15

O Le a Ou Loto Faafetai

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

Na poloai mai le Alii, “Ia e faafetai i le Alii lou Atua i mea uma” (MFF 59:7). E tatau ona tatou faailoa atu le agaga faafetai i le Atua mo le tele o faamanuiaga Na te tuuina mai ia i tatou. E tatau foi ona tatou loto faafetai i o tatou matua, faiaoga, uo, ma isi o e fesoasoani ia i tatou i soo se auala. (Tagai foi Salamo 100:3–4.)

Sauniuniga

• Faitau le Luka 17:11–19, ma ia saunia e otooto le tala i lepela e toa 10.

• Aumai se kopi o le Tusi Paia. Faailoga le Luka 17:11–19 e faafaigofie ai ona e susue i ai.

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Aoaoga o Aoaoga Faavae

Ta’u atu i tamaiti ua tuuina mai e le Tama Faalelagi ia i tatou le tele o faamanuiaga, e pei o o tatou tino, o laau ma meaola, o o tatou aiga, ma le Ekalesia. Faamalamalama atu e mafai ona tatou faaali atu lo tatou alofa mo Ia i le fai atu “faafetai lava” ma e mafai foi ona tatou fai atu “faafetai lava” i o tatou aiga ma uo ma soo se tasi lava e faia se mea lelei ia i tatou.

Tala mai Tusitusiga Paia

Faaali atu le ata o i le itulau 66. Faasino atu ia Iesu ma tagata na mamai tigaina. Susu’e le Tusi Paia i le Luka 17:11–19 ma faamatala i ai le tala i lepela e toa 10. O loo i lalo se faataitaiga:

Na i ai ni alii se toa 10 o e na mamai tigaina. Na faamaloloina i latou e Iesu ma manuia ai i latou (faasino ia Iesu o loo i le ata). Na matua fiafia i latou uma (tusi i lepela o i le ata). Ae na o le toatasi le alii na fai atu “faafetai lava” ia Iesu (tusi i le lepela loto faafetai o i le ata). E mafai ona tatou fai atu “faafetai lava” (valaaulia tamaiti e fai mai “faafetai lava”).

Ata

Faaali atu le ata tusi o i le itulau 67. Ta’u i tamaiti e faaali atu lo tatou alofa i le Tama Faalelagi e ala i le faafetaia o Ia mo mea uma lava ua Ia foai mai ia i tatou. Tusi i se tasi o ata ma valaaulia tamaiti e faia se taga e talafeagai ma le aitema lena (e pei o le sii o lima i luga ae o o latou ulu e fai ai se tumutumu o se fale, faafoliga o loo tau fua o se laau ma ’ai, faafoliga o loo faamaulu seevae, ma isi). Toe fai mo ata taitasi.

Ou te faafetai mo lo’u aiga.

Ou te faafetai mo lo’u fale.

Ou te faafetai mo meaai e ai.

Ou te faafetai mo o’u lavalava.

Pese

Usu pe fai atu upu o le fuaiupu 1 ma le 2 o le “Faafetai i Lo Tatou Tama” (Tusipese a Tamaiti, 15) ma fai ia taga o loo i lalo. Valaaulia tamaiti tou te faia faatasi

Ia tatou faafetai i le Tama, (piilima)

Mo mea uma ua ia foai mai. (fofola lautele lima)

Mata ma taliga, lima ma vae, (tusi i mata, taliga, lima, ma vae)

Ofu e oofu ai, (faasino i lavalava) ma meaai. (faafoliga o loo ’ai)

Faaiuga

Fai i tamaiti e fai mai “faafetai lava.” Faasoa faapuupuu atu ou lagona o le agaga faafetai i le Tama Faalelagi ma Iesu Keriso.

Tatalo

Valaaulia se tamaitiiti e faia le tatalo faaiu.

Motugaafa Faafaiaoga

Gaoioiga faapotopoto: E lagona e tamaiti le saogalemu pe a i ai faiga masani ma suiga masani mai lea gaoioiga i lea gaoioiga. E fesoasoani lea ia i latou e faalogo ma filemu ma auai i gaoioiga.

Tala: Ia e nofouta i agavaa o tamaiti e malamalama ai. Aloese i le faaaoga o le tautala faapepe po o upu e faigata tele foi. Mo se faataitaiga, faaaoga “tagata na mama’i tigaina” nai lo “lepela.”

Gaoioiga e Filifili Ai

Sauniuniga

• Mo le gaoioiga e fai i ata: Aumai ata o mea o loo e faafetai ai; e mafai ona e faaaoga ata o i le tusi lesona lenei po o totonu o mekasini a le Ekalesia, pe e mafai foi ona e tusia au lava ata.

• Mo le gaoioiga valivali ma le taaloga faafetaui: Kopi le ata tusi o i le itulau 67 mo tamaiti taitoatasi e valivali. Aumai ni fasipepa po o ni mea talitutusa e faaaoga e tamaiti e faaaoga o ni maka mo le taaloga faafetaui; ia lava mea e aumaia mo tamaiti taitoatasi ina ia le itiiti ifo i le fa maka.

Fuaiupu o Gaoioiga

Fai i tamaiti tatou te faafetai i le Tama Faalelagi mo o tatou tino. Valaaulia tamaiti e tutu i luga ma outou faia faatasi le fuaiupu o gaoioiga lea. Faia soo se faatinoga o loo fautua mai lava i upu.

Tago i ou mata, tago i lou isu,

Tago i ou taliga, tago i ou tamai vae.

Aapa ou lima i luga,

Ia maualuga tele, e oo i le lagi.

Tuu lou lima i lou lauulu.

Nofo i lou nofoa ma filemu.

Tusi i lou gutu ma faapea atu, “Ou te faafetai mo lo’u gutu.” Fai i tamaiti e faataitai mai le fuaiupu ma taga. Toe fai mo mata, isu, taliga, lima, ma vae. Valaaulia tamaiti e ta’u mai nisi mea latou te faafetai ai, ma toe fai le fuaiupu mo mea latou te tauina mai.

Ata

Faaali i tamaiti ia ata na e aumaia ma faamatala faapuupuu pe aisea ua e faafetai ai mo nei mea. Valaaulia tamaiti e ta’u mai ni mea ua latou maua ai le agaga faafetai.

Valivali

Ia valivali e tamaiti se kopi o le itulau 67. A o valivali i latou, faamatala atu le ata ma faamalamalama i tamaiti mea o loo latou valivaliina. Faitau ia i latou upu o i le ata tusi.

Taaloga Faafetaui

Ave i tamaiti taitoatasi ni fasipepa tai fa. Faaali atu le ata tusi o i le itulau 67, faasino i le ata o le aiga, ma faitau i tamaiti le faamatalaga o i lalo o le ata. Valaaulia tamaiti e tuu se fasi pepa i luga o le aiga o loo i a latou kopi o le ata. Valaaulia i latou tou te toe faia faatasi le fuaiupu o loo i luga o le ata. Toe fai le gaoioiga lea mo isi ata.

Motugaafa Faafaiaoga

O tamaiti laiti atonu e le auai i le lesona atoa. Ae peitai, faatasi ai ma le alofa ma le faamalosiauga, e mafai ona e aoaoina e faataitai atu i mea e te faia. Fesoasoani ia i latou e fai mai “faafetai lava” i taimi e tatau ai. O lau faataitaiga e mafai ona avea ma au meafaigaluega sili ona malosi e aoao atu ai. O le a aoao e tamaiti uiga faaalia, amioga, ma gagana e ala i le matauina o oe. (Tagai O Le Aoao Atu, E Leai Se Isi Valaauga e Sili Ai, 114–15.)

O le toe faia soo o lesona e fesoasoani i tamaiti e aoao ai, ma e malie foi mo i latou. E fiafia i latou e faalogo soo i le mea lava e tasi. E mafai ona latou aoaoina fuaiupu pupuu e fai soo ma ua latou matauina.