28

E Faamanuiaina A’u e le Tama Faalelagi e Ala i le Perisitua

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

O le Perisitua o le mana ma le pule a le Atua. E tuuina mai e le Atua lenei pule i alii agavaa o le Ekalesia e 12 tausaga agai i luga ina ia mafai ai ona latou galulue i Lona suafa e faamanuia ai isi. O sauniga o le talalelei, e pei o le papatisoga ma le faamauga, o le faamanatuga, ma isi, e faatinoina e ala i le pule o le perisitua (tagai MFF 13; 20:73–79; 84:19–22). O tagata uma lava o le Ekalesia e faamanuiaina mai le perisitua.

Sauniuniga

Faailoga le itulau 26 ma le 114 i le tusi lesona lenei e faafaigofie ai ona e susue i ai.

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Aoaoga o Mataupu faavae

Ta’u i tamaiti o le perisitua o le mana o le Atua; e tuuina mai le perisitua i tama matutua ma tamā ina ia mafai ai ona latou faamanuiaina o latou aiga ma isi. Fai i tamaiti e ta’u le upu “perisitua.” (Manatua: A o faia lenei lesona, nofouta i lagona o tamaiti i le vasega pepe e leai se tamā i o latou aiga pe e le umia e o latou tamā le perisitua.)

Ata

Faaali atu le ata o i le itulau 118 ma valaaulia tamaiti e faafoliga o sii se pepe. Faamalamalama atu e mafai ona faamanuiaina ia pepe ma tuuina i ai se igoa e alii e i ai le perisitua. Valaaulia tamaiti e fai mai “perisitua.”

Faaali atu le ata tusi o i le itulau 119 o se faamanuiaga o e mamai. Ta’u i tamaiti o se tagata e i ai le perisitua e mafai ona faamanuiaina i latou o e o loo mamai ina ia lelei la latou faalogona. Susue i le itulau 26. Faasino i le ata o Iesu ma faamalamalama atu faapea i le ata lea o loo faamanuiaina e Iesu se tasi e tauaso. Valaaulia tamaiti e fai mai “perisitua.”

Faaali atu le ata o i le itulau 114. Faamanatu i tamaiti tatou te aai ma feinu i le faamanatuga i Aso Sa taitasi. Faamalamalama atu e saunia, faamanuia, ma tufatufa e i latou o loo i ai le perisitua. Valaaulia tamaiti e fai mai “perisitua.”

Pese

Valaaulia tamaiti e uu lima ma savavali i se li’o a o e usuina pe fai atu upu o le pese “O Loo Tautalagia Iinei Le Alofa” (Tusipese a Tamaiti, 102):

E manuia lo’u aiga i le mana o le perisitua.

Faaiuga

Faasoa atu lau molimau e faamanuiaina i tatou e le Tama Faalelagi e ala i le perisitua.

Tatalo

Valaaulia se tamaitiiti e faia le tatalo faaiu.

Motugaafa Faafaiaoga

Aoaoga o mataupu faavae: O le vaega lenei ua fuafuaina e fesoasoani i tamaiti e maua ai se malamalamaga faavae o le talalelei. O nisi o i latou atonu o le a le malamalama i mea uma e te fai atu ai, ae o le a masani i latou i le gagana o le talalelei ma atiina ae se faavae mo mea o le a latou aoaoina mulimuli ane i le olaga.

O tamaiti laiti e eseese lo latou agavaa i le gagana (tagai O Le Aoao Atu, E Leai Se Isi Valaauga e Sili Ai, 116–17). Ina ia fesoasoani i tamaiti laiti tele e fai soo upu mai le lesona, i se leo malu fai atu se tala faapea, “E mafai ona e fai mai perisitua? Tatou fai faatasi perisitua,” ma faatalitali mo se tali. Afai e le tali mai le tamaitiiti, ia toe valaaulia ma le alofa, ae aua ne’i faamalosia o ia. E tusa lava pe na o le faalogo, e aoao lava tamaiti mai le lesona.

Gaoioiga e Filifili Ai

Sauniuniga

• Mo le gaoioiga i le tagata asiasi atu: Fuafua ia i ai se tama na faamanuiaina lata mai nei lana pepe e aumai lana pepe i le vasega ma talanoa e uiga i lona aafiaga.

• Mo le tusi susue: Kopi le ata tusi o i le itulau 119. Valivali pe a manao ai. Oti i luga o le laina solo atoa ma gagau i luga o le laina togitogi.

  

  Faamanuiaina o Pepe

  Faamanuiaina o e Mamai

  Faamanatuga

  E Faamanuiaina A’u e le Tama Faalelagi e Ala i le Perisitua

Fuaiupu o Gaoioiga

Tauloto soo se fuaiupu po o fuaiupu uma o gaoioiga ma valaaulia tamaiti tou te faia faatasi. A uma fuaiupu taitasi, faamanatu i tamaiti e faamanuiaina o tatou olaga e le perisitua.

Faamanuiaina o pepe (Faaali atu le ata o i le itulau 118):

Ua sii e Tama le pepe (faafoliga o sii le pepe i lima)

Ma le alofa tele

Faamanuia ma faaigoa i le mana o le perisitua.

E alofa o ia i le matou aiga! (fusi oe lava)

Faamanuiaina o e mamai (faasino i le ata tusi o i le itulau 119):

A ou ma’i, e faamanuia a’u (faasino ia oe)

E alii perisitua amiotonu.

Ou te lagona le filemu, ma faatuatua (tuu le lima i luga o le fatu)

O le a ou toe manuia.

Faamanatuga (faaali atu le ata o i le itulau 114):

Ou te ai le areto ma le filemu (faafoliga o ai le areto)

Ma inu foi le vai. (faafoliga o inu vai)

Ou te piilima ma mafaufau ia Iesu— (piilima lima)

O le mea e tatau ona ou fai. (luelue le ulu i luga ma lalo)

[M. W. Verbica, “The Sacrament,” Friend, Fep. 1995, 17]

Tagata asiasi

Faailoa atu la outou tagata asiasi i tamaiti. Faamalamalama atu ia i latou o le tamā lea e i ai le perisitua ma na faaaoga e ia le perisitua e faamanuia ai lana pepe. Fai fesili i le tama e pei o, “O ia te oe le perisitua?” “O ai le igoa o lau pepe?” “O le a lau tala na fai a o faamanuia lau pepe?” “E faapefea ona e faaaogaina le perisitua e faamanuia ai lau pepe a o tuputupu ae o ia?”

Tusi susue

Faaali i tamaiti le tusi susue na e saunia. Susue le pito muamua, faitau faamatalaga o loo i ai, ma fai i tamaiti tou te faia faatasi. Toe fai mo pito uma e lua.

Motugaafa Faafaiaoga

Toe faamanatu: E fiafia tele tamaiti i tala, pese, ata, ma gaoioiga na latou vaai ma faalogo i ai muamua. Usu pese pe fai fuaiupu o gaoioiga mai le lesona lenei po o lesona na muamua i soo se taimi a o faia le vasega. O le a fesoasoani le toe faamanatu lea ia i latou e manatua ai mataupu faavae na e aoao atu.