O La Tatou Tali
O se tatalo faigofie lava na suia ai lou aiga e faavavau.
“O le a ia faaali mai le moni o ia mea ia te outou, i le mana o le Agaga Paia” (Moronae 10:4).
Ou te manatua pea le taimi muamua na ou vaaia ai ni alii se toalua o tutu mai i lo matou faitotoa i Peru. Sa la ofuina ni ofutino papae ma ni fusiua, ma sa uumi tele i laua! Sa ou manatu e manaia lo la matafiafia mai.
“Masalo e lelei i laua,” sa ou manatu ai. Masalo sa faapena foi manatu o ou matua ona e lei pine ae o mai soo faifeautalai i le matou fale.
Sa ou fiafia lava e faalogologo atu i faifeautalai ma lagona i taimi uma sa laua tau maia le upumoni.
“E te le fia papatiso, Mamá?” Sa ou fesili atu ai ia tina i le tasi aso.
Sa ataata o ia. “Ioe. Ae ou te fia papatiso faatasi ma lou tama.”
Sa lue atu lou ulu. Sa iva ou tausaga—ua lava le matua e papatiso ai. Ae sa ou manao foi ina ia papatiso faatasi ma lou tama, ae sa le mautonu o ia pe o ia talitonu i mea sa aoao atu e faifeautalai.
“Toaga e tatalo, ma o le a oo mai lava le taimi,” sa fai mai ai Mamá, e peiseai o mafai ona ia faitauina ou mafaufauga.
Sa ou iloa na tuu atu e faifeautalai se lui i lou tama e mulimuli i le valaaulia o i le faaiuga o le Tusi a Mamona ia ole atu i le Atua ma se loto faamaoni pe moni le talalelei. I se tasi la o afiafi sa tonu ai ia te au e fesoasoani atu i lou tama i lena lui. Sa ou fai i ai pe mafai ona ma tatalo faatasi i le auala lea na talosagaina ai e faifeautalai. Sa ma o atu i totonu o lou potu ma tootutuli ai. Sa ia fesili mai po o ai o le a faia le tatalo.
“Fai e oe, faamolemole,” sa ou fai atu ai.
Na amata ona tatalo lou tama i le Tama Faalelagi. Ina ua ia ole atu pe tatau ona matou papatiso, sa siomiaina i maua i se lagona o le alofa ma le filemu. Sa matuai malosi lava ma sa le tautala lo’u tama mo sina taimi. Sa ma iloaina ai e manaomia ona papatisoina i matou.
O le a le galo lava ia te au le vaaiga i foliga o lou tama ina ua ia faamaeaina lena tatalo.
“Ua maua le tatou tali,” na ia musumusu mai ai, ma fusi atu au.
Sa ou ataata a o lago atu lou ulu i ona tauau. Sa faafaigofieina e le Agaga Paia mo i matou ona iloaina le upumoni (tagai Moronae 10:5).