18

O Le a Ou Alofa Atu i Isi

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

O le alofa atu i isi, e oo lava ia i latou e ese mai ia i tatou, o se tasi lea o auala sili ona taua e mafai ona tatou mulimuli ai i le Faaola o Iesu Keriso (tagai Ioane 13:34–35). Tatou te faaali atu lo tatou alofa i isi e ala i lo tatou agalelei atu i ai, faalogo atu ia i latou, faamafanafana ia i latou, ma auauna atu ia i latou. (Tagai Mataio 25:34–40; Mosaea 18:8–9.)

Sauniuniga

• Faitau le Luka 10:25–37, ma ia saunia e faamatala le tala i le Samaria agalelei i se auala faigofie lava.

• Aumai se kopi o le Tusi Paia.

• Faailoga le itulau 74 i le tusi lesona lenei e faafaigofie ai ona e susue i ai.

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Ata

Faaali atu le ata o i le itulau 74. Faamalamalama atu o tamaiti o loo i nei ata o loo taaalo faatasi i se auala agalelei. A tatou agalelei atu i isi, o loo tatou faaali atu le alofa ia i latou.

Pese

Usu pe fai atu upu o le “Fetalai Mai Iesu e Alofa i Tagata Uma” (Tusipese a Tamaiti, 39) ma fai taga o loo i lalo. Valaaulia tamaiti tou te faia faatasi

Fetalai mai o Iesu; (fofola lautele lima)

Ia alofa atu.

E alofagia ai oe, (tuu le lima i luga o le fatu)

E tagata uma. (fusi oe lava)

Tala mai Tusitusiga Paia

Faaali atu le ata o le Samaria agalelei i le itulau 78. Susu’e le Tusi Paia ma ta’u i tamaiti o le a e faasoa atua se tala sa faamatala e Iesu e uiga i le alofa atu i isi. I le faaaoga ai o gagana faigofie, faamatala le tala o le Samaria agalelei. O loo i lalo se faataitaiga:

I se tasi aso na i ai se tagata sa taatia i luga o le palapala (faasino i le tagata manua i le ata). Na manua o ia. Sa savavali mai ni tagata se toalua. Sa la vaai atu i le tagata o taatia, ae e le i fesoasoani i ai i laua. Sa sau se tagata lona tolu (faasino i le Samaria agalelei i le ata). Sa vaai o ia i le tagata o loo taatia i luga o le palapala, ma fesoasoani i ai. Sa faaali atu e ia le alofa.

Faatinoga Faataitai

Ta’u i tamaiti na fetalai mai Iesu e tatau ona tatou faaali atu foi le alofa. Valaaulia i latou e faafoliga o loo savavali, ma tuu atu se avanoa e faaali atu ai le alofa i isi. Mo se faataitaiga:

Tatou savalivali (savavali i o outou tulaga). Vaai, ua pau i lalo le tatou uo. Tatou fesoasoani i le tatou uo e toe tu i luga (faafoliga o loo fesoasoani i le uo e tu i luga). Tatou savalivali pea. Ua tatou vaai atu i se uo o loo fiainu lava. Tatou avatu ia te ia se ipu vai (faafoliga e avatu vai). Tatou savavali pea. Ua tatou vaai atu ia mama ma papa. Tatou fusi ia i laua ma faapea atu, “Ou te alofa ia te oulua” (fusi oe lava ma faapea atu, “Ou te alofa ia te oulua”).

Faaiuga

Ta’u moni atu lava i tamaiti e te alofa ia i latou. Fai i ai e te matua lagona lava le fiafia pe a e faaalia le alofa mo isi.

Tatalo

Valaaulia se tamaitiiti e faia le tatalo faaiu.

Motugaafa Faafaiaoga

Sauniuniga: “A o tatou aoaoina atu le talalelei, e tatau ona tatou iloaina ma le lotomaualalo o le Agaga Paia o le faiaoga moni lea. O lo tatou faamanuiaga o le auauna atu lea o ni meafaigaluega e mafai ai e le Agaga Paia ona aoao mai, molimau, faamafanafana, ma musuia. O lea la e tatau ai ona tatou agavaa e mauaina le Agaga.… A o e saunia oe faaleagaga ma faailoa atu le Alii i lau aoaoga, o le a avea oe ma se meafaigaluega i Ona aao. O le a faalauteleina e le Agaga Paia au upu ma le mana” (O Le Aoao Atu, E Leai Se Isi Valaauga e Sili Ai, 43).

Tusitusiga Paia: Faaaoga ia tusitusiga paia a o e aoaoina tamaiti. Pe a e faamatalaina se tala mai tusitusiga paia, faasino i le vaega o tusitusiga paia o loo maua ai le tala. Aoao tamaiti ia latou talisapaia ma faaaloalo i tusitusiga paia.

Faaiuga: Ia ataata a o e ta’u atu i tamaiti e te alofa ia i latou. Vaai sa’o i o latou mata. O lagona e faaali atu i ou foliga ma au faatinoga o le a sili atu ona iloa ai e tamaiti lou alofa nai lo au upu.

Gaoioiga e Filifili Ai

Sauniuniga

• Mo le gaoioiga i le mau: Aumai se kopi o le Tusi Paia. Faailoga le Ioane 15:12 e faafaigofie ai ona e susue i ai.

• Mo le gaoioiga valivali ma le gaoioiga i le fatu: Kopi le ata tusi o i le itulau 79 mo tamaiti taitoatasi e valivali.

  

  O Le a Ou Alofa Atu i Isi

Mau

Ta’u i tamaiti ua tatou iloa mai tusitusiga paia na aoao mai i tatou e Iesu ia tatou fealofani. Faitau le Ioane 15:12 ma fai taga o loo i lalo. Valaaulia tamaiti tou te faia faatasi

O la’u poloaiga lenei,

Ia outou fealofani, (tuu lima e lua i luga o le fatu) pei ona ou alofa atu ia te outou (fofola lautele lima)

Valivali

Ia valivali e tamaiti se kopi o le ata tusi o i le itulau 79. A o valivali i latou, fesoasoani ia i latou ia malamalama o i tatou uma lava o fanau a le Atua ma e faapitoa i tatou uma lava taitoatasi. Faamanatu ia i latou e finagalo le Tama Faalelagi ma Iesu ia tatou fealofani.

Gaoioiga i le Fatu

Faitau faataitaiga ia (pe faia ni au lava faataitaiga), ma fesili atu, “E faaalia i le mea lea le alofa?” A maea faataitaiga taitasi, fai i tamaiti e uu i luga a latou fatu pepa ma faapea atu, “Alofa.”

Pe a e fesoasoani e faamama mea uma.

Pe a e fai atu “faamolemole” ma le “faafetai lava.”

Pe a e faasoa atu au mea taalo.

Pe a e fesoasoani i se tasi ua manua.

Vivii tamaiti mo le auai i le gaoioiga. O lenei gaoioiga e fetaui lelei lava mo tamaiti matutua.

Motugaafa Faafaiaoga

Valivali: O tamaiti laiti atonu o le a le mafai ona latou valivali i totonu o laina. Atonu o le a na o le fiafia i le faia o ni faailoga se tasi pe lua i luga o le pepa. Ia e fiafia e faamalo atu ia latou taumafaiga e aunoa ma le toe fai atu ia i latou e valivali faapea ma faapea. O le faamoemoega o le ata tusi i le tusi lesona lenei ia maua ai e tamaiti se ata vaaia o le mataupu faavae o loo i le lesona.