5

Na Faailoa Mai e Iesu Keriso Ia i Tatou Le Auala e Alolofa Ai i Isi

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

Na faia e Iesu Keriso se faataitaiga atoatoa o le agalelei ma le alofa. I le taimi atoa o Lana misiona faalelalolagi, na faaalia ai e Iesu Lona alofa mo isi e ala i le faamanuiaina ma le auauna atu i e matitiva, i e mama’i, ma e faanoanoa. Na Ia fetalai atu i Ona soo, “O la’u poloaiga lenei, ia outou fealofani, pei ona ou alofa atu ia te outou” (Ioane 15:12; tagai foi Ioane 13:34–35; Moronae 7:46–48).

Sauniuniga

• Faailoga le itulau 22 i le tusi lesona lenei e faafaigofie ai ona e susue i ai.

• Aumai se kopi o tusitusiga paia.

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Pese

Ta’u i tamaiti a o soifua Iesu Keriso i le lalolagi, na Ia aoao i tatou e alolofa atu i isi; na Ia faailoa mai ia i tatou e ala i mea sa Ia faia. Usu pe fai atu le tali o le “O Loo Ou Taumafai e Avea e Pei o Iesu” (Tusipese a Tamaiti, 40–41) ma faia taga o loo i lalo. Valaaulia tamaiti tou te faia faatasi.

Ia fealofani e pei o Iesu. (fusi oe lava ma feliuliuai mai lea itu i lea itu)

Agalelei i mea uma e fai. (luelue le ulu)

I ou mafaufauga ia agamalu, (fusi oe lava ma feliuliuai mai lea itu i lea itu)

Ua aoao mai o Iesu. (luelue le ulu)

Tala mai Tusitusiga Paia

Faaali atu i tamaiti se kopi o tusitusiga paia. Tau atu ia i latou e faapea i totonu o tusitusiga paia tatou te aoao ai i auala na faaali ai e Iesu le alofa. Faamatala otooto atu i ai le tala lenei:

Tala 1 (faaali atu le ata tusi o i le itulau 27): E toatele tagata na o mai e faalogo o aoao atu Iesu. Sa latou i ai iina mo se taimi umi lava ma sa latou fia aai lava (ia faafoliga tamaiti o loo fia aai). Sa itiiti lava se areto ma ni i’a sa i ai e fafaga ai tagata uma lava. Sa faamanuia e Iesu le meaai ma fai atu i Ona soo e tufa atu i tagata. Sa tofu uma tagata, ma na tele foi meaai na totoe (ia faafoliga tamaiti o loo aai). (Tagai Mataio 14:13–21.)

Fai i tamaiti tou te faia faatasi, “Sa faailoa mai e Iesu ia i tatou le auala e alolofa ai i isi,” fai auauai ni nai upu i le taimi.

Na Faailoa Mai e Iesu Keriso Ia i Tatou Le Auala e Alolofa ai i Isi

Tala 2 (faaali atu le ata o i le itulau 26): I se tasi aso na iloa atu ai e Iesu se alii tauaso—sa le mafai ona pupula (fai i tamaiti e pupuni o latou mata). Sa faamanuia e Iesu le tamaloa ina ia mafai ona pupula (ia toe tatala mata o tamaiti). (Tagai Ioane 9:1–12.)

Fai i tamaiti tou te faia faatasi, “Na faailoa mai e Iesu ia i tatou le auala e alolofa ai i isi.”

Tala 3 (faaali atu le ata o i le itulau 22): Ina ua uma ona toetu Iesu, sa asiasi atu o ia i Sa Nifae. Talu ai ona sa alofa o Ia i tamaiti, sa Ia faamanuiaina ai i latou taitoatasi (ia fusi e le tamaitiiti ia lava). (Tagai 3 Nifae 17:21–24.)

Fai i tamaiti tou te faia faatasi, “Na faailoa mai e Iesu ia i tatou le auala e alolofa ai i isi.”

Pese

Toe usu pe fai atu le tali o le “O Loo Ou Taumafai e Avea e Pei o Iesu”. Valaaulia tamaiti tou te pepese ma faia taga.

Faaiuga

Faasoa atu lau molimau e mafai ona tatou alolofa i isi e pei ona faia e Iesu.

Tatalo

Valaaulia se tamaitiiti e faia le tatalo faaiu.

Motugaafa Faafaiaoga

Pese: E fiafia tele tamaiti i mea na latou vaai ma faalogo i ai muamua. Usu pe faia fuaiupu o gaoioiga mai le lesona lenei po o lesona ua tuanai i taimi o le vasega pepe. O lenei toe faamanatu o le a fesoasoani ia i latou e aoao ai pese ma manatua ai aoaoga faavae sa e aoaoina atu.

Tala: A o le i faamatalaina se tala, faitau soo le tala ina ia e masani ai. A o faamatalaina le tala, tilotilo sa’o i mata o tamaiti e fesoasoani ai ia faalogo lelei i latou. (Tagai O Le Aoao Atu, E Leai Se Isi Valaauga e Sili Ai, 191.)

O tamaiti laiti atonu o le a le mafai ona latou faia lenei fuaiupu. Fesoasoani ia i latou e faia upu autu e pei o “Iesu” ma le “alofa.”

Gaoioiga e Filifili Ai

Sauniuniga

• Mo le paso: Aumai se ata o le Faaola (e mafai ona e faaaogaina le ata o i le itulau 106 pe afai e te manao ai). Sue se fasipepa e tutusa le tele ma le ata (pe ‘oti se fasipepa ia tutusa le tele) ma otioti le pepa i ni vaega se tolu pe fa e faia ai se paso. Tusi i le pito i tua o fasipepa taitasi le [faaupuga] “O le a Ou Alofa Atu i Isi.”

  

• Mo le gaoioiga i mau: Aumai se kopi o le Tusi Paia. Faailoga le Ioane 15:12 e faafaigofie ai ona e susue i ai.

• Mo le gaoioiga i le ata tusi: Kopi le ata tusi o i le itulau 27 mo tamaiti taitoatasi.

Paso

Ufiufi le ata o Iesu i fasi paso. Fai atu i se tamaitiiti e filifili mai se fasi paso. Faitau le fuaiupu o loo i luga o le fasi paso ma ia fai faatasi e tamaiti. Talanoaina se auala se tasi e mafai ona tatou alolofa atu ai i isi (fai atu faafetai lava, faasoa atu, fai le mea e fai mai ai Tina ma Tama, teu mea taalo, ma isi). Toe faia mo isi fasi paso taitasi seia aliali uma mai le ata. Toe faamalosia le mau e faapea sa faailoa mai e Iesu ia i tatou le auala e alolofa ai i isi.

Mau

Ta’u i tamaiti e faapea i totonu o tusitusiga paia na aoao mai i tatou e Iesu ia tatou fealofani. Sue le Tusi Paia i le Ioane 15:12 ma faitau, “Ia outou fealofani.” Valaaulia tamaiti e tou te faia faatasi le fuaiupu.

Pese

Usu pe fai atu upu i le pese “Fetalai Mai Iesu e Alofa i Tagata Uma” (Tusipese a Tamaiti, 39) ma faia taga o loo i lalo. Valaaulia tamaiti tou te faia faatasi.

Fetalai mai o Iesu; (fofola lautele lima)

Ia alofa atu. (luelue le ulu)

E alofagia ai oe, (tuu le lima i luga o le fatu)

E tagata uma. (fusi oe lava)

Ata tusi

Tuuina atu i tamaiti taitoatasi se kopi o le ata tusi o i le itulau 27. Fesili i tamaiti e uiga i le ata tusi ma faamanatu ia i latou le tala ua uma ona e faamatalaina ia i latou. Mo se faataitaiga:

E mafai ona e iloa atu Iesu i totonu o le ata? (ia tusi lima o tamaiti ia Iesu i luga o a latou kopi o le ata tusi)

O a mea o loo i totonu o ato? (faafoliga o loo aai tamaiti)

Motugaafa Faafaiaoga

Gaoioiga e filifili ai: Ina ia tausisia le fiafia e auai ma aoao, ia feauauai le faalogologo ma gaoioiga e aofia ai le gaoioi. Ia tausi le uumi o gaoioiga taitasi i le lua pe tolu minute.

Fai soo: E fiafia tele tamaiti tausaga vasega pepe i gaoioiga e fai soo, ma e fesoasoani foi ia i latou e aoao ai. Afai o loo fiafia pea tamaiti ma o loo faalogo lelei, toe fai gaoioiga ina ia maua le avanoa o tamaiti taitoatasi e auai.