26

O Le a Ou Papatiso ma Faamauina

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

Na papatisoina Iesu Keriso ia faailoa atu ai “i le Tama e usiusitai o ia ia te ia i le tausiga o ana poloaiga” ma faia ai se faataitaiga mo i tatou (tagai 2 Nifae 31:7, 9; tagai foi Mataio 3:13–17). A papatisoina i tatou, ua tatou faailoa atu foi ua tatou naunau e mulimuli i le Faaola ma usiusitai i Ana poloaiga. Ina ua papatisoina Iesu, “ua afio ifo le Agaga Paia i luga ia te ia” (2 Nifae 31:8). A maea ona papatisoina i tatou, ua tuuina mai ia i tatou le meaalofa o le Agaga Paia e ala i le sauniga o le faamauga. O lona uiga e mafai ona avea le Agaga Paia ma a tatou soa tumau pe a tatou tausia poloaiga.

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Ata

Faaali atu le ata o Iesu Keriso o loo papatisoina (itulau 110). Faasino i vaega o le ata (Iesu, o le vai, Ioane le Papatiso, ma isi). Faamalamalama atu na papatisoina Iesu ona e alofa o Ia i le Tama Faalelagi ma finagalo e usiusitai ia te Ia. Valaaulia tamaiti tou te ta’uina faatasi le upu “Iesu” ma le “papatisoina.”

Solo

Tusi i vaega eseese o le ata a o e taulotoina upu o le fuaiupu muamua o le “Papatisoga” (Tusipese a Tamaiti, 54–55). Valaaulia tamaiti tou te faasino faatasi i ata.

O Ioane na ia papatiso, (faasino ia Iesu, ona faasino lea ia Ioane)

Iesu i Iutaia,

Ma papatiso i le faatofu

I le Vai o Ioritana. (faasino i le vai)

Atonu o le a e manao e faamalamalama atu o le “faatofuina” o lona uiga na lilofia atoa Iesu i le vai ina ua papatisoina o Ia.

Ata

Faaali atu le ata o le teineitiiti o loo papatisoina (itulau 110) ma faailoa atu tulaga tutusa o ata e lua. Ta’u i tamaiti e mafai ona papatisoina i latou, e pei lava o Iesu, pe a valu o latou tausaga. Tuu i luga tamatamailima e valu, tai fa mai le lima, ma faitau. Toe fai, ma valaaulia tamaiti tou te faia faatasi. Faamamafa atu o le papatisoina o le tasi lea o auala tatou te mulimuli ai ia Iesu; a papatisoina i tatou tatou te faaali atu tatou te alolofa i le Tama Faalelagi ma tatou mananao e usiusitai ia te Ia.

Ata tusi

Faaali atu le ata tusi o i le itulau 111. Talanoa i tamaiti e uiga i mea o loo tutupu i totonu o le ata tusi. Faamalamalama atu a maea ona papatisoina i tatou, ona faamauina lea o i tatou. Valaaulia tamaiti e fai mai “faamauina.” Fai i ai o lona uiga o alii o e umia le perisitua e tuu o latou lima i luga o o tatou ulu ma tuuina mai ia i tatou le meaalofa o le Agaga Paia.

O Le a Papatisoina A’u

O Le a Faamauina A’u

Faaiuga

Valaaulia tamaiti e fai mai, “O le a ou papatiso ma faamauina,” fai auauai ni nai upu i le taimi. Ta’u faapuupuu atu i tamaiti lagona na ia te oe ina ua e papatisoina ma faamauina.

Tatalo

Valaaulia se tamaitiiti e faia le tatalo faaiu.

Motugaafa Faafaiaoga

Ata: Afai e lua ata o i luga o le itulau e tasi, e mafai ona e fesoasoani i tamaiti e taulai atu i le ata e tasi i le ufiufi lea o le isi.

Tamaiti laiti: O nisi o tamaiti, ae maise lava o tamaiti e laiti tele, atonu o le a le malamalama i mataupu uma e aoaoina i nei lesona. Ae peitai, o loo latou aoaoina lava se mea i vaiaso taitasi, ma o loo e fesoasoani ia i latou ia lagona le Agaga ma faamasani i upu ma fasifuaiupu e faatatau i le talalelei.

Gaoioiga e Filifili Ai

Sauniuniga

• Mo le gaoioiga i le mau: Aumai se kopi o le Tusi a Mamona. Faailoga le 3 Nifae 12:1 e faafaigofie ai ona e susue i ai.

• Mo le taaloga taumatemate: Kopi le ata tusi o i le itulau 111 ma valivali pe a mananao ai. Gagau le itulau i le afa ia aliali mai le ata o le papatisoga i le tasi itu ae o le ata o le faamauga i le isi itu.

• Mo le gaoioiga valivali: Kopi le ata tusi o i le itulau 111 mo tamaiti taitoatasi e valivali.

Mau

Ta’u i tamaiti o loo fetalai mai Iesu Keriso ia i tatou i tusitusiga paia e finagalo o Ia ia tatou papatisoina. Susu’e le Tusi a Mamona i le 3 Nifae 12:1 ma faapea atu, “Ua fetalai atu Iesu, ‘Talitonu mai ia te au ma papatisoina.’ ” Valaaulia tamaiti tou te toe faia faatasi le fuaiupu, fai auauai ni nai upu i le taimi. Faamanatu ia i latou e mafai ona papatisoina i latou pe a valu tausaga o le tagata.

Taaloga Taumatemate

Faaali i tamaiti lau kopi o le ata o le papatisoga, faitau faamatalaga o loo i lalo ifo, ma valaaulia tamaiti e fai mai “papatisoina.” Susue i luga le itulau, ma toe fai mo le ata o le faamauga.

Nana le ata i ou tua. Ona faaali atu lea i tamaiti o le itu e tasi, ma fesili atu, “O papatisoina le tama lea po o faamauina?” Valaaulia tamaiti tou te faia faatasi le tali. Toe nana le ata i ou tua ma toe fai le gaoioiga e fuafua i le fiafia i ai o tamaiti. O lenei gaoioiga e fetaui lelei lava mo tamaiti matutua.

Valivali

Ia valivali e tamaiti se kopi o le ata tusi o i le itulau 111. A o valivali i latou, toe faamanatu mataupu faavae na aoaoina i le lesona. Faasino i vaega o le ata, faitau i tamaiti faamatalaga o loo i lalo ifo, ma faamalamalama ia i latou ata o loo latou valivalia.

Motugaafa Faafaiaoga

Faia o kopi: Afai e le maua se masini e fai ai kopi, e mafai ona e tuuina se pepa lanutasi i luga o le ata tusi ae lolomi ata i se penitala po o se peni. Aua le popole i le tau lolomiina uma o vaega o le ata; tau lava ina lolomi le tino ma ni nai vaega ia lava e faailoa mai ai le ata tusi.

Valivali: “Ia uunaia tamaiti o le vasega e faaali a latou ata i o latou aiga. O le a fesoasoani lea ia i latou ia manatua ai mea na latou aoaoina. O le a maua ai foi e matua se avanoa e talanoaina ai mataupu o le talalelei faatasi ma a latou fanau” (O Le Aoao Atu, E Leai Se Isi Valaauga e Sili Ai, 175–76).