Savali a le Au Peresitene Sili
Ia Iloa, Manatua, ma Tuu Atu le Faafetai
Ua poloai mai le Atua ia tatou tuu atu le faafetai ia te Ia mo soo se faamanuiaga tatou te maua mai ia te Ia. Ua faigofie lava mo i tatou le le lagonaina o le agaga i a tatou tatalo o le faafetai, i le ta’u soo o upu lava e tasi ae ua aunoa ma se faamoemoega e tuu atu la tatou faafetai e avea ma se meaalofa o le loto i le Atua. E ao ia i tatou ona “faafetai atu … i le Agaga” (MF&F 46:32) ina ia mafai ona tatou lagonaina le lotofaafetai moni lava mo mea ua foai mai e le Atua ia i tatou.
E mafai faapefea ona tatou manatuaina e oo lava i sina vaega o mea uma ua faia e le Atua mo i tatou? Sa tusia e le Aposetolo o Ioane mea sa aoaoina ai i tatou e le Faaola e uiga i se meaalofa o le manatuaina o mea e maua mai le meaalofa o le Agaga Paia: “A o le Fesoasoani, o le Agaga Paia lea, e auina mai e le Tama i lo’u igoa, o ia lava na te aoao ia te outou i mea uma lava; e faamanatu mai foi o ia ia te outou i mea uma ua ou fai atu ai ia te outou” (Ioane 14:26).
E faamanatu mai e le Agaga Paia mea na aoao mai e le Atua ia i tatou. Ma o se tasi o auala o loo aoao ai i tatou e le Atua o Ana faamanuiaga; ma o lea, afai tatou te filifili e faaaoga le faatuatua, o le a aumai e le Agaga Paia le agalelei o le Atua i lo tatou manatuaga.
E mafai ona e faataitaia lena mea i le tatalo i lenei aso. E mafai ona e mulimuli i le poloaiga “Ia e faafetai atu i le Alii lou Atua i mea uma” (MF&F 59:7).
Na fautua mai Peresitene Ezra Taft Benson (1899–1994) e faapea e fatua’i e le tatalo le taimi e fai ai le mea lena. Sa ia fai mai: “Sa saunoa mai le Perofeta o Iosefa Samita i se tasi taimi e faapea o se tasi o agasala aupito sili o le a tausalaina ai le Au Paia o Aso e Gata Ai, o le agasala lea o le le lotofaafetai. Ou te manatu o le toatele o i tatou e lei mafaufauina o se agasala tele lena agasala. O loo i ai se amioga tele ia i tatou i a tatou tatalo ma i a tatou aioiga i le Alii e ole atu mo nisi faamanuiaga faaopoopo. Ae o nisi taimi ou te lagona ai ua manaomia ona tatou tuuto atili atu a tatou tatalo i le faailoa atu o le lotofaafetai ma le faamanu mo faamanuiaga ua uma ona maua.Ua tele mea ua tatou olioli ai.”1
E mafai ona e maua sea aafiaga ma le meaalofa o le Agaga Paia i le asō. E mafai ona e amataina se tatalo patino i le faafetai. E mafai ona e amata i le faitauina o ou faamanuiaga ona e taofi lea mo sina taimi. Afai e te faaaogaina le faatuatua, i le meaalofa o le Agaga Paia, o le a e iloaina o le a tafe mai i lou mafaufau le manatuaina o isi faamanuiaga. A amata ona e faailoa atu le lotofaafetai mo ia faamanuiaga taitasi, o le a fai si umi atu o lau tatalo nai lo le mea e masani ai. O le a oo mai le manatua, ma o le a faapena foi le lotofaafetai.
E mafai ona e taumafaia lea mea lava e tasi a o e tusia se mea i lau api talaaga. O loo fesoasoani pea le Agaga Paia i tagata i lena mea talu mai le amataga o aso. E te manatua fai mai le tusi a Mose, “Ma sa tusia se tusi faamanatu, lea sa tusia ai i le gagana a Atamu, ona sa tuuina mai i le toatele na valaau atu i le Atua e tusitusi e ala i le agaga o musumusuga” (Mose 6:5).
Sa faamatala e Peresitene Spencer W. Kimball (1895–1985) lena faagasologa o tusitusiga musuia: “O i latou e tausia se tusi faamanatu e foliga mai e sili atu ona faatumauina le manatua o le Alii i o latou olaga i aso taitasi. O api talaaga o se ala lea o le faitauina o o tatou faamanuiaga ma le tuua o se faaputuga oa o nei faamanuiaga mo a tatou fanau.”2
A o amata ona e tusitusi, e mafai ona e fesili ifo ia te oe lava, ”Na faapefea ona faamanuiaina au e le Atua ma i latou ou te alofa i ai i le asō? A e faia soo lena mea faatasi ma le faatuatua, o le a e manatuaina ia faamanuiaga. Ma o nisi taimi o le a e manatua ni meaalofa na e le matauina i le gasologa o le aso ae o le a e iloa ai i lena taimi sa pai mai le aao o le Atua i lou olaga.
Ou te tatalo ina ia tatou faia pea se taumafaiga i le faatuatua ina ia iloa, manatua, ma tuu atu le faafetai mo mea ua faia e lo tatou Tama Faalelagi ma lo tatou Faaola ma o loo faia pea e tatala ai le ala tatou te toe foi atu ai ia i Laua.
Aoao atu mai lenei Savali
I lana savali, ua valaaulia ai e Peresitene Eyring i tatou ia manatua le agalelei o le Tama Faalelagi i a tatou tatalo. Ia talanoaina ma i latou e te aoaoina le auala e mafai ai ona fesoasoani le tatalo ma le lotofaafetai ia i tatou ia iloa le aao o le Atua i o tatou olaga. Mafaufau e tootuli e tatalo ma i latou e te aoaoina ma fautua atu i soo se tasi e faia le tatalo ia tau ina faailoa atu o le faafetai.
E mafai foi ona e suesue i le taua o le lotofaafetai e ala i le faitauina o nei fuaiupu e faaopoopo atu i fuaiupu ia na taua e Peresitene Eyring: Salamo 100; Mosaea 2:19–22; Alema 26:8; 34:38; Mataupu Faavae ma Feagaiga 59:21; 78:19; 136:28.