16

O Le a Ou Fai Atu “Ua Ou Sese”

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

Soo se taimi lava tatou te faia ai se mea leaga po o se mea sese, e tatau ona tatou ioe ua tatou sese ma taumafai e faasa’o (tagai Iakopo 5:16). O lo tatou naunautai e faamaualalo i tatou lava ma faatoese e mafai ona faamalulu ai loto ma saunia i tatou e o mai ia Keriso (tagai 3 Nifae 12:23–24).

Sauniuniga

• Faailoga le itulau 106 i le tusi lesona lenei e faafaigofie ai ona e susue i ai.

• Faitau le 1 Nifae 17:7–8, 17–19, 49–55; 18:1. Ia saunia e otooto le tala ia Nifae ma ona uso na fausia se vaa.

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Ata

Faaali atu le ata o Iesu Keriso i le itulau 106. Ta’u i tamaiti na aoao mai i tatou e Iesu i auala tatou te fiafia ai. Faamalamalama atu o le faia o upu agalelei e mafai ona fiafia ai i tatou ma faafiafia ai isi, a tatou faia se mea sese pe faia se mea e le lelei, e tatau ona tatou faaaoga upu agalelei: “Ua ou sese.” Valaaulia tamaiti e fai mai, “Ua ou sese.”

Pese

Usu pe fai atu upu o le tali o le pese “O Loo Ou Taumafai e Avea e Pei o Iesu” (Tusipese a Tamaiti, 40–41) ma fai ia taga o loo i lalo. Valaaulia tamaiti tou te faia faatasi

Ia fealofani e pei o Iesu. (fusi oe lava ma feliuliuai mai lea itu i lea itu)

Agalelei i mea uma e fai. (luelue le ulu i luga ma lalo)

I ou mafaufauga ia agamalu, (fusi oe lava ma feliuliuai mai lea itu i lea itu)

Ua aoao mai o Iesu. (luelue le ulu i luga ma lalo)

Tala mai Tusitusiga Paia

Faaali atu le ata o Nifae o loo fausia se vaa (itulau 70) ma faamatala le tala ia Nifae ma ona uso o loo fausia se vaa. O loo i lalo se faataitaiga:

O Nifae lea (tusi ia Nifae i le ogatotonu o le ata). Na fetalai le Alii ia Nifae e fausia se vaa. O se vaa e lapoa (faasino i le vaa i le ata). O uso ia o Nifae (tusi ia i latou i le ata). O nisi o i latou na faia upu le alofa ia Nifae ma lē fesoasoani ia te ia i le fausiaina o le vaa. Na faanoanoa Nifae (fai i tamaiti e faafoliga o loo faanoanoa). Mulimuli ane na faanoanoa ma faatoese uso o Nifae ma fesoasoani ia te ia e fausia le vaa. Ona toe fiafia ai lea o tagata uma (fai i tamaiti e faafoliga o loo fiafia).

Faamanatu i tamaiti a tatou fai atu, “Ua ou sese,” e mafai ona tatou fiafia ma fesoasoani i isi ia fiafia. Valaaulia tamaiti e fai mai, “Ua ou sese.”

Tala faatino

Fai i tamaiti e faafoliga o loo latou fesoasoani ia Nifae e fausia le vaa—tatipi laau, amo laau i le matafaga, tuitui i le samala ia fao i le laupapa, ma toso i luga le la o le vaa. Faia faatinoga, leo, ma gaoioiga e fesoasoani ina ia galulue ai tamaiti.

Faaiuga

Faasoa atu lau molimau faapea, e mafai ona tatou fiafia pe a tatou fai atu, “Ua ou sese.”

Tatalo

Valaaulia se tamaitiiti e faia le tatalo faaiu.

Motugaafa Faafaiaoga

Pese: Ina ia fesoasoani i tamaiti e aoao se pese, usu se fasi fuaiupu puupuu pe fai i tamaiti e faataitai mai ia te oe. Ona faataitai lea e i latou o se fuaiupu atoa ma faasolo atu ai i le pese atoa.

Tala: E aoao tamaiti i le fai soo o se gaoioiga. Toe faamatala tala e sili ona fiafia i ai tamaiti i soo se taimi lava o le vasega. O se auala malie lea e toe faamanatu ai ma tamaiti mea na latou aoaoina.

Tala faatino: O le faatinoina o tala mai tusitusiga paia e fesoasoani i tamaiti e malamalama ma manatua ai mea o loo e taumafai e aoao atu. (Tagai O Le Aoao Atu, E Leai Se Isi Valaauga e Sili Ai, 174–75.)

Gaoioiga e Filifili Ai

Sauniuniga

• Mo le taaloga taumatemate: Fai se kopi o le itulau 71, ma oti ese se tasi o li’o. Valivali pe a mananao ai. Aumai ni solosolo po o ni fasi ie se tolu.

  

  E mafai ona ou fiafia pe a ou fai atu “Ua ou sese.”

• Mo le gaoioiga i taulima: Kopi ma oti ese ia li’o o i le itulau 71 ina ia tofu uma ai tamaiti. Tui se manoa po o se vulu i le pu i le pito i luga o li’o taitasi e fai ai se taulima po o se ula mo tamaiti taitoatasi.

  

Taaloga Taumatemate

Tuu solosolo e tolu i luga o le fola. Fai i tamaiti e pupuni o latou mata a o e nanaina foliga na e oti maia i lalo o solosolo. Ia tofu le tamaitiiti ma le avanoa e susue ai i luga se solosolo seia latou maua le ata o foliga. Ona faitau lea o le faamatalaga o i lalo o le ata ma valaaulia i latou e faataitai mai ia te oe. Toe fai le taaloga seia tofu avanoa uma tamaiti o e mananao ai.

Tala

Faamatala ni tala faigofie e fesoasoani ai i tamaiti e fai atu, “Ua ou sese,” e pei o le:

• Na ave e se teineitiiti le mea taalo a lona tuagane. Na faanoanoa lona tuagane (fai i tamaiti e faauu). Ona fai mai lea o le teineitiiti, “Ua ou sese” ma toe faafoi le mea taalo (fai i tamaiti e fai mai, “Ua ou sese”). Na fiafia lona tuagane! (fai i tamaiti e ataata).

• Sa tamoe se tamaitiiti ma lāvea ai i lona tuafafine. Na faanoanoa lona tuafafine (fai i tamaiti e faauu). Ona fai mai lea o ia, “Ua ou sese” (fai i tamaiti e fai mai, “Ua ou sese”). Na fiafia lona tuafafine! (fai i tamaiti e ataata).

Toe fai mo isi faataitaiga.

Taulima

Tuu atu i tamaiti taitoatasi se taulima po o se ula e fai. Faitau ia i latou upu o loo i luga o le ata.

Motugaafa Faafaiaoga

Punaoa: Faaaoga tau lava o punaoa ua saunia e le Ekalesia i le vasega pepe. Afai e te manaomia nisi mea faaopoopo e faia e tamaiti, filifili mai tala, taaloga, papeti, po o gaoioiga valivali mai lenei tusi lesona pe mai mekasini a le Ekalesia. E mafai ona e faaaogaina soo nei gaoioiga pe a e manao ai, ma e mafai ona e aoaoina se lesona mo le lua pe tolu vaiaso sosoo.

Toe faia soo: Afai e faalogo tamaiti o fai soo se faaupuga, e mafai ona avea ma vaega o upu latou te faalogo i ai. Afai latou te tauina soo se faaupuga, e mafai ona avea ma vaega o upu latou te tautatala i ai.