19

E Mafai Ona Ou Fiafia

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

E finagalo lo tatou Tama Faalelagi ia tatou fiafia, o le fuafuaga na Ia faia mo i tatou e masani lava ona taua o le “ala sili o le fiafia” (Alema 42:8). E ui lava o mea faafeagai o se vaega taua o le olaga, e mafai ona tatou filifili ia lelei la tatou vaai i mea uma, ma o o tatou uiga faaalia fiafia o le a fesoasoani i isi ina ia lelei ai foi la latou vaai i mea uma.

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Tala

Ia uu e se tamaitiiti le ata o i le itulau 82. Faamatala le tala lea:

Na o Mele ma lona tina e savalivali (faasino ia Mele ma Mama i le ata). O nisi tagata na la pasi atu ai sa faauu (fai i tamaiti e faauu). Na fesili Mele ia Mama, “Aisea e faanoanoa tele ai tagata?” Fai mai Mama, “Ou te le iloa, ae masalo e mafai ona ta ataata atu ia i latou e fesoasoani ai ia latou fiafia.”

A o la savalivali atu, na vaai atu Mele o savali mai se tamaitai e agai mai ia i laua. Na matuai faaali atu foliga ataata sili ona manaia o Mele (Valaaulia tamaiti e faaali foliga ataata sili ona manaia). Ina ua vaai mai le tamaitai lea i foliga fiafia o Mele, na toe ataata mai o ia ia Mele. Fai mai Mele, “E aoga!” Fai mai Mama, “A tatou filifili e fiafia, e fesoasoani foi i isi ia latou fiafia.”

Fai i tamaiti e ataata mai mo oe. Fai i ai o o latou foliga ataata e fesoasoani i tagata uma lava e lagona ai le fiafia. Valaaulia tamaiti e fai mai “fiafia.”

Pese

Usu pe fai atu upu o le “Ataata” (Tusipese a Tamaiti, 128) ma fai taga o loo i lalo. Valaaulia tamaiti tou te faia faatasi

Afai ua e faauu, (toso i lalo tulimanu o le gutu ia faauu ai)

Aua nei tumau ai. (lulu le ulu mai lea itu i lea itu)

Vave ona liliu

Ma ataata mai. (oomi i luga tulimanu o le gutu ia ataata ai)

Leai se tasi e fiafia. (toso i lalo tulimanu o le gutu ia faauu ai)

I ni mata faauu. (oomi i luga tulimanu o le gutu ia ataata ai)

Ia suia i le ataata

Maua ai le fiafia. (luelue le ulu i luga ma lalo)

Taaloga

Ia tutu tamaiti i se li’o. Fai i ai o le a e faataitaia le faasoaina atu o ou foliga ataata. Tu i luma o se tamaitiiti ma ataata i ai. Valaaulia le tamaitiiti e ataata. Ona fai atu lea, “Ta o e faasoa atu o ta foliga ataata.” Uu le lima o le tamaitiiti, o atu i se isi tamaitiiti, ma ataata i ai. Valaaulia le tamaitiiti fou e uu le lima o le tamaitiiti muamua ma faasoa atu foliga ataata i se isi tamaitiiti. Faaauau pea seia uulima uma tamaiti.

Faaiuga

Ta’u i tamaiti a tatou filifili tatou te fiafia, e mafai ona tatou fesoasoani e lagona foi e isi le fiafia. Valaaulia tamaiti e fai mai, “E mafai ona ou fiafia!”

Tatalo

Valaaulia se tamaitiiti e faia le tatalo faaiu.

Motugaafa Faafaiaoga

Pese: E fiafia tele tamaiti i mea na latou vaai ma faalogo muamua i ai. Usu se pese mai le lesona lea po o se lesona muamua i soo se taimi lava o le vasega pepe. O le a fesoasoani le toe faamanatu lea ia i latou e aoao ai le pese ma manatua ai mataupu faavae na e aoaoina.

Taaloga: E pei lava o soo se gaoioiga, fetuutuunai lenei taaloga i le toatele o lau vasega. Afai e toatele au tamaiti, atonu o le a e manao e faasoa atu foliga ataata i tamaiti e taitoalua pe taitoatolu i le taimi.

Gaoioiga e Filifili Ai

Sauniuniga

• Mo le gaoioiga toe faamanatu: Faailoga le itulau 67 i le tusi lesona lenei e faafaigofie ai ona e susue i ai. Aumai ata o mea o loo e lagona ai le loto faafetai; e mafai ona e faaaogaina ata o i le tusi lesona lenei po o mekasini a le Ekalesia, pe mafai foi ona tusi au lava ata.

• Mo le gaoioiga e fai i le ata tusi: Kopi le ata tusi o i le itulau 83 mo tamaiti taitoatasi.

  

  E Mafai Ona Ou Fiafia

Pese

Usu pe fai atu upu o le “Afai ua e Fiafia” (Tusipese a Tamaiti, 125) ma fai taga o loo i lalo. Valaaulia tamaiti tou te faia faatasi

Afai ua e fiafia, pati ou lima. (pati, pati)

Afai ua e fiafia, pati ou lima. (pati, pati)

Afai ua e fiafia,

E iloa i ou foliga. (ataata; faasino i foliga)

Afai ua e fiafia, pati ou lima. (pati, pati)

Toe fai, sui le “patipati ou lima” i isi taga, e pei o le “faataamilo,” “popo ou vae,” ma isi.

Fuaiupu o Gaoioiga

Tauloto le fuaiupu o gaoioiga lea ma valaaulia tamaiti tou te faia faatasi:

O le ataata e ese le pipisi. (oomi i luga le tulimanu o le gutu ia ataata ai)

Ma a ou faanoanoa, ( toso i lalo tulimanu o le gutu ia faauu ai)

Ou te taumafai e ataata i isi, (oomi i luga tulimanu o le gutu ia ataata ai)

Ma ou fiafia ai loa! (tuu lima e lua i luga o le fatu)

Toe faamanatu

Toe fai gaoioiga e lua i ata mai le lesona 15 (itulau 64 ma le 65). Faamalamalama atu o le manatua o mea matagofie uma ua auina mai e le Tama Faalelagi mo i tatou e fesoasoani tatou te lagona ai le fiafia.

Ata Tusi

Tuu atu i tamaiti taitoatasi se kopi o le foliga ataata ma le faauu i le itulau 83. Valaaulia tamaiti e tilotilo i a latou ata a o e usuina le pese “Ataata”. Fesoasoani ia i latou e liliu o latou foliga faauu i se foliga ataata i le taimi talafeagai a o usuina le pese.

Motugaafa Faafaiaoga

Gaoioiga e filifili ai: Ina ia faatumauina le fiafia o tamaiti ma lo latou fiafia e auai i gaoioiga, faaaoga metotia eseese o le aoao atu; fesuisuiai tala ma pese, fuaiupu o gaoioiga, taaloga, ma faatinoga. Fuafua ia le sili atu i le lua pe tolu minute mo gaoioiga taitasi. (Tagai O Le Aoao Atu, E Leai Se Isi Valaauga e Sili Ai, .76, 96–97.)

Toe faamanatu: Toe fai gaoioiga mai lesona na muamua pe a e manao ai. O le fai soo o gaoioiga e malie mo tamaiti, ma e fesoasoani foi ia i latou e aoao ai.