E Alolofa le Tama Faalelagi ma Iesu Keriso Ia te A’u

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

O le Tama Faalelagi ma Iesu Keriso e atoatoa lo Laua alofa mo i tatou taitoatasi. Na alolofa i Laua ia i tatou ae tatou te le i o mai i lenei lalolagi; O loo faaauau pea ona alolofa i Laua ia i tatou; ma o le a le suia lava lo Laua alolofa silisili mo i tatou. I le taimi o Lana misiona i le lalolagi, na faaalia ai e le Faaola lona alofa silisili faapitoa mo tamaiti laiti (tagai Mataio 18:5, 10; Mareko 10:13–16; 3 Nifae 17:11–24).

Sauniuniga

Faitau le 3 Nifae 17:11–12, 21–24 ma ia saunia e otooto le tala lenei mo tamaiti.
Aumai se kopi o le Tusi a Mamona.

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Aoaoga o Mataupu Faavae

Ta’u i tamaiti e te alofa ia i latou, ma talanoa puupuu i isi tagata e alolofa ia i latou, e pei o o latou matua, tuagane ma tuafafine, matua matutua, ma isi. Ona faamalamalama lea e toalua isi tagata e sili atu le alolofa ia i latou nai lo se isi lava—o le Tama Faalelagi ma Iesu Keriso. Ta’u i tamaiti, “E silafia outou e le Tama Faalelagi ma Iesu. E silafia e i Laua o outou igoa, ma e alolofa i Laua ia te outou.” Tusi i se tasi o tamaiti, ma faapea atu, “E alolofa le Tama Faalelagi ma Iesu ia [igoa o le tamaitiiti].” Toe faia mo tamaiti taitoatasi.

Fuaiupu o Gaoioiga

Tauloto le fuaiupu o gaoioiga lea ma valaaulia tamaiti tou te faia faatasi:

E iloa a’u e le Tama Faalelagi (tusi ia te oe lava)
Ma mea ou te fiafia e fai.
Na te iloa lou igoa ma le mea ou te nofo ai. (tuu faatasi tumutumu lima e faafoliga i se fale)
 Ou te iloa foi e alofa o Ia ia te au. (fusi oe lava)

Tala mai Tusitusiga Paia

Faaali le ata o i le itulau 22. Ta’u i tamaiti ua tatou aoao i tusitusiga paia e alofa Iesu i tamaiti laiti. Susue le Tusi a Mamona ma otooto faapuupuu le tala ia Iesu Keriso o loo faamanuiaina tamaiti sa Nifae (3 Nifae 17:11–12, 21–24). O loo i lalo se faataitaiga:

Sa aoao e Iesu tagata (tusi ia Iesu i le ata). Sa fetalai atu o Ia ia i latou e aumai a latou fanau laiti ia te Ia (tusi i tamaiti i le ata). Sa nonofo i latou i lalo e siosio o Ia, ma sa tootuli Iesu ma tatalo (ia tootutuli tamaiti ma punonou o latou ulu). Ona Ia faamanuia lea o tamaiti taitoatasi. Na faia e Iesu lea mea aua e alofa o Ia i tamaiti laiti (ia fusi e le tamaitiiti ia lava).

Pese

Usu pe fai atu upu ia o le pese “Le Alofa o Lo’u Faaola” (Tusipese a Tamaiti, 42–43) ma faia taga o loo taua i lalo. Valaaulia tamaiti tou te faia faatasi.

Le Alofa o Lo’u Faaola (tuu lima i luga o le fatu)
Siomia ai a’u i mea uma. (faaloloa faalautele lima) …
Le Alofa o Lo’u Faaola, (tuu lima i luga o le fatu)
Foa’i fua mai ia a’u. (tusi ia te oe lava)

Faaiuga

Faasoa atu i tamaiti lau molimau e alolofa le Tama Faalelagi ma Iesu ia i latou taitoatasi. Ia toe faia e tamaiti le faaupuga, “E alofa le Tama Faalelagi ma Iesu ia te a’u,” fai auauai ni nai upu i le taimi.

Tatalo

Valaaulia se tamaitiiti e faia le tatalo faaiu.

Motugaafa Faafaiaoga

Folasaga: O le suesueina o mau o loo lisiina i le vaega “Folasaga mo le Faiaoga” o se auala lelei lea e valaaulia ai le Agaga i le sauniuniga o lau lesona (tagai O Le Aoao Atu, E Leai Se Isi Valaauga e Sili Ai, 14–15).

Taga: Atonu e te finagalo e faaalu sina taimi e talanoa ai i ni taga e o faatasi ma le pese po o fuaiupu o gaoioiga. Mo se faataitaiga, e mafai ona e faamalamalama atu a tuu faatasi tumutumu o o latou tamatamai lima (laina 3 o le fuaiupu o gaoioiga lenei) ua latou faia le faatusa e foliga i le tumutumu o se fale, ma e talafeagai le taga lea ma upu “mea ou te nofo ai.”

Pese: Afai e umi tele se pese po o se fuaiupu o gaoioiga mo tamaiti o lau vasega, faaaoga tau o se vaega o le pese po o le fuaiupu.

Tamaiti laiti: Ina ia fesoasoani i tamaiti laiti e faalogo lelei ma auai i le gaoioiga, e mafai e le tasi taitai o le vasega ona tuuina atu ia i latou se fesoasoaniga faaopoopo ma vaavaai i latou a o aoao atu le isi taitai o le vasega.

Gaoioiga e Filifili Ai

Sauniuniga

Mo le gaoioiga i le faata: Aumai se tamai faata e lava le lapoa e iloa atu ai e tamaiti o latou foliga.
Mo le gaoioiga e fai i ata: Aumai ni ata se fa pe lima o mea ua faamanuiaina ai i tatou e le Tama Faalelagi, e pei o se aiga, o se fale, laau, o tusitusiga paia, ma isi. E mafai ona e faaaoga ata mai mekasini a le Ekalesia, kopi o ata mai le tusi lenei, po o ata faigofie ua e tusia lava e oe.
Mo le gaoioiga valivali: Kopi ma ooti ese le ata tusi o i le itulau 23 mo tamaiti taitoatasi e valivali (tasi le li’o mo le tamaitiiti e taitoatasi). Tui se vulu po o se manoa i le pito i luga o li’o taitasi e faia ai se ula.

E Alolofa le Tama Faalelagi ma Iesu Keriso Ia te A’u

Gaoioiga i le Faata

Ia nonofo tamaiti i se li’o. Fealuai solo oe i totonu o le li’o ma le faata, ma faatilotilo tamaiti taitoatasi i o latou foliga. A o tilotilo tamaiti taitoatasi i le faata, fai i le tamaitiiti e ta’u lona lava igoa (pe a mafai e le tamaitiiti). Ona e fai atu lea, “E alolofa le Tama Faalelagi ma Iesu ia [igoa o le tamaitiiti].”

Ata

Faapipii solo i totonu o le potu ata na e aumaia. Ta’u i tamaiti ua tuuina mai e le Tama Faalelagi ma Iesu Keriso faamanuiaga e tele aua e alolofa i Laua ia te i tatou. Valaaulia i latou tou te savavali faatasi atu i se tasi o ata, ma fesoasoani ia i latou e ta’u mai le faamanuiaga o loo faaalia i le ata. Valaaulia i latou e faia se gaoioiga e fesootai ma lena faamanuiaga (faafoliga o faitau tusitusiga paia, faafoliga o oe o se laau, ma isi). Toe faia mo isi ata.

Fuaiupu o Gaoioiga

Tauloto le fuaiupu o gaoioiga o loo i le itulau 9.

Valivali

Ia valivali e tamaiti ula na e saunia mo i latou. Faitau atu ia i latou upu o i luga o le ata.