27

E Fesoasoani le Faamanatuga ia te A’u Ou te Mafaufau ai ia Iesu Keriso

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

I le po a o lumanai Lona maliu i luga o le satauro, na tuuina atu ai e Iesu Keriso le faamanatuga i Ona Soo ma fetalai atu, “Tou te faia le mea nei e fai ma faamanatuga ia te au” (tagai Luka 22:19–20). Ina ua mavae Lona Toetu, na Ia faia foi le faamanatuga i sa Nifae (tagai 3 Nifae 18:1–11). O aso nei ua tatou aai ma feinu i le faamanatuga e faamanatu ai le taulaga a le Faaola mo i tatou. Tatou te molimau atu i le Atua o le a tatou manatua pea Iesu Keriso ma tausi i Ana poloaiga. (Tagai MFF 20:77, 79.)

Sauniuniga

• O le faatagaga mai le epikopo po o le peresitene o le paranesi, e aumai ai ni fata faamanatuga i le vasega pepe.

• Aumai se kopi o le Tusi Paia. Faailoga le Luka 22:19 e faafaigofie ai ona e susue i ai. Ia faailoga foi le itulau 106 i le tusi lesona lenei.

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Pese

Faaali atu le ata o Iesu i le itulau 106 a o e usuina le laina muamua o le “Ia Migao Filemu” (Tusipese a Tamaiti, 11):

Ia migao filemu, ma manatu ia Iesu. (faasino i le ata o Iesu)

Toe fai mo ni nai taimi ia fesoasoani ai ia maua se agaga migao. Valaaulia tamaiti tou te pepese faatasi.

Mau

Fai i tamaiti o Aso Sa uma lava tatou te faia ai se mea e matua faapitoa lava e manatua ai Iesu—i le taimi o le faamanatuga tatou te aai ai i se fasi falaoa laitiiti ma inu se ipu vai laitiiti. Fai i ai o le mea lena e ta’u o le faamanatuga. Valaaulia tamaiti e ta’u le upu “faamanatuga.” Ta’u i tamaiti tatou te aoao i totonu o tusitusiga paia e manao Iesu ia tatou aai ma feinu i le faamanatuga e manatua ai o Ia. Susu’e le Tusi Paia i le Luka 22:19 ma faapea atu, “Ua fetalai mai Iesu, ‘Tou te faia le mea nei e fai ma faamanatuga ia te au.’”

Ata

Faaali atu le ata o se tiakono o loo tufa le faamanatuga (itulau 114). Faasino i vaega o le ata, e pei o le tiakono ma tagata o loo nonofo filemu. Ia uu e tamaiti ia fata faamanatuga na e aumaia a o e faamalamalamaina atu i upu faigofie mea e faia i le faatinoina o le faamanatuga— tatou te faalogo ma le filemu a o faamanuiaina le faamanatuga; tatou te aveina le fasi falaoa e tasi; tatou te inuina le vai ma toe tuu le ipu i totonu o le fata; ma tatou mafaufau ia Iesu.

Fuaiupu o Gaoioiga

Tauloto le fuaiupu o gaoioiga lea, ma valaaulia tamaiti tou te faia faatasi:

Ou te ai filemu i le areto (faafoliga o ai le falaoa)

Ma inu foi le vai. (faafoliga o inu le vai)

Ou te piilima ma mafaufau ia Iesu— (piilima lima)

O le mea lea e tatau ona ou fai. (luelue le ulu i luga ma lalo)

[M. W. Verbica, “The Sacrament,” Friend, Fep. 1995, 17]

Faaiuga

Faaali atu le ata o Iesu i le itulau 106. Fesili i tamaiti, “O ai e tatau ona tatou mafaufau i ai pe a tatou aai i le faamanatuga?” Valaaulia tamaiti e fai mai, “Iesu.”

Tatalo

Valaaulia se tamaitiiti e faia le tatalo faaiu.

Motugaafa Faafaiaoga

Faaaloalo: Faaaoga se leo filemu ma ni uiga faaaloalo e fesoasoani ai ia malamalama tamaiti e paia le faamanatuga.

Uuina o mea faitino: O tamaiti laiti e faigofie ma tuusao o latou mafaufau. E le malamalama latou i manatu e le faitino. O le tuuina atu ia i latou o ni mea faitino e mafai ona latou uuina e faatatau i le lesona e fesoasoani lea ia i latou e aoao ai. Tautuana ia latou uuina fata faamanatuga ma le migao ma le faaaloalo. E le tatau ona i ai se falaoa po o se vai i luga o fata faamanatuga mo lenei gaoioiga.

Gaoioiga e Filifili Ai

Sauniuniga

• Mo le gaoioiga i se tagata asiasi atu: Fuafua ia i ai se tasi e umia le Perisitua Arona e auai atu i le vasega pepe ma talanoa mai pe faapefea ona fesoasoani o ia i le tufaina o le faamanatuga.

• Mo le faatinoga faataitai ma le taaloga: Kopi kata o i le itulau 115. Valivali kata, pe a mananao ai, ma oti ese.

  

  E mafai ona ou faalogo a o faia tatalo o le faamanatuga.

  E mafai ona ou mafaufau ia Iesu pe a ou ai i le areto.

  E mafai ona ou mafaufau ia Iesu pe a ou inu i le vai.

  E fesoasoani le faamanatuga ou te mafaufau ai ia Iesu.

• Mo le tusi: Kopi ma oti ese ia kata o i le itulau 115 mo tamaiti taitoatasi. Aumai sina vulu po o se manoa.

Tagata Asiasi

Faailoa atu la outou tagata asiasi i tamaiti. Faamalamalama atu o loo ia te ia le perisitua. Talosaga ia te ia e talanoa puupuu e uiga i le faiga na te saunia ai, faamanuiaina, ma tufatufa atu ai le faamanatuga. Valaaulia o ia e faasoa mai ona lagona e faatatau i le faamanatuga.

Faatinoga Faataitai

Uu taitasi ae i luga kata na e saunia. Faitau faamatalaga o loo i le kata ma fai i tamaiti e faafoliga o loo latou faia mea o loo faaali mai i ata (mo na o kata muamua e tolu). Mo se faataitaiga, ia piilima o latou lima ma punonou o latou ulu ma faafoliga o loo fetagofi ma le faaaloalo i le areto ma le vai. Vivii i latou mo lo latou taumafai i taimi uma lava. A e tuuina i luga le ata o Iesu, fesili atu i tamaiti, “O ai e tatau ona tatou mafaufau i ai pe a tatou aai ma feinu i le faamanatuga?”

Taaloga

Tuu faafao le kata na e saunia i luga o le fola po o luga o se laulau. Valaaulia se tamaitiiti e liliu i luga se tasi o kata. Faitau faamatalaga o loo i le kata. Toe fai seia tofu avanoa uma tamaiti o e mananao ai.

Tusi

Ave i tamaiti taitoatasi kata tai fa na e saunia mo i latou. Faapu le tulimanu o kata taitasi. Tui se vulu po o se manoa i pu, ma nonoa manoa e fai ai se tamai tusi mo tamaiti taitoatasi. Ona faitau lea o le tusi i tamaiti.

Motugaafa Faafaiaoga

Tatalo: Atonu e tatau ona e faia le tatalo amata ma le tatalo faaiu i nisi taimi ia faaali atu ai i tamaiti le auala e tatalo ai. E tele lava mea latou te aoaoina mai i au faataitaiga e pei lava o mea e te aoaoina atu ia i latou.

Faaaloalo: A e fesili atu i tamaiti po o ai e tatau ona tatou mafaufau i ai i le taimi o le faamanatuga, o nisi o i latou o le a feei mai le tali. Afai e faapea, aoao lemu lava i latou e faaaoga ma le migao le suafa o Iesu Keriso.

Fetuutuunai gaoioiga ia talafeagai ma ou manaoga ma punaoa. Mo se faataitaiga, afai e leai sau vulu po o se manoa e faaaoga mo lenei gaoioiga, e mafai ona faaaoga se isi auala e faamau faatasi ai kata. Pe e mafai ona valivali e tamaiti ata e aunoa ma le tau faia ai o ni tusi.