Galue Auauna Atu ma le Faalagolago Faaleagaga o le Tagata ia te Ia Lava
O faamanuiaga o le galue malosi ma le auauna atu e sili atu i le na o se fesoasoaniga faaletino.
Folapiliki i le 16 [tausaga]
O le aoao i le auala e galue malosi ai e taua ao e talavou. O le galue malosi faaletino o se vaega o le olaga. Sa ou vave aoaoina lena lesona ina ua valaauina au i se misiona faapitoa o auaunaga faale-Ekalesia e fesoasoani i le fausiaina o falelotu. Sa na o le 16 ou tausaga ma faatoa faauu mai lava i lau aoga. Sa tofia au i le vaega a le au folapiliki. Sa o se galuega faigata, ae sa ou fiafia i ai.
Sa tuu i matou i vaega ma sa ou faimalaga mai Suetena, i le mea sa ou nofo ai, i isi atunuu lata ane. I nofoaga taitasi sa matou faia ni fetuunaiga e nonofo ma se tagata mai le uarota i le lotoifale. Sa taia au i le naunautaiga o tagata lelei ma mausali o le Ekalesia e tatala mai o latou fale ma saofaga i soo se mea na latou mafaia. E oo lava i a latou mea tautupe sa le tele, ae na latou mananao lava e auauna.
O le toatele o alii talavou na valaauina i nei misiona o auaunaga faale-Ekalesia na matutua, ae o a’u sa 16. Sa mulimuli ane ou auauna i se misiona tala’i ina ua 19 ou tausaga. Ina ua ma maua ma lou uso ia valaauga, sa sau lo ma tama ia i maua ma faapea mai, “E ui lava o le a faasalaveia ai i se taimi le tumau a oulua aoaoga faifai pea, ae ou te manao ia i ai ni ou atalii e aoao vave e auauna atu i le Ekalesia. O le mauaina o lena aafiaga o le a avea ma faavae mo le ala e mafai ona oulua taulimaina ai le olaga.” O aso nei, o le tali atu i le valaau e auauna atu i se misiona tala’i o se mea faamuamua lea mo alii talavou.
Ina ua maua lou valaauga e auauna atu i lenei misiona, sa fai si ou popole, ae sa ou lei faatuai lava e taliaina. Sa aoaoina lava au mai lou talavou e fai atu ioe pe a talosagaina e auauna atu i soo se vaega o le galuega a le Alii. O lea, i le sili ai nai lo le popole, sa ou lagonaina le fiafia. Sa o se aafiaga maoae le fesoasoani ai i le fausiaina o falelotu mo le Ekalesia.
Mauaina o le Molimau ma le Ola Faalagolago o le Tagata ia te Ia Lava
Ou te iloa e ala i le auauna atu i isi e mafai ai ona tatou mauaina se alofa ma se molimau i le talalelei. I le taimi sa ou malaga ese ai mai lou aiga o se alii talavou, sa ou aoaoina ai e manaomia ona ou tauaveina tiutetauave mo lou olaga—e le gata i le faaletino ae faapena foi i le faaleagaga. Sa ou aoaoina foi le auala e faalogo moni ai lava ma mulimuli i uunaiga a le Agaga.
Ae o na lagona ma tomai sa le na o le taimi o lau misiona o auaunaga faale-Ekalesia na oo mai ai. Sa amata lau molimau ma lou manao e auauna atu i se taimi na muamua atu i lena. A o ou talavou, sa ou matamuli lava, ma sa i ai foi ou luitau e tautala atu ona o lou le mautonu. Ae sa faasolosolo lava ona faamalosia au—i lea laasaga ma lea laasaga a o ou faaaofia au i auaunaga. Sa tuu mai ia te au ni avanoa e aoao ai, auauna atu ai, ma tuputupu ae ai e ala i valaauga ma tofiga i le matou paranesi. Sa oo ina ou auai ma le naunautai (tagai MF&F 58:27). Sa ou aoao e faapea i le olaga, o le mea e te amata ai e le o le mea lea e te tini ai; o le mea e amata ai o le amataga lea o se olaga o suiga.
O Se Folafolaga e Fesoasoani ia i Tatou
O le ki o le faia o lena suiga o le manatua pea lea pe o ai i tatou. O i tatou o atalii ma afafine o le Tama Faalelagi. Sa fananau mai i tatou taitoatasi ma se folafolaga: pe a tatou osia ma tumau ma le faamaoni i feagaiga ma fai mea sili tatou te mafaia i o tatou tulaga, taleni, ma tomai, ona mafai lea ona tatou toe foi atu i lo tatou Tama Faalelagi ma le mamalu. O le vaega lena o la tatou vaaiga e faavavau, ma e manaomia ona tatou manatuaina e le o tuua na o i tatou. O le a aumai e le Tama Faalelagi ia i tatou le mana ma le tomai e fetaiai ai ma o tatou luitau.
Sa auala mai i aafiaga na ou oo i ai a o auauna atu i le popofou o lou olaga lea na amata ai ona faamautu lou lava lototele i le Alii. Ua faamalosiau mai le Mataupu Faavae ma Feagaiga 121:45 ia i tatou ia “solo malosi [lo tatou] lototele i luma o le Atua.” A e aofia ai i le auaunaga a le Alii, o le a e lagonaina Lona Agaga, o le a e lagonaina Lona alofa, ma o le a e malamalama e faapea, e ui lava o lenei olaga o se suega, ae e le o tuua na o oe. Pe a e ola amiotonu ma e auauna atu, o le a tuu atu ia te oe fesoasoaniga ma mana e sili atu nai lo lou lava mana.