O Le a Ou Usiusitai

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

Ua tuuina mai e le Tama Faalelagi i matua le tiutetauave autu o le aoaoina o a latou fanau i poloaiga, saunia mea latou te manaomia faaletino ma le faaleagaga, ma puipuia i latou mai faalavelave. Ua Ia faamalosiau mai ia i tatou ia ava ma usiusitai i o tatou matua, ma Na te faamanuiaina i tatou i le saogalemu ma le fiafia pe a tatou faia o lea. (Tagai Esoto 20:12; Efeso 6:1–3; Kolose 3:20; “O Le Aiga: O Se Folafolaga i le Lalolagi,” Liahona, Iuni 1996, 10–11.)

Sauniuniga

Aumai se kopi o le Tusi Paia. Faailoga le Efeso 6:1 e faafaigofie ai ona e susue i ai.
Faailoga le itulau 106 i le tusi lesona lenei e faafaigofie ai ona e susue i ai.

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Faatinoga

Fai i tamaiti e faia ni faatinoga se lima pe ono, e pei o le tutu i luga, sii i luga lima, faataamilo, patipati o latou lima, ma le nonofo i lalo. Vivii i latou mo le usiusitai mai ia te oe.

Ata

Ia uu e se tamaitiiti le ata o i le itulau 62. Faasino i le tama ma le tina o i le ata. Faamalamalama atu o tama ma tina na fai i tamaiti e fesoasoani i le togalaau, ona fai mai lea o tamaiti, “O le a ou usiusitai.” Tusi i tamaiti i le ata ma faamamafa atu o loo fesoasoani i latou i o latou matua.

Mau

Ta’u i tamaiti e faapea, i totonu o tusitusiga paia tatou te aoao ai e finagalo le Tama Faalelagi ma Iesu Keriso ia tatou usiusitai i o tatou matua. Susu’e le Tusi Paia i le Efeso 6:1 ma faitau, “O outou le fanau, ia outou faalogo i o outou matua i le Alii: aua o le mea tonu lava lea.” Valaaulia tamaiti e fai mai, “O le a ou usiusitai .” (Manatua: Atonu o nisi o tamaiti o loo tausia e matua o matua po o isi tagata o aiga. Ia e nofouta i ia tulaga a o faia le lesona lenei.)

Pese

Valaaulia tamaiti e tutu i luga. Usu pe fai atu upu i le “E Vave Ona Ou Usitai” (Tusipese a Tamaiti, 71) ma fai ia taga o loo i lalo. Valaaulia tamaiti tou te faia faatasi

A valaau mai tina, faaofuofu lima i le gutu)
Ou te usitai. (tamo’emo’e filemu i lona tulaga)
Ou te manao e fai mea lelei (luelue le ulu i luga ma lalo)
I aso uma.

A valaau mai tama, (faaofuofu lima i le gutu)
Ou te usitai. (tamo’emo’e filemu i lona tulaga)
 Ou te manao e fai mea lelei (luelue le ulu i luga ma lalo)
I aso uma.

Tama oi le Lagi, (fusi oe lava)
Alofa ia a’u. (fusi pea oe lava a o feliuliuai mai lea itu i lea itu)
Ou te manao e fai mea lelei (luelue le ulu i luga ma lalo)
I aso uma.

Ata

Faaali atu le ata o Iesu i le itulau 106. Ta’u i tamaiti sa usitai Iesu i le Tama Faalelagi, ma e finagalo o Ia ia tatou usiusitai foi.

Faaiuga

Faasoa atu lau molimau o le a tatou fiafia pe a tatou usiusitai.

Tatalo

Valaaulia se tamaitiiti e faia le tatalo faaiu.

Gaoioiga e Filifili Ai

Sauniuniga

Mo le gaoioiga i mea faitino: Aumai se pusa, ato, po o se isi koneteina e i ai ni aitema laiti i totonu e mafai ona maua ai le puipuiga, e pei o le faamalu, seevae, pulou, peleue, po o totinilima. Taumafai ia tofu ia tamaiti ma se aitema.
Mo le gaoioiga i papeti: Kopi ma oti ese ia ata tusi o i le itulau 63 mo tamaiti taitoatasi e valivali. Faakelu pe faapipii ata i fasilaau po o taga pepa e fai ai papeti.

Faatinoga Faataitai

Fai ma faatino faatasi ma tamaiti mea ia:

Fai mai Mama, “Fai lou ofu, faamolemole.” Fai o tatou ofu (faafoliga o loo fai ofu).

Fai mai Papa, “Fufulu ou mata, faamolemole.” Fufulu o tatou mata (faafoliga o loo fufulu mata).

Toe fai mo isi faatinoga, e pei o le “ai le meaai,” “alu e moe,” ma isi. Vivii tamaiti mo le usiusitai.

Gaoioiga i Mea Faitino

Fai i se tamaitiiti e filifili se aitema se tasi mai le pusa ma faataitai. Talanoa i tamaiti e uiga i le ituaiga o puipuiga e maua mai i le aitema lena (mo se faataitaiga, o seevae e puipui ai o tatou vae mai le palapala po o le manua, o le faamalu e puipui ai tatou mai le susu i le timu po o le vevela i le la, ma isi). Faamalamalama atu o nei mea e puipui ai i tatou; e mafai foi ona tatou saogalemu ma fiafia pe a tatou usiusitai i o tatou matua.

Gaoioiga i Papeti

Ia valivali e tamaiti papeti ua e saunia. Faitau atu i ai tulaga faataitai nei (pe fai ni a oe lava tulaga faataitai). A maea vaaiga taitasi, faaaoga e tamaiti a latou papeti e tali atu ai, “O le a ou usiusitai.”

Fai mai Mama, “Ia agalelei i lou tuafafine, faamolemole.” O le a lau tala e fai?

Fai mai Papa, “Ua oo i le taimi e te moe ai, faamolemole.” O le a lau tala e fai?

Fai mai Tinamatua, “Sau e ’ai, faamolemole.” O le a lau tala e fai?

Fai mai le Faiaoga, “Tatou sauni mo le tatalo, faamolemole.” O le a lau tala e fai?

Fai mai Iesu, “Ia outou fealofani.” O le a lau tala e fai?

O lenei gaoioiga e fetaui lelei lava mo tamaiti matutua.