21

Na Vaai Iosefa Samita i le Tama Faalelagi ma Iesu Keriso

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

O Iosefa Samita o le uluai perofeta o lo tatou vaitaimi. Na vaai ma talanoa o ia ma le Atua le Tama ma Iesu Keriso. E ala mai ia Perofeta Iosefa, na toefuatai mai ai e le Alii le Ekalesia moni ma le atoaga o le talalelei. (Tagai Talafaasolopito—Iosefa Samita 2:9–19.)

Sauniuniga

• Faitau le Talafaasolopito—Iosefa Samita 2:9–19 ma ia saunia e faamatala otooto le tala o le Uluai Faaaliga.

• Aumai se kopi o le Tusi Paia.

• Aumai se kopi o le Penina Tau Tele. Faailoga le Talafaasolopito— Iosefa Samita 2:17 e faafaigofie ai ona e susue i ai.

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Tala mai Tusitusiga Paia

Faaali atu le ata o i le itulau 90 a o e faamatalaina otooto le tala o le Uluai Faaaliga (tagai Talafaasolopito—Iosefa Samita 2:9–19). O loo i lalo se faataitaiga:

O se ata lea o Iosefa Samita (faasino ia Iosefa; valaaulia tamaiti e fai mai “Iosefa Samita”). Na manao o ia e fia iloa po o le fea ekalesia e sa’o. Na faitau o ia i le Tusi Paia (Susu’e le Tusi Paia) faapea e mafai ona tatou tatalo e iloa ai le mea moni (Valaaulia tamaiti e faafoliga o loo faitau). Na alu Iosefa i se togalaau (faasino i laau) e fesili i le Tama Faalelagi i le tatalo. A o tatalo o ia, na vaai o ia i le Tama Faalelagi ma Iesu Keriso.

Susu’e le Penina Tau Tele i le Talafaasolopito—Iosefa Samita 2:17 ma ta’u i tamaiti o le a e faitauina atu le tala na tau mai e le Tama Faalelagi ia Iosefa Samita. Faamalamalama atu faapea na tusi [le aao o le] Tama Faalelagi ia Iesu Keriso ma faapea mai: “O Lo’u Atalii Pele Lenei, Faalogo ia te Ia!” Faamalamalama atu na fetalai atu Iesu ia Iosefa o le a Ia toe aumaia le Ekalesia moni a Iesu Keriso.

Faamalositino

Toe faamatala le tala. I le taimi la lea, ia tutu i luga tamaiti ma sisii maualuga o latou lima e faafoliga o ni laau i le Vao Paia. Fai i tamaiti e luelue e pei o loo lue laau i le matagi a o e talanoa e uiga ia Iosefa o loo tatalo. Ona fai atu lea ia i latou e tutu sasa’o faalelei ma fifilemu pe a e faamatalaina atu ia i latou na oo mai le Tama Faalelagi ma Iesu ia Iosefa.

Pese

Usu pe fai atu upu o le pese “I Se Taeao Manaia” (Tusipese a Tamaiti, 57) ma fai ia taga o loo i lalo. Valaaulia tamaiti tou te faia faatasi

I Se Taeao Manaia, na faaali ai, (sisii i luga lima e pei o ni laau)

Le Tama ma Lona Alo ia Iosefa. (tootutuli ma piilima)

Faaiuga

Tuu atu sau molimau puupuu na vaai Iosefa Samita i le Tama Faalelagi ma Iesu Keriso.

Tatalo

Valaaulia se tamaitiiti e faia le tatalo faaiu.

Motugaafa Faafaiaoga

Tala: O tamaiti laiti e pupuu taimi e filemu ma faalogo ai. Fuafua auala e faaaafia ai i latou i le tala. Mo se faataitaiga, e mafai ona latou uuina ata pe faataitai mai i fuaiupu. Fai ma taofi ae faasino i vaega o le ata, ma ia lava le umi e faaali ai ia vaai i ai tamaiti taitoatasi a o le i faaauauina le tala. (Tagai O Le Aoao Atu, E Leai Se Isi Valaauga e Sili Ai, 191.)

Pese: “O fati o musika e fesoasoani i tamaiti e manatua ai le mea na latou usuina ma le savali o upu” (O Le Aoao Atu, E Leai Se Isi Valaauga e Sili Ai, 183). O musika o se auala lelei foi e valaaulia ai le Agaga i totonu o le vasega.

Molimau: Faailoa atu lau molimau i se auala faigofie ma maoti; mo se faataitaiga: “Ou te iloa na vaai Iosefa Samita i le Tama Faalelagi ma Iesu Keriso.”

Gaoioiga e Filifili Ai

Sauniuniga

• Mo le gaoioiga i papeti tamatamai lima: Kopi ma oti ese ia papeti tamatamai lima o i le itulau 91 pe faaaoga ia papeti na e faia mo le gaoioiga faaopoopo o i le lesona 9. Valivali papeti pe a mananao ai.

  

  Na Vaai Iosefa Samita i le Tama Faalelagi ma Iesu Keriso

  Kopi le itulau lea ma ooti ese ia papeti tamatamai lima i luga o laina solo atoa. Gagau i luga o laina togitogi. Ona faapipii lea o itu, ae faaavanoa pito i lalo ia mafai ai ona faamaulu papeti i tamatamai lima o tamaiti.

• Mo le gaoioiga valivali: Kopi le ata tusi o i le itulau 91 mo tamaiti taitoatasi e valivali.

Fuaiupu o Gaoioiga

Tauloto le fuaiupu o le gaoioiga lea, ma valaaulia tamaiti tou te faia faatasi:

Na tootuli Iosefa i lalo o laau, (sisii i luga lima pei o ni laau)

Ma faia se tatalo faapitoa. (piilima lima)

Na vaai o ia i le Tama ma le Alo (vaai i luga, faapaolo mata i le lima)

Ma faalogo ia i Laua. (faaofuofu le lima i le taliga)

Gaoioiga i Papeti Tamatamai Lima

Toe faamatala otooto le tala o le Uluai Faaaliga, i le taimi la lea ia faaaoga ia papeti tamatamai lima na e saunia. Ia uu e tamaiti ia papeti pe a latou mananao ai.

Valivali

Ia valivali e tamaiti taitoatasi se kopi o le ata tusi o i le itulau 91. A o valivali i latou, toe faamanatu le tala o le Uluai Faaaliga. Faasino i vaega o le ata ma faamalamalama i tamaiti le ata o loo latou valivalia. Faitau atu ia i latou upu o i le ata.

Motugaafa Faafaiaoga

Papeti tamatamai lima: Afai e te filifili e faia le gaoioiga lea, atonu o le a e manao e fai ia lava papeti tamatamai lima ina ia tofu le tamaitiiti ma le papeti e taalo ai.

Tamaiti matutua: Mafaufau e valaaulia tamaiti matutua atu e toe faamatalaina le tala o le Uluai Faaaliga i tamaiti laiti. Faaali ia i latou le auala e faaaoga ai ia papeti tamatamai lima po o le ata o i le itulau 42 e faamatala ai le tala. O le fesoasoani i tamaiti e aoao e le tasi le isi o se auala sili ona aoga e faamalosiau ai mea na e aoao atu ia i latou.