1

O A’u o se Atalii o le Atua

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

O i tatou taitoatasi o se atalii po o se afafine agaga faapelepele a o tatou matua faalelagi. Sa tatou nonofo faatasi ma i laua ae tatou te le i fananau mai. E silafia i tatou taitoatasi e lo tatou Tama Faalelagi ma e alofa ia i tatou. (Tagai Salamo 82:6; Galuega 17:28–29; Eperu 12:9.)

Sauniuniga

• Aumai se kopi o tusitusiga paia. Faailoga le Salamo 82:6 ma le Mose 1:4 ia faafaigofie ona e susue i ai.

• Faailoga le itulau 99 i le tusi lesona lenei e faafaigofie ai ona e susue i ai.

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Pese

Usu pe fai atu le fuaiupu muamua o le “O A’u o se Atalii o le Atua” (Tusipese a Tamaiti, 2):

O A’u o se Atalii o le Atua,

Ua Ia auina mai a’u nei.

Toe fai faalua pe faatolu, ma valaaulia tamaiti tou te pepese faatasi.

Mau

Ta’u i tamaiti e i ai o latou tina ma tama i le lalolagi e alolofa ia i latou. Ta’u i ai e i ai foi so latou Tama Faalelagi e silafia ma alofa ia i latou. Susue le Tusi Paia i le Salamo 82:6 ma faitau, “O fanau foi outou uma a le [Atua].”

Tala mai Tusitusiga Paia

Faaali le ata tusi o Mose i le itulau 99 (atonu o le a e manao e ufiufi isi ata tusi o i le itulau lea e fesoasoani i tamaiti e tulimatai ia Mose). Faamalamalama atu o Mose o se perofeta maoae sa soifua i aso ua leva. Ta’u atu i tamaiti sa alu ae Mose i se mauga e tatalo ai. Valaaulia tamaiti e faafoliga e pei o loo latou feaei i se mauga; ona piilima lea o o latou lima e pei o loo tatalo. Susue le Penina Tau Tele i le Mose 1:4 ma faapea atu, “Na fetalai le Atua ia Mose, ‘Faauta, o lo’u atalii oe.’ ” Faamalamalama atu e faapea, sa iloa e Mose o ia o se atalii o le Atua.

Gaoioiga e Fai Soo

Valaaulia se tamaitiiti e tu i ou tafatafa i luma o le vasega.

Fai atu: “O [igoa o le tamaitiiti] lea.”

Fai atu i tamaiti e toe tau mai le igoa o le tamaitiiti.

Fai atu: “O [igoa o le tamaitiiti] o se atalii o le Atua.”

Fai i tamaiti e toe fai: “O [igoa o le tamaitiiti] o se atalii o le Atua.”

Toe fai le gaoioiga mo tamaiti taitoatasi o le vasega pepe. Afai e toatele le vasega, e mafai ona aumai taitoalua i luma tamaiti pe faapuupuu le gaoioiga pe a manaomia.

Ata

Faaali atu le ata o loo i le itulau 10, tusi i se tamaitiiti i le ata, ma fesili atu, “O se atalii o le Atua le tagata lea?” Lue lou ao ma fai atu ioe. Toe fai ma saga fai mo tamaiti taitoatasi o loo i le ata. Ona tusi lea ia te oe lava ma fesili, “O a’u o se afafine o le Atua?” Lue lou ao ma fai atu ioe. Faamamafa atu o tagata uma lava o atalii ma afafine o le Atua ma Na te silafia ma alofa ia i tatou uma.

Faaiuga

Faasoa atu lau molimau o i tatou uma lava o fanau a le Atua ma e silafia ma alofa o Ia ia i tatou.

Tatalo

Valaaulia se tamaitiiti e faia le tatalo faaiu.

Motugaafa Faafaiaoga

Pese: Faaaoga musika e aoao ai mataupu faavae o le talalelei ma valaaulia ai le Agaga. Atonu o le a taumafai nisi o tamaiti tou te pepese faatasi, ae o le toatele lava atonu o le a na o le matamata ia te oe o e pese. Latou te aoaoina pese i le faalogologo, ma latou te fiafia i pese e ui lava latou te le pepese.

Igoa: E fiafia tamaiti vasega pepe e faalogo i o latou lava igoa ma avea o se vaega patino o le lesona. Faaali atu i tamaiti e te alofa ia i latou e ala i le aoaoina o o latou igoa ma vivii i latou mo le auai i le gaoioiga.

Tatalo: Afai e manaomia e le tamaitiiti le fesoasoani e faia le tatalo, fai i ai fasi fuaiupu pupuu ma faigofie e mulimuli mai ai. Atonu e mafai e tamaiti matutua ona tatalo e faaaoga ai a latou lava upu.

Gaoioiga e Filifili Ai

Sauniuniga

• Mo le gaoioiga i le pepa lautele o i ai se savali: Valaaulia matua e aumai se ata o a latou fanau i le vasega pepe (atonu na latou aumaia lea ata ina ua faatoa ulufale mai le tamaitiiti i le vasega pepe; tagai itulau 7. I le pito i luga o se pepa lautele, tusi ai, “O A’u o se Atalii o le Atua.” Tuu se avanoa tele mo ata o tamaiti.

• Mo le gaoioiga e fai i le ata tusi: Kopi le ata tusi o i le itulau 11 ina ia tofu le tamaitiiti ma le ata.

  

  O A’u o se Atalii o le Atua

Fuaiupu o Gaoioiga

Valaaulia tamaiti e tutu i luga ma ia outou faia faatasi le fuaiupu o gaoioiga lea:

Afai e te umi umi lava, (falo ma aapa lima i luga)

E silafia ma alofa le Tama Faalelagi ia te oe.

Afai e te matua laitiiti lava, (faapupuu i lalo)

E silafia ma alofa le Tama Faalelagi ia te oe.

Umi, (falo i luga)

Laitiiti, (faapupuu i lalo)

Umi, (falo i luga)

Laitiiti, (faapupuu i lalo)

E silafia ma alofa le Tama Faalelagi ia i tatou uma.

Pepa lautele o i ai se savali

Faapipii ata o tamaiti i le pepa lautele ua e saunia. Faitau le ulutala o le pepa lautele i tamaiti ma faamanatu ia i latou o i tatou uma lava o fanau a le Atua. Ia faapipii i luga le pepa lautele i vaiaso taitasi ma faaopoopo i ai ata o tamaiti e faaopoopo mai i le vasega pepe.

Ata tusi

Tufa atu i tamaiti taitoatasi se kopi o se tasi o ata tusi o loo i le itulau 11. Valaaulia tamaiti e faasino i vaega eseese o foliga (e pei o mata, gutu, ma isi). Ia valivali e tamaiti ata tusi, pe a mananao ai.

Motugaafa Faafaiaoga

Faia o kopi: Afai e le o i ai se masini e fai ai kopi, e mafai ona e tuuina se pepa lanutasi i luga o le ata tusi e lolomi mai ai le ata.

Valivali: E le fiafia tamaiti uma i le valivali. O nisi e na o le faia lava o se maka se tasi pe lua i luga o le pepa. O le faamoemoega o ata tusi o loo i nei lesona, ia maua ai e tamaiti se ata vaaia o le lesona e mafai ona latou o ma ave i le fale. E le taua le faapea ia latou valivaliina faalelei le ata tusi.