E Fesoasoani le Agaga Paia ia te A’u

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

O le Agaga Paia o se tasi o le Aiga Atua, faatasi ai ma le Tama Faalelagi ma Iesu Keriso. O Ia o se peresona o agaga (tagai MFF 130:22). O le misiona a le Agaga Paia o le molimau lea i le Tama ma le Alo ma le moni o mea uma (tagai 3 Nifae 11:36; Moronae 10:5). E mafai foi ona Ia taitaia i tatou e faia filifiliga sa’o ma faamafanafana ia i tatou (tagai MFF 31:11). O le auala e talanoa mai ai le Agaga Paia ia i tatou o loo faamatala mai i tusitusiga paia o se “leo filemu ma le itiiti” (tagai 1 Tupu 19:11–12).

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Pese

Ta’u i tamaiti o le a e usuina se pese e faatatau i le Tama Faalelagi. Usu pe fai atu upu o le fuaiupu muamua o le “Ua Ou Iloa o Soifua Lo’u Tama“ (Tusipese a Tamaiti, 8) ma faia taga o loo i lalo. Valaaulia tamaiti tou te faia faatasi

Ua ou iloaina o soifua lo’u Tama. (tuu le lima i le fatafata)
Ma ia alofa ia te a’u le Agaga e tau mai, (faaofuofu le lima i le taliga)
Le Agaga ta’u mai.

Gaoioiga E Fai Soo

Valaaulia tamaiti e fai mai “Agaga.” Ta’u atu ia i latou o le isi igoa mo le Agaga o le Atua o le Agaga Paia. Valaaulia tamaiti e fai mai “Agaga Paia.” Faamalamalama atu e fesoasoani le Agaga Paia ia i tatou e iloa ai e alofa le Tama Faalelagi ia i tatou.

Faatinoga Faataitai

Ta’u atu i tamaiti a tatou faia le mea sa’o, e fesoasoani le Agaga Paia e faailoa mai ia i tatou ua tatou faia se filifiliga sa’o. Valaaulia tamaiti e fai faatasi ma oe a o e faia faatinoga faataitai o mea sa’o. Mo se faataitaiga:

O se mea sa’o le alu i le lotu. Tatou faataitai e savavali i le lotu (saele lima a o tou savavali i se li’o).

Toe faia mo isi faataitaiga, e pei o le faasoa atu o mea taalo, fesoasoani ia Tina e salu le fola, ma isi.

Tala

Faamalamalama atu o le Agaga Paia e fesoasoani foi ia i tatou pe a tatou fefefe. Faamatala le tala lea:

I se tasi aso na i ai le afa malosi i fafo o le fale o Tavita. Na leotetele faititili (pupuni e tamaiti o latou taliga) ma le tele o matagi (ia feula e tamaiti le ea e pei o le matagi) ma timuga (ia faataitai e tamaiti le timu i o latou tamatamailima). Na fefe Tavita. Na fai i ai lona tina a oo ina fefe o ia, ona tatalo lea i lona Tama Faalelagi (faaali atu le ata o i le itulau 30). Na tatalo Tavita ma lona tina ina ia puipuia i laua e le Tama Faalelagi. Ona lagona ai lea e Tavita le saogalemu ma le fiafia. Na fai mai lona tina na auina mai e le Tama Faalelagi le Agaga Paia e aumaia na lagona ia te ia ina ia le fefe ai.

Valaaulia tamaiti e fai mai “Agaga Paia.”

Faaiuga

Faasoa atu lau molimau e uiga i le Agaga Paia. E ono aofia ai i lau molimau se aafiaga faigofie ma puupuu mai lou lava soifuaga i se taimi na taitaiina ai oe e le Agaga Paia.

Tatalo

Valaaulia se tamaitiiti e faia le tatalo faaiu..

Motugaafa Faafaiaoga

Agaga Paia: E tusa lava pe laiti, e mafai e tamaiti ona aoao e iloa le uunaiga a le Agaga Paia. I le taimi o soo se lesona, fesoasoani ia i latou e iloa faalogona o le alofa ma le mafanafana lea e oo mai mai le Agaga Paia—ae maise lava a o latou aoao e uiga i le Tama Faalelagi ma Iesu Keriso.

Tamaiti laiti: Manatua o le toatele lava o tamaiti e faigata ona taulai atu o latou mafaufau i se mea e tasi mo se taimi umi. Vaavaai mo faailoga ua latou manaomia se suiga. Afai ua umi se taimi o latou nonofo, fai se gaoioiga e mafai ai e i latou ona faagaoioi o latou tino.

Aafiaga patino: O le faaaoga o aafiaga patino e mafai ona fesoasoani ia i latou o loo e aoaoina e iloa uunaiga o le talalelei i o tatou olaga i aso taitasi (tagai O Le Aoao Atu, E Leai Se Isi Valaauga e Sili Ai, 47, 190). Mo le vaega i le tausaga lea, o le aafiaga e te faasoa atu e manaomia lava le matua faigofie ma le puupuu— e le sili atu nai lo se fuaiupu e tasi pe lua.

Gaoioiga e Filifili Ai

Sauniuniga

Mo le gaoioiga i le mau: Aumai se kopi o le Tusi Paia. Faailoga le Ioane 14:26 e faafaigofie ai ona e susue i ai.
Mo le gaoioiga i le ata tusi: Kopi le ata tusi o i le itulau 31 mo tamaiti taitoatasi.

E Fesoasoani le Agaga Paia ia te A’u

Alu i le lotu

Tatalo

Ia agalelei

Usiusitai i matua

Faitau tusitusiga paia
Mo le taaloga e fai i le poloka: Kopi le ata tusi o i le itulau 31 ma valivali pe a mananao ai. ‘Oti i luga o le laina solo atoa ma gagau i luga o laina togitogi. Faapipii pito ia maua ai se poloka.

Fuaiupu o Gaoioiga

Faia se li’o ma tamaiti ma tauloto le fuaiupu o gaoioiga lea:

E leo malie le Agaga Paia. (tuu le tamatamai lima i laugutu)
E moni, e le soona leotele o ia. (faaofuofu lima i le gutu pe a ‘e’e)
E faamanuia, fesoasoani, ma taitai oe (uulima ma savavali i se li’o)
I mea uma e te faia. (nonofo i lalo)

Mau

Ta’u i tamaiti na aoao mai Iesu i tusitusiga paia o le a aoaoina i tatou e le Agaga Paia. Susue le Tusi Paia i le Ioane 14:26 ma faitau, “O le Agaga Paia … na te aoao ia te outou i mea uma lava.” Valaaulia tamaiti tou te toe faia faatasi le fuaiupu, fai auauai ni nai upu i le taimi.

Ata tusi

Faaali atu le ata tusi o i le itulau 31 ma tuuina atu i tamaiti taitoatasi se kopi o le ata tusi. Tusi [lou lima] i le ata o le falelotu o le Ekalesia ma faamalamalama e faapea, e fesoasoani le Agaga Paia ia tatou iloa o le alu i le lotu o le mea sa’o lea e fai. Valaaulia tamaiti e tusi lima i le falelotu ia latou kopi. Toe faia mo isi ata tusi.

Taaloga i le Poloka

Faataavale le poloka na e faia. Faitau le faaupuga i le pito i luga o le poloka, ma fai i tamaiti tou te toe faia faatasi. Ona faia lea e tamaiti se taga faigofie e talafeagai ma le ata. A pito i luga le itu o loo i ai upu “E Fesoasoani le Agaga Paia Ia te A’u”, ta’u i tamaiti e fesoasoani le Agaga Paia ia tatou iloa ai ua tatou faia se mea lelei. Toe faia, ma tuuina atu i tamaiti taitoatasi se avanoa e faataavale ai le poloka.