa le mea lenei—o nei mea uma o le totoina lea, ae o aiga tuuto ma le faamaoni, o le saogalemu faaleagaga, filemu, ma le ola e faavavau o le seleselega lea.”1
O nei aoaoga sa fesoasoani lea ia te au ou te malamalama ai na ou manaomia tele le faatuatua e auina atu ai au pepa o le misiona ma le avea ai ma se faifeautalai faamisiona. Sa ou iloaina e ui lava sa faigata, ae o le a fesoasoani mai lava le Atua.
Sa faatalanoaina au e lou peresitene o le paranesi ma tau mai ia te au mulimuli ane o le mea mulimuli lava ou te manaomiaina e fai o le faia lea o le uluai tupe totogi ona faatalanoaina ai lea e le peresitene o le misiona. Sa ou matua fiafia ma faagaeetia. O le a maua lo’u totogi o lena vaiaso, ma o le a mafai ai ona totogi atu le aofaiga manaomia. Peitai, ina ua ou taunuu atu i le fale, sa ou iloa ai ua ave lou tama i le falemai. Sa ou lagonaina le lofituina ina ua ou iloa e ao ona matou totogia le falemai i le aofaiga tonu lava lea ou te manaomia mo lau tupe totogi o le misiona.
Ae sa saunia e le Tama Faalelagi se auala. Sa matou maua se fesoasoani mai aiga ma tagata o le Ekalesia, e aofia ai lo’u peresitene o le paranesi. O se vavega lava le toe te’a i tua o lou tama mai le falemai ina ua mavae le vaiaso e tasi, ma sa mafai ai ona ou totogi atua le tupe. I le lua vaiaso talu ona atoa lou 22, sa ou mauaina ai lou valaauga o le misiona i le Misiona a Filipaina Olongapo.
Ou te iloa sa faafaigofie e le Tama Faalelagi mo au ona auina atu au pepa o le misiona. Ou te iloa afai e faaauau pea ona ou faalagolago atu ia te Ia ma galue i le faatuatua, o le a Ia faia mea faigata e avea ma mea faigofie. O le a Ia tali mai i a tatou tatalo uma, ma o le a Ia faaauau pea ona taiala i tatou pe afai tatou te faaauau pea ona usiusitai ia te Ia.