3

E Mafai Ona Ou Tatalo i le Tama Faalelagi

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

O le tatalo e mafai ai ona tatou talanoa ma lo tatou Tama Faalelagi. Tatou te ta’u atu ia te Ia tatou te alolofa ia te Ia, tatou te faafetai ia te Ia mo faamanuiaga, ma tatou te talosaga atu mo se fesoasoani mo i tatou lava faapea isi o loo manaomia le fesoasoani. Tatou te faaiuina a tatou tatalo i le suafa o Iesu Keriso. O le tatalo o se tasi lea o faamanuiaga maoae ua tatou maua a o tatou i ai i le lalolagi. (Tagai Mataio 6:9–13; Alema 34:18–27; 3 Nifae 18:19–21.)

Sauniuniga

• Aumai ni nai aitema laiti po o ata e faailoa mai ai mea tatou te faafetai ai (e pei o lavalava, meaai, tusitusiga paia, ma isi) i se taga lapoa. Tusi i luga o le taga “Matou Te Faafetai Ia Te Oe.” Aumai se isi taga e i ai aitema po o ata e faailoa mai ai mea tatou te ono talosagaina i se tatalo (e pei o se aiga fiafia, tino malolosi, alofa, ma isi. Tusi i luga o le taga lenei “Faamolemole Faamanuia i Matou”.

• Faailoga le itulau 106 i le tusi lesona lenei e faafaigofie ai ona e susue i ai.

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Ata

Faaali atu le ata o le tamaitiiti o Iesu o loo tatalo (itulau 18). Ta’u i tamaiti o se ata lea o Iesu o loo tatalo a o laitiiti o ia. Faaali atu le ata o le tamaitiiti o loo tatalo (itulau 18). Faamalamalama atu a tatou tatalo o loo tatou talanoa i le Tama Faalelagi; tatou te amata i le fai atu, “Lo Matou Tama Faalelagi.” Valaaulia tamaiti e fai mai, “Lo Matou Tama Faalelagi.”

Ta’u i tamaiti o le mea e sosoo ai o lo tatou faafetai ia te Ia mo o tatou faamanuiaga. Ia filifili e se tamaitiiti se aitema mai le taga o loo faailogaina “Matou te Faafetai Ia te Oe.” Fai atu, “Matou te Faafetai Ia te Oe mo o matou [ta’u le igoa o le aitema na filifilia e le tamaitiiti]. Valaaulia tamaiti e fai mai, “Matou te Faafetai Ia te Oe.” Toe faia lenei gaoioiga seia maea ona filifilia uma aitema. Ona ta’u lea i tamaiti o le mea e sosoo ai o le tatou ole atu i le Tama Faalelagi mo faamanuiaga, ma toe fai le gaoioiga i le taga ua faailogaina “Faamolemole Faamanuia i Matou.” Valaaulia tamaiti e fai mai, “Faamolemole Faamanuia i Matou.”

Faaali atu le ata o Iesu i le itulau 106. Ta’u i tamaiti tatou te faaiuina a tatou tatalo i le fai atu, “I le suafa o Iesu Keriso, amene.” Valaaulia tamaiti e fai mai ia te oe.

Fuaiupu o Gaoioiga

Tauloto le fuaiupu o le gaoioiga lea ma valaaulia tamaiti tou te faia faatasi:

E amata i le “Tama oi le Lagi;” (sii i luga le tamatamai lima e tasi—taofi ai i luga seia maea le fuaiupu o gaoioiga)

Faafetai mo manuia; (sii i luga le tamatamai lima lona lua)

Ona ole ai lea mo mea e manao ai, (sii i luga le tamatamai lima lona tolu)

I le suafa o Iesu Keriso, amene. (sii i luga le tamatamai lima lona fa)

[“Ou te Tatalo i le Faatuatua,” Liahona, Mati 1991, U5]

Faaiuga

Faamanatu i tamaiti a latou tatalo o loo latou talanoa atu i le Tama Faalelagi. Faasoa atu lau molimau e faafofoga mai le Tama Faalelagi ia tatou tatalo.

Tatalo

Valaaulia se tamaitiiti e faia le tatalo faaiu.

Motugaafa Faafaiaoga

Tatalo: E tele ni mea e mafai ona e faia e fesoasoani ai i tamaiti e lagona le faaaloalo a o sauni i latou mo le tatalo. Mo se faataitaiga, faamanatu ia i latou e nonofo filemu ma piilima. E mafai foi ona e aoaoina le gagana o le tatalo, ma fesoasoani ia i latou e faaaoga upu faaaloalo e pei o le i Lau Afio, o Lau Afio, ma le a Lau Afio e suitulaga i le oe ma le lou. Faaaoga pea a latou lava upu seia latou aoaoina upu faaaloalo ia, e mafai foi ona e fesoasoani ia i latou a o latou tatalo.

Valaaulia o ni tali: O le maualuga o le leo, fevaaiai o mata, ma amioga e taua pe a aoao atu. A talosaga atu mo se tali, tilotilo i tamaiti, ma i se leo faamalosiau fai atu se tala faapea, “E mafai ona e fai mai, ‘Matou te Faafetai i Lau Afio?” Vivii tamaiti i lo latou auai i le gaoioiga.

Molimau: Faailoa atu lau molimau i se auala faigofie ma maoti; mo se faataitaiga: “Ou te iloa e faafofoga le Tama Faalelagi ia tatou tatalo.”

Gaoioiga e Filifili Ai

Sauniuniga

• Mo le gaoioiga i le tusi susue: Kopi le ata tusi o i le itulau 19. Valivali pe a manao ai. Faia se tusi susue i le ’oti lea i le laina solo atoa ma gagau i le laina togitogi.

  

  E amata i le “Tama oi le Lagi.”

  Faafetai mo manuia

  Ona ole ai lea mo mea e manao ai

  I le suafa o Iesu Keriso, amene.

  E Mafai Ona Ou Tatalo i le Tama Faalelagi

• Mo le tala mai tusitusiga paia: Faitau le Enosa 1:1–8 ma saunia e otooto lenei tala mo tamaiti. Aumai se kopi o le Tusi a Mamona. Faailoga le Enosa 1 e faafaigofie ai ona e susue i ai.

• Mo le gaoioiga valivali: Kopi le ata tusi o i le itulau 19 mo tamaiti taitoatasi e valivali. ‘Oti i luga o laina solo atoa a o le i amataina le vasega.

Tusi susue

Toe fai faatonuga o loo i le itulau 16 e faatatau i tala tatou te faia pe a tatou tatalo, i le taimi la lenei faaaoga le tusi susue ua e saunia. A o e faamalamalama atu vaega taitasi o le tatalo, susue le itulau talafeagai pe valaaulia se tamaitiiti na te susueina le itulau. E mafai foi ona e faaaogaina le tusi susue a o outou taulotoina le fuaiupu o gaoioiga i le itulau 16. Atonu o le a e finagalo e teu le tusi susue e faaaoga i le vasega pepe i vaiaso o i luma.

Tala mai Tusitusiga Paia

Susue le Tusi a Mamona i le Enosa 1 ma faamatala i tamaiti le tala ia Enosa o loo tatalo. O loo i lalo se faataitaiga:

I se tasi aso na alu ai Enosa i le vao (tuu i luga lima o tamaiti e faapei o ni laau) e fanafana manu (ia faataitai o loo fanaina se a. ū). A o i ai o ia i le vao, sa tatalo ai i le Tama Faalelagi (ia tootutuli tamaiti e pei o loo tatalo; faauma le tala a o tootutuli i latou). Na tali e le Tama Faalelagi lana tatalo, ma sa fiafia Enosa. Na ia iloa o le a faamanuiaina o ia e le Tama Faalelagi.

Fai atu, “E Mafai Ona Ou Tatalo i le Tama Faalelagi.” Valaaulia tamaiti e faataitai faatasi ma oe, fai auauai ni nai upu i le taimi.

Valivali

Ia valivali e tamaiti se kopi o le ata tusi o i le itulau 19. A maea, gagau le pepa i luga o le laina togitogi.

Motugaafa Faafaiaoga

Tamaiti matutua: Mafaufau e valaaulia tamaiti matutua atu e fesoasoani ia te oe e aoao tamaiti laiti e tatalo. O se auala sili lea ona lelei e faamalosia ai le mataupu na e aoaoina.

Tala: A faatino e tamaiti ni mea na tutupu i se tala, e sili atu ona latou malamalama ai ma manatuaina. Manatua e le tatau ona faatinoina le Atua le Tama pe a faatinoina se tala. Aua foi le faatinoina Iesu Keriso vagana i se vaaiga o Lona fanau mai. (Tagai O Le Aoao Atu, E Leai Se Isi Valaauga e Sili Ai, 174–75.)

Valivali: A o valivali ata tamaiti, toe faamanatu mataupu faavae na aoaoina i le lesona. Ta’u atu faamatalaga o loo i ata ma faamalamalama i tamaiti mea o loo latou valivaliina. Faitau ia i latou upu o loo i luga o le ata tusi.