7

Na Faia e Iesu Keriso le Lalolagi mo A’u

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

I Lona galue ai i lalo o le taitaiga a le Tama Faalelagi, na faia ai e Iesu Keriso le lalolagi matagofie o loo tatou nonofo ai (tagai Mose 2:1). O le faamoemoega o le foafoaina o le lalolagi ina ia aumaia ai ia i tatou se nofoaga e mafai ai ona tofotofoina i tatou ma maua poto masani ina ia avea ai i tatou e faapei o lo tatou Tama Faalelagi (tagai Aperaamo 3:24–25). O le matagofie maoae o le lalolagi e molimau mai i le mana ma le alofa faasilisili o le Tama Faalelagi ma Iesu Keriso (tagai Mose 6:63).

Sauniuniga

Aumai se kopi o le Tusi Paia. Faailoga le Kenese 1:1 e faafaigofie ai ona e susue i ai.

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Pese

Usu pe fai atu upu o le pese “E Alofa Lo’u Tama Faalelagi Ia Te A’u” (Tusipese a Tamaiti, 16–17) ma faia taga o loo i lalo. Valaaulia tamaiti tou te faia faatasi:

Pe a ou faalogo i manulele (faaofuofu lima i le taliga)

Pe ou te vaai i le lagi, (vaai agai i luga, ma faafoliga e faapaolo mata i lou lima)

Pe a pa’u mai le timu ma (faapapai tamatamai lima i foliga)

Agi mai foi le matagi, (talotalo le lima)

Pe a ou tago i se rosa (faaofuofu faatasi lima)

Poo se laau manogi, (faaaoga tamatamai lima e lua e “savali” i luga o le isi lima)

Ou te faafetai mo le lalolagi (sisii lima i se li’o i luga ae o le ulu)

Ua fai e le Tama mo a’u. (tusi ia te oe lava)

Mau

Susue le Tusi Paia i le Kenese 1:1 ma faitau, “Na faia e le Atua le lagi ma le lalolagi i le amataga.” Valaaulia tamaiti tou te toe faia faatasi le mau, fai auauai ni nai upu i le taimi. Faamalamalama atu e faapea, o le Tama Faalelagi na faatonuina Iesu Keriso e faia le lalolagi ma mea uma lava o i ai; na faia foi e Iesu le la e maua ai e i tatou le malamalama. Valaaulia tamaiti e sii o latou lima i luga ae o o latou ulu i se li’o ma fai mai “la.”

Ta’u atu i tamaiti na faia e Iesu ia fetu tatou te vaai i ai i le po. Valaaulia tamaiti e tatala ma faamau o latou lima e pei o fetu la e emoemo ma fai mai “fetu.”

Ata

Faaali atu le ata o i le itulau 34. Tusi i laau ma ta’u i tamaiti na faia e Iesu laau. Valaaulia tamaiti e tutu ma sii maualuga o latou lima, ma faafoliga o ni laau o loo lue solo i le matagi. Valaaulia i latou e fai mai “laau.”

Tusi i manu o i totonu o le ata ma faamalamalama atu na faia e Iesu ia meaola. Valaaulia tamaiti e ta’u mai igoa o nisi o manu ma faataitai leo o manu.

Faaiuga

Faamalamalama atu o Iesu na faia nei mea uma aua e alofa o Ia ia te i tatou. Faailoa atu lou agaga faafetai mo lo tatou lalolagi matagofie.

Tatalo

Valaaulia se tamaitiiti e faia le tatalo faaiu..

Motugaafa Faafaiaoga

Pese: “O le toatele o tamaiti e fiafia e auai i gaoioiga faamusika. O fati malie o musika e fesoasoani i tamaiti e manatua ai … savali o upu. O musika e mafai foi ona faateleina ai le malamalama o tamaiti i mataupu faavae o le talalelei ma faamalosia ai a latou molimau” (O Le Aoao Atu, E Leai Se Isi Valaauga e Sili Ai, 183).

Tamaiti laiti: Afai ua lelavava tamaiti a o le i maea uma gaoioiga e aoao ai, e lelei lava le taofi o le lesona ae faia se gaoioiga e gaoioi ai tamaiti, e pei o le savalivali, luelue, po o le faagaoioi o o latou lima. A o faasolo ina matutua tamaiti, o le a mafai ona faalogo lelei mo ni taimi uumi.

Gaoioiga e Filifili Ai

Sauniuniga

• Mo le gaoioiga i le fatu: Aumai se ipu inu pepa mo tamaiti taitoatasi. Aumai foi ni palapala e tuu i totonu o ipu ma aumai ni nai fatu (e pei o pi, sana, po o isi fatu) mo tamaiti taitoatasi e totoina. I luga o ipu taitasi tusi ai, “Na Faia e Iesu Keriso Fatu mo A’u.” Saunia se faamatalaga e ave e tamaiti i le fale e faamatala ai le tausiga o le fatu.

• Mo le gaoioiga i le tusi: Faia se kopi o le itulau 35 mo tamaiti taitoatasi e valivali. Aumai se mea faapipii po o se kelu.

  

  Na Faia e Iesu Keriso le Lalolagi mo A’u

  Na faia e Iesu le la.

  Na Ia faia le masina ma fetu.

  Na Ia faia laau.

  Na Ia faia meaola.

  Na Ia faia manu felelei.

Pese

Usu pe fai atu upu o le “E Matagofie Le Lalolagi” (Tusipese a Tamaiti, 123) ma faia taga o loo i lalo. Valaaulia tamaiti tou te faia faatasi

E matagofie le lalolagi! (oomi pito o le gutu ia foliga ataata) Ua saunia e le Alii mo au nei—(tusi ia te oe)

Le la, (sii lima i se li’o i luga ae o le ulu) fugalaau, (faafoliga o sogisogi i se fugalaau)

ma fetu, (tatala ma toe tapuni lima e pei o fetu emoemo)

Se aiga e fiafia ai matou. (fusi oe lava)

Gaoioiga i le Fatu

Tuu sina palapala i ipu taitasi na e aumaia ma tuu i tamaiti taitasi e toto a latou fatu. A o latou faia, ta’u atu ia i latou afai e fui i vai a latou fatu ma tuu i le mea e susulu lelei mai i ai le la, o le a ola ia fatu e avea ma ni laau. Faamanatu ia i latou na faia e Iesu Keriso ia fatu, le palapala, le timu, ma le la. Ia tuu i matua latou te avea ipu a a latou fanau i le fale ina ia mafai ona latou vaavaai i le ola ae o le fatu. O le gaoioiga lenei e sili ona talafeagai mo tamaiti matutua.

Tusi

Ia valivali e tamaiti se kopi o le ata tusi o i le itulau 35. A o valivali i latou, toe faamanatu mea na e aoaoina atu i le lesona. A uma ona latou valivali, gagau le ata ma faapipii pe kelu e tusa ma faatonuga o loo i luga o le ata tusi. Ona faitau lea o le tusi faatasi ma tamaiti.

Motugaafa Faafaiaoga

Gaoioiga i le fatu: Afai e te filifili e faia le gaoioiga lea, tuu ipu palapala i se nofoaga saogalemu seia oo i le taimi e o ai tamaiti i le fale. Afai e faia le vasega pepe a o le i faia le sauniga faamanatuga, aua le aveina e tamaiti ipu palapala i totonu o le falelotu. Ae, ave ipu i matua pe a maea le sauniga faamanatuga.

Tusi: Mafaufau e fai se pusa o gaoioiga e tuu i le potu o le vasega. E mafai ona tuu ai le tusi na e faia mo le lesona lenei ma isi mea e te faia pe faaaoga mo isi gaoioiga. Ona mafai foi lea ona e toe faia gaoioiga na i vasega i le lumanai e toe faamanatu ai lesona ua maea. E mafai ona toe faamanatu i soo se taimi lava i le vasega pepe.