2
E i Ai se Fuafuaga a le Tama Faalelagi mo A’u
Folasaga mo le Faiaoga
Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:
Sa tatou nonofo faatasi o ni agaga ma le Tama Faalelagi ae tatou te le i fananau mai. Sa saunia e le Tama Faalelagi se fuafuaga e mafai ai ona tatou o mai i le lalolagi ma maua ni tino faaletino ina ia mafai ai ona tatou pei o Ia ma toe foi atu i Lona afioaga. Ua mafai lea e ala i le Togiola a Iesu Keriso ma lo tatou usiusitai. Na filifilia Iesu Keriso e avea ma o tatou Faaola. (Tagai Aperaamo 3:24–27; Mataupu Faavae o le Faatuatua 1:3.)
Sauniuniga
Faailoga le itulau 98 i le tusi lesona lenei e faafaigofie ai ona e susue i ai.
Gaoioiga e Aoao Ai
Amata i se gaoioiga faapotopoto. Mo manatu, tagai i le itulau 3.
Tatalo
Valaaulia se tamaitiiti e faia le tatalo amata.
Lagi Faapese se Tala
Faaaoga le “O A’u o se Atalii o le Atua” (Tusipese a Tamaiti, 2–3) e aoao ai i tamaiti nisi o faamatalaga autu e faatatau i le ata o le faaolataga. O le faataitaiga lenei o se fautuaga:
Ta’u i tamaiti na tatou nonofo uma lava ma le Tama Faalelagi ae tatou te le i fananau mai.
Usu pe fai atu (valaaulia tamaiti tou te faia faatasi):
O A’u o se Atalii o le Atua,
Ua Ia auina mai a’u nei.
Ta’u i tamaiti e i ai le fuafuaga a le Tama Faalelagi mo i tatou. Na ta’u mai e Ia o le a tatou o mai e nonofo i le lalolagi. Sa tatou matua fiafia ma tatou alalaga olioli ai. Valaaulia tamaiti e fai mai, “Hurei!”
Faaali atu le ata o se aiga i le itulau 14. Ta’u i tamaiti na tatou o mai i le lalolagi tatou te nonofo ai ma ni aiga e alolofa ia i tatou. Valaaulia tamaiti e kolosi o latou lima ma fusi i latou lava.
Usu pe fai atu:
Ia ou nofo ai i lenei lalolagi
Ma matua agalelei.
Ta’u i tamaiti a o tatou nonofo i luga o le fogaeleele, e finagalo le Tama Faalelagi ina ia tatou fiafia ma mulimuli i Ana poloaiga.
Usu pe fai atu:
Tago mai, savali mai i o’u tafatafa,
Ina ne’i o’u sese.
Faaali atu le ata o Iesu Keriso i le itulau 98. Ta’u i tamaiti na filifilia e le Tama Faalelagi Iesu Keriso e fesoasoani ia i tatou e toe foi atu ia te Ia. Faamalamalama atu ona o Iesu, ua mafai ai ona tatou nonofo faatasi ma le Tama Faalelagi ma o tatou aiga e faavavau pe afai tatou te tausia poloaiga.
Usu pe fai atu:
Aoao mai mea e ao ona fai
Ia ou toe foi atu ai.
Usu le pese atoa, ma faaali atu le ata a o outou pepese:
O A’u o se Atalii o le Atua,
Ua Ia auina mai a’u nei
Ia ou nofo ai i lenei lalolagi (faaali atu le ata o le aiga i le itulau 14)
Ma matua agalelei
Tago mai, savali mai i o’u tafatafa,
Ina ne’i o’u sese.
Aoao mai mea e ao ona fai (faaali atu le ata o Iesu i le itulau 98
Ia ou toe foi atu ai.
Faaiuga
Faasoa atu lau molimau e uiga i le fuafuaga a le Tama Faalelagi mo i tatou.
Tatalo
Valaaulia se tamaitiiti e faia le tatalo faaiu.
Gaoioiga e Filifili Ai
Sauniuniga
-
Mo le taaloga i le taga: Kopi ma oti ata tusi o i le itulau 15. Aumai se mea e nanā ai ata tusi i totonu, e pei o se tamai taga po o se fasi ie.
E i Ai se Fuafuaga a le Tama Faalelagi mo A’u
O A’u o se Atalii o le Atua, ua Ia auina mai a’u nei
Ia ou nofo ai i lenei lalolagi, ma matua agalelei
Aoao mai mea e ao ona fai, Ia ou toe foi atu ai.
-
Mo le gaoioiga valivali: Kopi le itulau 15 mo tamaiti taitoatasi. Oti ese le ata tusi ma le fuaiupu. Aumai se manoa po o se vulu ma se mea faapipii e fai ai ata faatautau mo tamaiti.
Taaloga i le Taga
Tuu ata tusi i le taga. Fai i se tamaitiiti e filifili se ata mai le taga. Faitau pe usu le fuaiupu o i lalo o le ata ma mulimuli mai ai tamaiti pe usu faatasi e outou upu. Fai ma toe fai seia maea uma i latou na mananao e auai i le gaoioiga.
Valivali
Ia valivali e tamaiti se kopi o le ata tusi o i le itulau 15 ma latou aveina i le fale e faaali i o latou matua mea na latou aoaoina i le vasega. A lava le taimi, faaaoga manoa po o vulu ma le mea faapipii e faia ai ni ata faatautau mo tamaiti e pei ona faaalia i le ata o loo i le taumatau.
