Mauaina o le Saogalemu i le Talalelei
E tulaga ese lava tagata o le Ekalesia i Kenya a o latou ola ai i le talalelei ma fausia ni sulufaiga mai le lalolagi.
I se faitau aofai o tagata e silia ma le miliona, o Nairopi, Kenya, o le aai aupito tumutumu lea i Aferika i Sasae. O se nofoaga pisi e tumu i taavale, loli, ma veni mutatus—ia e avea o se tautua a pasi e umia saoloto—e femasauai i totonu o auala. O se aai o ala nofoaafi, tagata tafafao, ma falegaosimea ma o le taulaga lona lua lea le leva o mea tau fefaatauaiga o oloa i le konetineta.
Ae i le itu i saute, e itiiti ifo ma le lima maila (7 km) mai le totonugalemu o le laumua o Kenya, o loo i ai se nuu maotua toafilemu. I le Nairobi National Park o loo puipuia le laueleele ma foliga mai na i ai mo le faitau selau o tausaga. I le tafailagi o le aai, o nameri, pafalo vai, manuvao, sepora, solofanuavai, ‘aila, povi, ma puaavai e feofeoai solo ma ‘aai i le vao. O leona e momoe i lalo o laau mafala. E ofo atu e le paka i nei manu se sulufaiga mai le lofituina o atina’e.
I Kenya atoa o loo i ai lava ni malutaga laiti ifo o isi ituaiga. Ua fatuina e tagata o le Ekalesia ni malutaga mai malosiaga o le lalolagi. E ala i le ola ai i le talalelei, o loo latou fausia ai ni nofoaga paia e tutu ai (tagai MF&F 45:32; 87:8).
Mauaina o le Malosi e ala i Tulaga Faatauaina
Fai mai Opra Ouma o le manatuaina o tulaga faatauaina o Tamaitai Talavou na ia maua ai le malosi e ola ai i le talalelei. “E tusa lava pe ou te le i ai faatasi ma le autalavou nofofua matutua a le Au Paia, ae a ou alu atu i le lalolagi, e mafai lava ona ou faaaogaina ia tulaga faatauaina a Tamaitai Talavou ma saogalemu ai pea,” na ia fai mai ai.
Na muai aoaoina e Opra nei tulaga faatauaina a o lei papatisoina o ia. Ina ua 17 ona tausaga, sa vaai Opra i faifeautalai i luga o le auala i se tasi o aso ma mafaufau ai pe o ai i laua. Sa ia suesue i le talalelei mo se tausaga ma sa papatisoina ai ina ua atoa lona 18 tausaga. Sa faamalosia e le faalapotopotoga a le Au Paia o Aso e Gata Ai o ia faaleagaga.
“Pe a ou i ai i le lotu faatasi ma le autalavou nofofua matutua, ou te lagonaina le saogalemu, ae a ou i ai i fafo atu i o, ou te le lagonaina le saogalemu tele ona o le tele o taimi e na o au ai lava le tagata o le Au Paia o Aso e Gata Ai i le vaega,” sa ia fai mai ai. “O nisi taimi e luitauina ai ona o tulaga faatonuina o le lalolagi ma tulaga faatonuina a le Ekalesia e matua eseese lava.”
Pipii i le Ai Uamea
Ua fesoasoani suesuega o tusitusiga paia ia Stephen Odhiambo Mayembe e maua tali ia na te fai mai e le mafai ona tatou maua e i tatou lava. “E ala i le suesueina o tusitusiga paia, e mafai ai ona tatou mauaina tali i nisi o faafitauli tatou te oo i ai i o tatou olaga mai lea aso i lea aso,” sa ia fai mai ai. “Ma e ala foi i le suesueina o tusitusiga paia, tatou te maua ai lena lototele e tumau ai e oo i le iuga ona o tusitusiga paia o le a i ai pea iina e aoao i tatou ma ta’u mai ia i tatou le mea e fai.
O le suesueina o le Tusi a Mamona sa fesoasoani ia Stephen e maua ai se molimau i le Ekalesia. I le taimi o se asiasiga a le uso o lona tina o le sa auai i le ekalesia, na ia valaaulia ai Stephen la te o i le lotu. Ina ua amata ona ia faitauina le Tusi a Mamona, sa ia tatalo ai e fia iloa pe moni ma ia maua ai se tali.
Na ia fai mai o le faitauina soo o tusitusiga paia ua fesoasoani ia te ia e tausia tulaga faatonuina o le Ekalesia e tusa lava pe fesiligia e i latou o siomiaina o ia ona talitonuga. “I le avea ai ma se tagata o le Ekalesia, ua faamalosia ai lou faatuatua, ma e ala i lena mea ua mafai ai ona ou fai atu e faapea e le mafai ona toe maluelue [tagai Iakopo 7:5],” na ia fai mai ai.
Faatalitali i le Alii
Ua iloa e Sharon Poche e faapea o le filifili ina ia ese ua faigofie ai ona ola i le talalelei. Ua tuuto atu o ia i le tausia o poloaiga, ma ua faaaloalogia e ana uo lena filifiliga. Ua ia filifili e taofia o ia mai tulaga ia o le a faafaigata ai ona ola amiotonu.
“Pe a e filifili e taalo i luga o lena laina, lena laina manifinifi moni, ona faasolo faigata lea aua e mafai ona e pa’u i lalo i soo se taimi,” na ia fai mai ai e uiga i le laina i le va o le lelei ma le leaga.
Na maua e Sharon le Ekalesia a o 14 ona tausaga ina ua filifili lona tina e papatiso. O le faitauina o le Tusi a Mamona sa alu ai le tele o taumafaiga ona o Sharon, o se tagata o le ituaiga Nandi, e tautala i le Kalenjin, o lana gagana muamua lea. E ui i faigata, sa amata lava ona ia suesueina le Tusi a Mamona i le Faa-Peretania. “Sa ia te au lenei lagona e faapea o se mea lelei lenei, ma sa ou maua se lagona mafanafana, o lea sa ou faaauau ai. Sa ou tatalo seia oo ina ou iloa e moni,” o lana tala lea.
Sa manao Sharon e papatiso, ae sa le faatagaina e lona tama. O lea mo le fa tausaga, sa auai ai pea Sharon i le lotu, seminare, ma gaoioiga a le autalavou a o ia faatalitali mo le avanoa e auai ai i le Ekalesia.
Ina ua 18 tausaga o Sharon, sa papatiso loa o ia ma faamauina. Sa ia aoga i le kolisi ma suesue i mataupu tau le mafaufau. Sa ia faaipoipo atu ia Joseph Poche ia Fepuari 2013. E lei pine, ae la malaga atu i le Malumalu o Johannesburg Aferika i Saute ma faamauina ai. Sa ia fai mai o le suesueina o le talalelei ua fesoasoani ia te ia e taulai atu ai i mea taua i se lalolagi lea ua faigofie lava ona faafenumiaia.
“Ou te iloa le uiga atoa o le olaga ma le mafuaaga ua tatou i ai iinei i le lalolagi,” o lana tala lea. “O lena malamalama ua fesoasoani ia te au ia taulai atu ai i mea ua sili ona taua.”
Malosi Faatupulaia
I totonu o le Nairobi National Park o loo i ai se malutaga mo puaasami. O lenei fale o loo tausia ai ma fesuisuiai ai nofoaga o lenei manu ua tau mou atu i isi paka e fesoasoani ai ia toefuatai le faitau aofai o manu, lea sa tafanaina ma toetoe ai lava a le toe i ai. Ua faamamaluina o se tasi o malutaga sili ona faamanuiaina ma taua i Kenya.
E faapena foi, ua saunia e le talalelei ni malutaga lea e mafai ona o mai i ai tagata o le Ekalesia, e maua ai le malosi, maua ai le lototele e faasalalau atu ai le talalelei, ma atiae ai sootaga malolosi o le faatuatua.
Opra Ouma
Stephen Odhiambo Mayembe
Joseph ma Sharon Poche
Lalo: O puaasami o loo ai vao i le Nairobi National Park.