24
O Le a Ou Mulimuli i le Perofeta
Folasaga mo le Faiaoga
Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:
O se perofeta o se tagata ua valaauina e le Atua e tautala mo Ia. E maua e perofeta le afioga a le Atua e ala i faaaliga, ona poloaiina ai lea o i latou e talai atu i tagata (tagai Amosa 3:7; 1 Nifae 22:2; MFF 1:38; Bible Dictionary, “Perofeta,” 754). Ua faamanuiaina i tatou e taitai e perofeta soifua. E pei o perofeta anamua, ua molimau mai perofeta o ona po nei ia Iesu Keriso ma aoao mai Lana talalelei. O a latou aoaoga o le mafaufau ma le loto o le Alii.
Sauniuniga
Aumai se ata o le Peresitene o le Ekalesia o loo i ai nei, pe afai e maua.
Gaoioiga e aoao Ai
Amata i se gaoioiga faapotopoto. Mo manatu, tagai i le itulau 3.
Tatalo
Valaaulia se tamaitiiti e faia le tatalo amata.
Taaloga
Valaaulia tamaiti tou te taaalo “mulimuli i le taitai.” Filifili se tamaitiiti e savali, patipati, pe faia se isi lava taga. Fai i isi tamaiti e mulimuli i le tamaitiiti muamua, ma faia mea na te faia. Faaauau seia tofu avanoa uma tamaiti o e mananao e fai ma taitai. Fai i tamaiti e mulimuli atu ia te oe agai i le vaega e fai ai le lesona, ona faanonofo loa lea o i latou i lalo.
Aoaoga o Mataupu Faavae
Fai i tamaiti e i ai so tatou taitai faapitoa tatou te mulimuli i ai, o lo tatou perofeta. Faamalamalama atu o se perofeta o se tagata e talanoa ma le Atua—e fetalai mai le Atua i le perofeta i mea e tatau ona tatou faia. Fai i tamaiti afai tatou te mulimuli i le perofeta, o le a tatou fiafia ma o le a faamanuiaina i tatou e le Tama Faalelagi. Faamalamalama atu o le mulimuli i le perofeta o lona uiga o le faia lea o mea e fai mai ai o ia tatou te faia.
Ata
Faaali atu le ata o Iosefa Samita (itulau 102). Fai atu, “O Perofeta Iosefa Samita lea. Na talanoa le Tama Faalelagi ma Iesu ia Iosefa Samita.” Tuu atu le ata e uu e se tamaitiiti. Ta’u i tamaiti se mea se tasi na aoao mai Perofeta Iosefa Samita ia tatou faia, e pei o le faitau i tusitusiga paia. Ia faafoliga tamaiti o loo faitau tusitusiga paia, ma valaaulia i latou e fai mai, “Mulimuli i le perofeta.” Tuu le ata i se isi tamaitiiti ma toe fai le gaoioiga, ma faatinoina se isi mea na aoao mai e le Perofeta, e pei o le tatalo, aai i meaai lelei, ma isi. A maea faatinoga taitasi, fai i tamaiti e fai mai, “Mulimuli i le perofeta.” Faaauau seia tofu avanoa uma tamaiti i le uuina o le ata.
Faaali atu se ata o le Peresitene o le Ekalesia o loo i ai nei, pe afai e maua. Ta’u i tamaiti lona suafa ma nisi o mea na ia aoao mai ia tatou faia. Faamalamalama atu a tatou faia ia mea, o le a faamanuiaina i tatou.
Faatinoga Faataitai
Valaaulia tamaiti e faatino mai ni auala e mafai ona tatou mulimuli ai i le Perofeta.
Pese
Valaaulia tamaiti tou te savavali faataamilo i le potu a o e usuina pe fai atu upu o le tali o le pese “Mulimuli i le Perofeta” (Tusipese a Tamaiti, 58):
Mulimuli i le Perofeta,
Ia aua nei sese ai.
Mulimuli i le Perofeta,
Na te iloa le ala.
Valaaulia tamaiti tou te pepese. Toe fai, tuuina atu ia tofu avanoa tamaiti e taitai ai le savali. Faamalamalama atu o le uiga o le sese ai, o le faia o mea sese.
Faaiuga
Ta’u i tamaiti ua e iloa a tatou mulimuli i le perofeta, o le a faamanuiaina i tatou. Fai i tamaiti e fai mai, “O Le a Ou Mulimuli i le Perofeta,” fai auauai ni nai upu i le taimi.
Tatalo
Valaaulia se tamaitiiti e faia le tatalo faaiu.
Gaoioiga e Filifili Ai
Sauniuniga
-
Mo le gaoioiga faatagata ma le taaloga taumatemate: Kopi ma oti ese ia faatagata o i le itulau 103. Valivali pe a mananao ai. Gagau i luga o laina togitogi e faia ai faatagata tutu.
O le a ou mulimuli i le perofeta.
Na aoaoina i tatou e Tanielu e tatau ona tatou tatalo.
Na aoaoina i tatou e Ioane le Papatiso ia papatisoina.
Na aoaoina i tatou e Samuelu le sa Lamana ia usiusitai i le Tama Faalelagi.
Na aoaoina i tatou e Iosefa Samita ia faitau i tusitusiga paia.
-
Mo le gaoioiga valivali: Kopi ma oti ese ia faatagata o i le itulau 103 mo tamaiti taitoatasi e valivali.
Faatagata
Ta’u i tamaiti o le a e fesoasoani ia i latou e aoao e uiga i nisi o perofeta na soifua anamua. Tuu faatagata tutu se fa i luga o le fola po o luga o se laulau. Ia tofu avanoa tamaiti e filifili ai se tasi o faatagata. Ta’u i tamaiti le igoa o le perofeta ma faitau le faamatalaga o i lalo. Valaaulia tamaiti e toe faia se upu autu mai le faamatalaga, e pei o le “tatalo,” “papatiso,” “usiusitai,” ma “tusitusiga paia.” Toe fai seia tofu avanoa uma tamaiti o e mananao ai.
Taaloga Taumatemate
Fai i tamaiti e pupuni o latou mata pe liliu atu o latou tua a o e tuua faatagata tutu i ni nofoaga i totonu o le potu. Ia mautinoa e faigofie ona iloa atu. Fai i tamaiti e sue po o fea faatagata. A maua se tasi, fai i ai e aumaia i le mea o loo fai ai le lesona. Ta’u i tamaiti le igoa o le perofeta ma faitau faamatalaga o i ai. O lenei gaoioiga e fetaui lelei lava mo tamaiti matutua.
Valivali
Ia valivali e tamaiti se kopi o le faatagata o i le itulau 103. A maea, gagau i luga o laina togitogi e fai ai faatagata tutu mo tamaiti e ave i le fale. Afai e leai sou taimi e fai ai faatagata i le taimi o le vasega, talosaga i matua o tamaiti e fai i le fale.