Gagana Lelei

O upu tatou te faaaogaina e mafai ona molimau atu ai ia Keriso, faamafanafana ai i e mafatia, faamalo atu ai i se uo, pe faailoa atu ai se alofa i se tagata o le aiga. E mafai foi ona tatou fai atua ni upu e tupu ai se tiga faalelagona, faasalalau ai le faitatala, fai ai upu masoa, pe taufaifai ai. O lou fesoasoani i lau fanau e faaaoga le gagana lelei o le a aumaia ai le filemu ma le faamalosiauga i lou aiga. I le lomiga o lenei masina i itulau 60–61, o loo talanoaina ai e Larry M. Gibson o le au peresitene aoao o Alii Talavou le taua o le gagana mama:

“O le mea tatou te lagonaina i o tatou loto o le mea lena o loo tatou mafaufau i ai, ma o le mea tatou te mafaufau i ai o le mea lena tatou te tautatala ai. O lea, e moni ai lava o upu tatou te faaaogaina e atagia mai ai lagona o o tatou loto ma o tatou tagata moni lava. …

“E mafai e i tatou taitoatasi ona olioli i faamanuiaga o le mauaina pea o le Agaga e faatasi ma i tatou, e pei ona folafola mai i taimi tatou te aai ma feinu ai i le faamanatuga i aso Sapati taitasi. O le a faalagolago ia i tatou lava—i le auala tatou te amio ai, o mea tatou te faia, ma, ioe, e oo lava i mea tatou te tautatala ai.”

Fautuaga mo le Aoaoina o le Autalavou

E mafai ona e faitauina ma lou aiga le vaega o le gagana i le Mo Le Malosi o le Autalavou (itulau 20–21). Talanoaina mea e fai pe a faaaogaina e i latou o siomia oe le gagana leaga.
Faitau le tusiga a Uso Gibson i le itulau 60–61. Faaaoga lana tusiga e seti ai ni sini e fesoasoani ai i le tasi ma le isi e faaaoga le gagana lelei.
Suesue ma talanoaina ia mau ua lisi atu i le itu taumatau.
Faitau le “Filifili e Aua le Faitatala” i le itulau 59 o le lomiga lenei ma talanoa e uiga i le matautia o le faitatala. Talanoa pe aisea e tupu ai le faitatala ma pe faapefea ona aloese mai ai.
Maimoa i vitio ma faitau ia tusiga a le autalavou e uiga i le mana o le gagana. Alu i le youth.lds.org ma kiliki i le faamau o le “Mo Le Malosi o le Autalavou”. Kiliki i le “Gagana.” I le itu taumatau o le itulau o loo i ai se vaega “Fesootai” o loo faaalia ai vitio e pei o le “No Cussing Club” ma tusiga a le autalavou e uiga i le le faamaasiasia o isi.

Fautuaga mo le Aoao Atu o Tamaiti

Mafaufau e faitau le “O Upu Tatou Te Tautatala Ai” (Rosemary M. Wixom, Liahona, Me 2013, 81); “O Na Upu” (Liahona, Tes. 2011, 60); po o le “O Se Tali Filemu” (Liahona, Iuni 2011, 70). Talanoa pe faape’i o tatou lagona pe a tatou fai atua ni tala lelei i le tasi ma le isi.
Talanoaina mea e te le tautala ai i totonu o lou aiga. Seti ni sini e fai atu “faamolemole” ma “faafetai” ma fai atili atu upu faamalo.
Talanoa e uiga i le auala e atili fiafia ai tagata uma pe a tatou fai atu ni mea lelei i le tasi ma le isi. Usu le “O Le Agalelei e Amata ia te Au” (Tusipese a Tamaiti, 145) po o se isi pese e uiga i le agalelei.