9

E i Ai So’u Tino e Pei o le Tino o le Tama Faalelagi

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

O i tatou taitoatasi o se atalii/afafine o le Atua. Ua aoao mai tusitusiga paia “Ona faia lea e le Atua o le tagata i Lona faatusa” (Kenese 1:27; tagai foi Mose 2:26–27; Aperaamo 4:26–27). O lona uiga e tutusa o tatou tino ma Lona tino. Na vaai le Perofeta o Iosefa Samita i le Tama Faalelagi ma Iesu Keriso, ma aoao mai o ia faapea “e i le Tama le tino o aano ma ivi e pei lava o le tagata; e faapea foi le Alo” (MFF 130:22).

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Pese

Usu le fuaiupu muamua o le “O A’u o se Atalii o le Atua” (Tusipese a Tamaiti, 2):

O A’u o se Atalii o le Atua,

Ua Ia auina mai a’u nei

Ia ou nofo ai i lenei lalolagi

Ma matua agalelei.

Toe usu, ma valaaulia tamaiti e faalogologo pe tou te pepese faatasi. Ta’u ia i latou faapea a tatou fai atu “Atua” o lona uiga o le Tama Faalelagi.

Tala mai Tusitusiga Paia

Faaali atu le ata o i le itulau 42. Faamatala faapuupuu le tala o Le Uluai Faaaliga a Iosefa Samita e aoao ai tamaiti e i ai le tino o le Tama Faalelagi e pei o i tatou (tagai Talafaasolopito–Iosefa Samita 2:17). O loo i lalo se faataitaiga:

A o tamaitiiti Iosefa Samita (tusi ia Iosefa i le ata), sa tatalo o ia i le Tama Faalelagi. Na tupu ai se mea matagofie. Na vaai ai Iosefa i le Tama Faalelagi ma Iesu Keriso (tusi i le Tama Faalelagi ma Iesu i le ata). Na oo mai i laua ma talanoa ia Iosefa. Na vaai ai Iosefa e i ai le tino o le Tama Faalelagi e pei o i tatou. E i ai ogalima o le Tama Faalelagi. E i ai ni ou ogalima? Faaali mai ou ogalima. E i ai lima o le Tama Faalelagi. E i ai ni ou lima? Faaali mai ou lima. E i ai foliga o le Tama Faalelagi. E i ai ni ou foliga? Tago i ou foliga. O oe o se tagata moni lava. O Tama Faalelagi o se tagata moni lava. Na ia faia lou tino. E i ai lou tino e pei o le tino o le Tama Faalelagi.

Fuaiupu o Gaoioiga

Valaaulia tamaiti e tutu i luga tou te faia faatasi le fuaiupu o gaoioiga:

E i ai lo’u tino faapitoa

Na aumaia e le Tama Faalelagi ia te a’u. (tago lima i le fatafata)

Na Ia aumaia ou taliga ou te faalogo ai (faaofuofu lima i le taliga)

Ma mata e mafai ai ona ou vaai. (tusi i mata)

Na Ia aumaia ou lima e mafai ai ona ou patipati, (patipati lima)

Ma vae e lua e feliuai ai (feliuai faataamilo)

Ma a ou manao ai, ou te tago i o’u tamaivae (punou ma tago i tamaivae)

I lalo lava i le palapala.

A ou mafaufau i lo’u tino, (tuu le tamatamai lima i le ulu)

O le vaega sili lava

Na fuafuaina e le Tama Faalelagi

Ia ou foliga pei o Ia. (nofo filemu i lalo)

Faaiuga

Valaaulia tamaiti e faataitai mai ia te oe, fai auauai ni nai upu i le taimi. “E i ai lo’u tino e pei o le tino o le Tama Faalelagi.” Faailoa atu lou agaga faafetai mo lou tino.

Tatalo

Valaaulia se tamaitiiti e faia le tatalo faaiu.

Motugaafa Faafaiaoga

Gaoioiga e aoao ai: Mataitu aafiaga o tamaiti i le taimi o gaoioiga. Ua e silafia agavaa ma manaoga o tamaiti o lau vasega. Ia fetuutuunai gaoioiga pe a manaomia. (Tagai O Le Aoao Atu, E Leai Se Isi Valaauga e Sili Ai, 35–36.)

Fuaiupu o gaoioiga: E mafai ona e faaaogaina fuaiupu o gaoioiga i soo se taimi lava a o faia le vasega, i soo se taimi e fia gaioi solo ai tamaiti, pe a e manaomia foi le faapisi o o latou mafaufau. O se auala lelei foi lea e toe faamanatu ai aoaoga faavae na e aoaoina atu muamua.

Gaoioiga e Filifili Ai

Sauniuniga

• Mo le tala i papeti tamatamai lima: Kopi, valivali, ma oti ese ia papeti tamatamai lima o i le itulau 91.

  

• Mo le gaoioiga lolomi: Aumai ni fasi pepa mama mo tamaiti taitoatasi ma se peni/vali e tusi ai.

• Mo le gaoioiga e fai i le ata tusi: Kopi le ata tusi o i le itulau 43 mo tamaiti taitoatasi.

  

  E I Ai So’u Tino e Pei o le Tino o le Tama Faalelagi

  E i ai o’u foliga e pei o le Tama Faalelagi.

  E i ai o’u lima e lua e pei o le Tama Faalelagi.

  E i ai o’u vae e lua e pei o le Tama Faalelagi.

Pese

Usu pe fai atu upu o le “Ulu, Tauau, Tuli ma Vae” (Tusipese a Tamaiti, 129) ma tusi i vaega taitasi o lou tino a o e tauina. Valaaulia tamaiti tou te faia faatasi.

Ulu, Tauau, Tuli ma Vae, tuli ma vae, tuli ma vae

Ulu, Tauau, Tuli ma Vae, mata, taliga, gutu, ma le isu.

Fai ma saga fai pe a mananao ai tamaiti. Faamanatu ia i latou na aumaia e Tama Faalelagi ia i tatou tino e foliga i Lona tino.

Tala o Papeti Tamatamailima

Toe faamatala le tala o le Uluai Faaaliga, e faaaoga ai papeti tamatamailima na e faia (tagai Talafaasolopito— Iosefa Samita 2:11–17; tagai foi i le faataitaiga i le itulau 88). Faamamafa atu le mea moni na vaai Iosefa Samita i le Tama Faalelagi ma Iesu Keriso e i ai o La tino e pei o o tatou tino.

Lolomiga

Lolomi lima o tamaiti taitoatasi i luga o fasi pepa. Ia valivali e i latou ia lolomiga. Tusi le igoa o le tamaitiiti ma ona tausaga ma le aso i luga o le pepa.

Ata tusi

Faaali atu le ata tusi o i le itulau 43 ma tuuina atu kopi mo tamaiti taitasi. Tusi i foliga o le tamaitiiti ma faamanatu i tamaiti e i ai o tatou foliga ma e i ai foi foliga o le Tama Faalelagi. Valaaulia tamaiti e tusi i foliga o loo i a latou kopi o le ata tusi. Toe faia mo isi vaega o le tino. Ia valivali e tamaiti a latou ata, pe a mananao ai.

Motugaafa Faafaiaoga

Papeti tamatamailima: A e faia papeti tamatamailima po o isi mea e fesoasoani i le aoaoga mo lesona a le vasega pepe, ia teu lelei ia mea. E mafai ona e toe faaaogaina i lesona i le lumanai.

Toe faamanatu : Toe fai ma saga fai pea gaoioiga mai lesona ua tuanai pe a e manao ai. O le toe fai soo o gaoioiga e malie mo tamaiti, ma fesoasoani ia i latou e aoao ai.