10
O Le a Ou Tausia Lelei Lo’u Tino
Folasaga mo le Faiaoga
Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:
O le tasi o faamanuiaga silisili o le ata o le faaolataga o le avanoa lea e maua ai tino faaletino. E finagalo le Alii ia tatou faaaloalo i o tatou tino ma tausi lelei. Na te faamanuiaina i tatou pe a tatou faia faapea (tagai 1 Korinito 3:16; MFF 89:18–21).
Gaoioiga e Aoao Ai
Amata i se gaoioiga faapotopoto. Mo manatu, tagai i le itulau 3.
Tatalo
Valaaulia se tamaitiiti e faia le tatalo amata.
Ata
Ta’u i tamaiti na aumai e le Tama Faalelagi o tatou tino, ma e mafai ona tatou faia le tele o mea matagofie i o tatou tino. Faaali atu le ata o i le itulau 46. Faasino tagata taitoatasi o le aiga o loo i le ata; a e tusi i le pepe, fesili atu ni fesili e pei ona lisi atu i lalo. A maea fesili taitasi, valaaulia tamaiti tou te tali faatasi i le fai mai “Leai” a o matua lulu malosi lou ao mai lea itu i lea itu.
-
E mafai ona savali se pepe?
-
E mafai ona tautala se pepe?
-
E mafai e se pepe ona togi se polo?
Ta’u i tamaiti na i ai le taimi na pepe ai i latou, ae o lea ua ola ma ua matutua.
Pese
Ia faatutu i luga tamaiti. Usu pe fai upu ia i le fati o le “Sa I Ai Se Tamaloa Aisa” (Tusipese a Tamaiti, 121) ma faia taga o loo i lalo. Valaaulia tamaiti tou te faia faatasi
Sa avea a’u ma pepe, pepe, pepe. (faafoliga o loo luelue pepe i lima)
Sa avea a’u ma pepe, laitiiti. (faasolosolo lava seia faatu i lalo)
Lea ua ou matua, matua, matua. (faasolosolo lava seia tu sao i luga)
Lea ua ou matua, ma umi! (aapa lima i luga o le ulu)
Ata
Toe faaali atu le ata ma tusi i le tamaitiiti laitiiti o loo taaalo ma lona tama. Fai i tamaiti o lenei tamaitiiti e tai tutusa lo latou matutua. Fai i tamaiti fesili e pei ona lisi atu i lalo. A maea fesili taitasi, valaaulia tamaiti tou te tali faatasi mai “Ioe” a o matuai lue lou ulu.
-
E mafai ona e savali? (ia savavali tamaiti i o latou tulaga)
-
E mafai ona e tautala? (faitau faatasi ma tamaiti e tau i le lima)
-
E mafai ona e togia se polo? (ia faafoliga o loo togi se polo ma sapo)
Fai i tamaiti ua faasolo ina matutua ona o loo latou aai i meaai lelei, momoe ma malolo, ma taeele e mama ai.
Faatinoga Faataitai
Faaali atu le ata tusi o i le itulau 47. Tusi i le teine o loo moe i le ata ma faamalamalama atu o le moe o se tasi lea o auala e tausi ai o tatou tino. Valaaulia tamaiti e faafoliga o loo momoe. Toe fai mo isi ata o loo i le ata tusi.
O Le a Ou Tausia Lelei Lo’u Tino
Faaiuga
Faailoa atu lou agaga faafetai mo tino ua aumai e le Tama Faalelagi mo i tatou. Valaaulia tamaiti e fai mai, “O le a ou tausia lelei lo’u tino,” fai auauai ni nai upu i le taimi.
Tatalo
Valaaulia se tamaitiiti e faia le tatalo faaiu.
Gaoioiga e Filifili Ai
Sauniuniga
-
Mo le taaloga taumatemate: Aumaia ni meaai maloloina se tolu pe fa, e pei o fualaau aina suamalie ma fualaau mata fai supo, i luga o se ipu mafolafola. Aumai se mea e ufiufi ai le ipu meaai, e pei o se ie tele.
-
Mo le gaoioiga valivali: Kopi le ata tusi o i le itulau 47 mo tamaiti taitoatasi e valivali.
Taaloga taumatemate
Faaali atu i tamaiti le ipu meaai. Tusi i aitema taitasi, ma fesoasoani i tamaiti e ta’u o latou igoa. Ufiufi meaai i se ie; ona aveese lea o se aitema se tasi ma aveese le ie. Valaaulia tamaiti e mate po o le a le aitema lea ua misi. E sili ona aoga le gaoioiga lea mo tamaiti matutua.
Fuaiupu o Gaoioiga
Tauloto le fuaiupu o gaoioiga lea ma valaaulia tamaiti tou te faia faatasi:
O si alii lea ua alu i le moega. (sii le tamatamai lima e tasi)
Taatia lona ulu i luga o le aluga. (tuu le tamatamai lima i luga o le alofilima o le isi lima)
Pulupulu mau lona palanikeke, (fusi le tamatamai lima i le isi alofilima)
Ma moe faapea i le po atoa.
Ua sau le ao ua pupula ona mata.
Ua ato ese ona ie mafanafana. (tatala le lima ae faaali mai le tamatamai lima o loo malolo)
Nofo vave i luga fai ofu ma alu loa, (faatu i luga le tamatamai lima)
Sauni e ataata, galue, ma taalo i le aso atoa.
Valivali
Ia valivali e tamaiti se kopi o le ata tusi o i le itulau 47. A o valivali i latou, faamamafa atu o loo faaali mai i le ata tusi ia auala e mafai ona tatou tausia ai o tatou tino.