13

E Mafai Ona Faatasia Lo’u Aiga e Faavavau

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

Ua faia e le Tama Faalelagi ina ia mafai e sootaga faaleaiga ona faaauau pea pe a mavae lenei olaga. Afai e faamauina aiga i le malumalu ma faamaoni i le tausia o poloaiga, e mafai ona toe faatasia o se aiga e faavavau ma nonofo ai i le afioaga o le Tama Faalelagi. (Tagai Mataio 16:19; MFF 138:47–48.)

Sauniuniga

Afai e mafai, aumai se ata o se malumalu o la outou eria.

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Ata

Faaali atu se ata o le malumalu o la outou eria (pe faaali atu le ata o i le itulau 58). Ta’u i tamaiti o le ata lea o se malumalu. Faamatala ia i latou le ata, faasino i ai le tumutumu, faamalama, faitotoa, ma isi. Fai i ai e ta’u mai le upu “malumalu” mo ni nai taimi. Ia latou faafoliga o i latou o se malumalu matagofie e ala i le tuu faatasi o o latou lima i luga ae o o latou ulu e fai ai le tumutumu o se malumalu.

Pese

Valaaulia tamaiti e tutu i luga. Usu pe fai atu upu i le pese “Ou Te Fia Vaai i le Malumalu” (Tusipese a Tamaiti, 99) ma faia taga o loo i lalo. Valaaulia tamaiti tou te faia faatasi

Ou te fia vaai i le malumalu. (tuu faatasi tamatamai lima e fai ai se tumutumu)

Ou te ulu i ai i se aso (savavali i o latou tulaga)

E lagona ai le Agaga, (tuu lima i luga o le fatu)

Ma ou tatalo ai. (piilima)

Ta’u i tamaiti o le malumalu o le maota o le Alii. Valaaulia i latou e fai mai, “Maota o le Alii.” Faamamafa atu o le malumalu o se nofoaga e matua faapitoa; e mafai ona faatasi e faavavau o tatou aiga ona o le malumalu.

Fuaiupu o Gaoioiga

Tauloto le fuaiupu o gaoioiga lea ma valaaulia tamaiti tou te faia faatasi:

O Tina lea. (tuu i luga le lima; tusi i le limamatua)

O Tama lea. (tusi i le limatusi)

O Uso umi lea. (tusi i le limaogatotonu)

O Tuafafine lea. (tusi i le lima tuumama)

O Pepe lea. (tusi i le tamailima)

Oi, matou te alolofa ia i latou uma. (tuu uma lima e lua i luga o le fatafata)

Pese

Usu pe fai atu laina muamua e lua o le tali o le “E Mafai Ona Faavavau Aiga” (Tusipese a Tamaiti, 98):

E mafai ona faavavau aiga

I le ala a le Tama.

Valaaulia tamaiti tou te toe faia lemu faatasi laina ia mo ni nai taimi.

Faaiuga

Faasoa atu faapuupuu o ou lagona e uiga i le malumalu. Faasoa atu lau molimau e mafai ona faatasia e aiga i le faavavau.

Tatalo

Valaaulia se tamaitiiti e faia le tatalo faaiu.

Motugaafa Faafaiaoga

Manatua: Ia nofouta i tulaga i aiga ma fale o tamaiti a o faia lenei lesona.

Pese: Mafaufau e faia se lisi o pese e fiafia tamaiti e usu, ma ia usu i vaiaso taitasi i taimi eseese a o faia le vasega pepe. Mo se faataitaiga, e mafai ona e pese a o taaalo tamaiti i mea taalo, a o lei faia pe ua maea meaai, pe a o faatali tamaiti mo o latou matua. O se auala lelei lea e toe faamanatu ai lesona ua tuanai.

Faaiuga: O le faaiuga lenei e mafai ona matua puupuu lava; mo se faataitaiga: “Ou te alofa i le malumalu! Ou te iloa e mafai ona faatasia aiga e faavavau.”

Gaoioiga e Filifili Ai

Sauniuniga

• Mo le fuaiupu o gaoioiga: Kopi ma oti ese papeti tamatamai lima o i le itulau 59 pe faaaoga papeti na e faia mo le gaoioiga faaopoopo i le lesona 12. Valivali papeti pe afai e mananao ai.

  

  E Mafai Ona Faatasia Lo’u Aiga e Faavavau

  Kopi le itulau lea ma oti ese papeti tamatamai lima i luga o laina solo atoa. Gagau i luga o laina togitogi. Ona faapipii lea o pito, ae faaavanoa le pito i lalo e mafai ai e tamaiti ona faamaulu papeti i o latou tamatamai lima.

• Mo le taaloga taumatemate: Kopi ma oti ese ia faatagata o le aiga o i le itulau 51 pe faaaoga faatagata na e saunia mo le lesona 11. Aumai se mea e ufiufi ai faatagata, e pei o se palanikeke po o se ie. Afai e mafai, aumai se ata o le malumalu o la outou eria.

  

  Ou te Alofa i Lo’u Aiga

• Mo le gaoioiga valivali: Kopi ma oti ese ia li’o o i le itulau 59 mo tamaiti taitoatasi. Tui se vulu po o se manoa i le tumutumu o li’o e lua e fai ai se ula.

Gaoioiga Tamatamai Lima

Ta’u i tamaiti e tatau ona tatou saunia e o i le malumalu. Fai ia i latou e tuu i luga tamatamai lima e lima, ma fesoasoani ia i latou e tusi i luga o latou tamatamai lima mea e lima e mafai ona latou faia e saunia ai e o atu i le malumalu pe a oo ina matutua i latou (tatalo, usiusitai i matua, alofa i isi, alu i le lotu, mulimuli i le perofeta, ma isi). O lenei gaoioiga e fetaui lelei lava mo tamaiti matutua.

Fuaiupu o Gaoioiga

Toe fai le fuaiupu o gaoioiga o i le itulau 56, faaaoga ai papeti tamatamai lima i le taimi lenei.

Taaloga Taumatemate

Tuu faatagata o le aiga i luga o le fola e latalata i le ata o le malumalu (lea na e aumaia po o lea e i le itulau 58). Ufiufi faatagata i se palanikeke po o se ie. Aveese se faatagata se tasi. Aveese le ie ma fai atu i tamaiti e mate mai po o ai o loo misi. Ona toe tuu lea o le faatagata i lona tulaga ma fai atu i tamaiti e finagalo le Tama Faalelagi e faatasia e faavavau aiga uma lava, e aunoa ma se toatasi e misi. O lenei gaoioiga e fetaui lelei lava mo tamaiti matutua.

Valivali

Valaaulia tamaiti e valivali ula na e saunia. A o valivali i latou, faamalosia atu le mataupu faavae e faapea, e mafai ona faatasia e faavavau aiga ona o le malumalu.

Motugaafa Faafaiaoga

Papeti tamatamai lima : O se manatu lelei tele le teuina o ata tusi, papeti tamatamai lima, taaloga, ma isi aitema e te saunia mo lesona nei. E mafai ona e faaaogaina mo lesona i le lumanai po o soo se taimi lava a o faia le vasega pepe e toe faamanatu ai mataupu faavae ua maea ona e aoaoina atu.

Valivali: Faamalosiau i tamaiti e faaali atu a latou ula i o latou aiga. E mafai ona fesoasoani lea ia i latou e manatua ai mea na latou aoaoina, ma maua ai le avanoa o matua e talanoa ai ma i latou i mataupu faavae o le lesona. (Tagai O Le Aoao Atu, E Leai Se Isi Valaauga e Sili Ai, 175–76.)