O Lo Tatou Tiutetauave Faatausimea i le Lalolagi
Ua folafola mai faamanuiaga sili faaleagaga ia i latou o e alolofa ma tausia le fogaeleele ma o latou uso a alii ma tamaitai.
A o ma asiasi i lo matou atunuu moni o Farani, sa ma maua talu ai nei le fiafia ma lo’u toalua e ave nisi o fanau a le ma fanau e matamata i se togalaau matagofie e tu i le tamai taulaga o Giverny. Sa matou fiafia e savalivali solo i ona ala e mata’i atulaina o fugalaau, lilivai aulelei, ma le malamalama o sulu o loo apoina le fegaoioia’i o le fogavai o vailepa.
O lea nofoaga ofoofogia o le taunuuga o le naunauga fatufatu o se tasi alii: le valiata maoae o Claude Monet, o lē mo le 40 tausaga, sa faatulagaina ma le matua’i faaeteete ma galuea’iina lenei togalaau ina ia avea ma nofoaga e vali ai ana ata. Sa tele taimi na faaalu e Monet i vaega faalenatura matagofie; ona ia faaalia lea o ona lagona e uiga i le matagofie o le natura, i le faaaoga o lana pulumu vali e aumaia ai le lanu ma le malamalama. I le tele o tausaga, sa ia fatuina ai se ofaga maoae o le faitau selau o atavali, na musuia tuusa’o e le togalaau lenei.
Lili Vai ma le Aualalaupapa a Iapani, 1899, na valiina e Claude Monet
Uso e ma tuafafine, o a tatou fegalegaleaiga ma matagofie o le natura o loo siomia ai i tatou, e mafai ona fua mai ai ni aafiaga e sili ona musuia ma fiafia i le olaga. O lagona ootia tatou te lagonaina e mumu ai i o tatou loto se lagona loloto o le faafetai mo lo tatou Tama Faalelagi ma Lona Alo o Iesu Keriso, o ē na foafoaina lenei lalolagi ofoofogia—ma ona mauga ma vaitafe, laau ma meaola—ma o tatou uluai matua, o Atamu ma Eva.1
O le galuega o le foafoaga ua le na o se galuega e fai ona uma lea. O se vaega taua o le fuafuaga a le Atua mo Ana fanau. O lona faamoemoega o le saunia lea o se faatulagaga e mafai ai ona tofotofoina alii ma tamaitai, faaaoga lo latou faitalia, maua le olioli, ma aoao ma agaigai ai i luma, ina ia mafai ai ona latou toefoi atu i se aso i le afioaga o lo latou Foafoa ma mautofi ai i le ola e faavavau.
O na foafoaga matagofie na saunia uma mo lo tatou manuia ma o ni faamaoniga ola o le alofa o le Foafoa mo Ana fanau. Na tautino mai e le Alii, “Ioe, o mea uma e maua mai le eleele, i lona lava tau, ua faia mo le lelei ma le aoga i tagata, ina ia fiafia ai mata ma faaolioli ai le loto.”2
Peitai, o le meaalofa faalelagi o le Foafoaga e le oo mai e aunoa ma ni matafaioi ma tiutetauave. O nei matafaioi e sili ona faamatalaina i le manatu faavae o le tausimea. I faaupuga faaletalalelei, o le upu tausimea e faama’oti mai ai se tiutetauave paia faaleagaga pe faaletino e tausia se mea e ō le Atua lea tatou te tali atu ai.3
E pei ona aoao mai i tusitusiga paia, o lo tatou tiutetauave faatausimea i le lalolagi, e aofia ai mataupu faavae nei:
Mataupu faavae muamua: O le lalolagi atoa, e aofia ai ola uma o i ai, e ā le Atua ia.
Na tuuina mai e le Foafoa punaoa o le lalolagi ma ituaiga uma o le ola i la tatou tausiga, ae sa Ia taofimauina le pule uma. Na Ia fetalai, “O Aʼu, o le Alii, na tosoina le lagi, ma fausia le lalolagi, o aʼu galuega-taulima lava; o mea uma ua i ai i totonu e a aʼu ia.4 O mea uma o i ai i le lalolagi e ā le Atua ia, e aofia ai ma o tatou aiga, o o tatou tino faaletino, e oo lava i o tatou ola.5
Mataupu faavae lona lua: I le avea ai o ni tausimea o foafoaga a le Atua, ua i ai so tatou tiute e faamamalu ma tausia i latou.
I le avea ai o fanau a le Atua, ua tatou maua ai le tiutetauave ia avea ma tausimea, tausifanua, ma leoleo o Ana foafoaga paia. Na fetalai le Alii na Ia faia “tagata taitoatasi ia tali atu, o se tausimea i luga o faamanuiaga faaletino, ua Ou faia ma saunia mo aʼu meaola.”6
Ua faataga i tatou e lo tatou Tama Faalelagi e faaaoga ia punaoa faalelalolagi e tusa ai ma lo tatou lava loto malie. Peitai, e le tatau ona faamatalaina lou faitalia o se laisene e faaaoga ai pe faaumatia ai punaoa o lenei lalolagi e aunoa ma le poto po o le taofiofia. Na tuuina mai e le Alii lenei apoapoaiga: “Ma ua fiafia le Atua ua e tuu mai nei mea uma i le tagata; ona o le faamoemoe lea na faia ai ia faaaoga, ma le faautauta, ae ia lē sili atu, pe i le faamalosi.”7
Na saunoa Peresitene Russell M. Nelson e faapea: “I le avea ai ma e mauaina le Foafoaga paia, o le a se mea tatou te faia? E tatau ona tatou tausia le lalolagi, ia avea ma ni tausimea atamamai, ma faasaoina mo tupulaga o le lumanai.”8
I talaatu o le na o se tulaga tatau faasaienitisi po o faapolotiki, o le tausiga o le fogaeleele ma lo tatou siosiomaga faalenatura o se tiutetauave paia ua tuuina mai ia i tatou e le Atua, lea e tatau ona faatumuina ai i tatou i se lagona loloto o la tatou matafaioi ma le lotomaualalo. O se vaega taua foi o lo tatou avea ai ma soo. E mafai faapefea ona tatou faamamaluina ma alolofa i le Tama Faalelagi ma Iesu Keriso e aunoa ma le faamamaluina ma alolofa i a La’ua foafoaga?
E tele mea e mafai ona tatou faia—faatasi ma taitoatasi—ia avea ai ma tausimea lelei. I le mafaufau ai i o tatou tulaga taitoatasi, e mafai e i tatou taitoatasi ona faaaoga ia le mau punaoa o le lalolagi ma le migao atili ma le faautauta. E mafai ona tatou lagolagoina taumafaiga a nuu e tausia ai le fogaeleele. E mafai ona tatou faaaoga ituaiga olaga patino ma amioga ia e faaaloalogia ai foafoaga a le Atua, ma faamamā atili mea tatou te nonofo ai i tatou lava, faamatagofie atili, ma musuia atili.9
O lo tatou tiutetauave faaletausimea i foafoaga a le Atua e aofia ai foi, i lona faatumutumuga, se tiute paia e alofa ai, faaaloalo, ma tausia tagata soifua uma o loo tatou fefaasoaai i le lalolagi. O i latou o atalii ma afafine o le Atua, o o tatou tuafafine ma o tatou uso, ma o lo latou fiafia e faavavau o le faamoemoega tonu lea o le galuega o le foafoaga.
Na faamatala e le tusitala o Antoine de Saint-Exupéry le tala lea: I se tasi aso, a o malaga ai i se nofoaafi, sa ia iloa ane o loo ia nofo i le lotolotoi o se vaega o tagata sulufa’i. I le ootia loloto ai i le leai o se faamoemoe na ia vaaia i foliga o se tamaitiiti, sa ia faamatalaina: “Pe a faafeusua’i ma ola mai se rosa fou i se togalaau, e olioli le au faitogalaau uma. Latou te tuuesea le rosa, vaavaai, ma faafailele. Ae e leai se faitogalaau mo tagata.”10
Ou uso e ma tuafafine, pe le tatau ea ona fai i tatou ma faitogalaau mo o tatou uso a alii ma tamaitai? E le o i tatou ea o se leoleo o o tatou uso? Na poloaiina i tatou e Iesu ia alolofa i o tatou tuaoi e pei o i tatou lava.11 Mai Lona fofoga, o le upu tuaoi ua le na o se valalata faalelaueleele; ae e aofia ai le valalata o le loto. E aofia ai i latou uma e nofoia lenei paneta—pe o nonofo lata mai ia i tatou po o se atunuu mamao, tusa lava po o a o latou tupuaga, talaaga faaletagata, po o tulaga.
I le avea ai ma soo o Keriso, ua ia i tatou se matafaioi paia e galulue ai ma le lē faalogologo tiga mo le filemu ma le sologa lelei o malo uma o le lalolagi. E tatau ona tatou faia le mea aupito sili e puipuia ai ma aumaia le toafilemu ma le toomaga i ē vaivai, o ē le tagolima, ma i latou uma o ē mafatia po o ē mapuitiga. E sili i lo mea uma, o le meaalofa silisili o le alofa e mafai ona tatou ofo atu i o tatou uso a tagata e faasoa atu ia i latou le olioli o le talalelei, ma valaaulia i latou e o mai i lo latou Faaola e ala i feagaiga ma sauniga paia.
Mataupu faavae lona tolu: Ua valaaulia i tatou e auai i le faatinoina o le galuega o le foafoaga.
E le i maea le faagasologa paia o le foafoaga. O aso uma, o loo faaauau pea ona tuputupu a’e ia foafoaga, faalautele, ma faatoateleina. O se mea sili ona matagofie ua tuuina mai e lo tatou Tama Faalelagi ia i tatou se valaaulia e auai i le faatinoina o Lana galuega foafoa.
Tatou te auai i le faatinoina o le galuega o le foafoaga i soo se taimi tatou te faato’a ai le eleele pe faaopoopo a tatou lava fausaga i lenei lalolagi—pau lava le mea ia tatou faaalia le faaaloalo mo foafoaga a le Atua. E mafai ona faaalia a tatou saofaga e ala i le foafoaga o galuega o faatufugaga, tusiata o fale, musika, talatusi, ma le aganuu, ia e teu faamatagofie ai lo tatou paneta, faamalamalama o tatou sane, ma aumaia ai le fiafia i o tatou olaga. Tatou te saofagā foi e ala i mea fou faasaienitisi ma faafomai e maua, ia e faasao ai le fogaeleele ma le ola o loo i ai. Na aotele e Peresitene Thomas S. Monson lenei manatu faavae i upu matagofie nei: “Na tuua e le Atua le lalolagi e le’i mae’a mo le tagata e galueaiina ai ona tomai i luga … ina ia iloa ai e le tagata le olioli ma mamalu o le foafoaga.”12
I le faataoto a Iesu i taleni, ina ua toe foi mai le matai mai lana malaga, sa ia viia ma tauia auauna e toalua o e sa totō ma faateleina a la’ua taleni. I se tulaga e ese ai, sa faaigoa le auauna na nanā lana taleni tulagaese i le eleele “e le aoga,” ma sa ia faoa le mea sa ia mauaina.13
E faapena foi, o la tatou matafaioi o ni tausimea o foafoaga o le lalolagi, e le na ona puipui pe faasao. O loo faamoemoe le Alii ia tatou galulue ma le filiga, a o uunaia ai e le Lona Agaga Paia, e totō, faalautele, ma faaleleia ia punaoa ua Ia tuuina mai ia i tatou—e le mo na o lo tatou manuia ae ia faamanuia ai foi isi.
Faatasi ai i mea uma e ausia e le tagata, e leai se mea e mafai ona tutusa ma le aafiaga o le avea ma soāfoafoa faatasi ma le Atua i le tuuina atu o le ola po o le fesoasoani i se tamaitiiti e aoao, tuputupu a’e, ma lauolaola—pe faia o ni matua, faiaoga, taitai, pe i soo se isi lava matafaioi. E leai se tausimea e sili atu ona paia, sili ona faamalieina, ma sili foi ona moomia, nai lo le faapaaga ma lo tatou Foafoa i le saunia o tino faitino mo Ana fanau agaga ona fesoasoani lea ia i latou ia ausia o latou gafatia paia.
O le tiutetauave o le soāfoafoa e avea o se faamanatu faifai pea o le ola ma tino o tagata taitoatasi e paia, e lē ā se tasi lava ua na o le Atua, ma ua Ia faia i tatou o leoleo e faaaloalo, puipuia, ma tausia i latou. O poloaiga a le Atua, ia e pulea ai mana foafoa ma le faavaeina o aiga e faavavau, e taiala ai i tatou i lenei tiutetauave faatausimea paia, lea e matuā taua tele i Lana fuafuaga.
O’u uso e ma tuafafine, e ao ina tatou iloa o mea uma e faaleagaga i le Alii—e aofia ai tulaga aupito faaletino i o tatou olaga. Ou te molimau atu o faamanuiaga sili faaleagaga ua folafola mai ia i latou o e alolofa ma tausia le fogaeleele ma o latou uso a alii ma tamaitai. A tumau lo outou faamaoni i lenei tiutetauave faatausimea paia ma faamamaluina feagaiga faavavau, o le a outou tuputupu a’e i le malamalama o le Atua ma Lona Alo, o Iesu Keriso, ma o le a outou lagonaina tele lo La’ua alolofa ma lo La’ua tosinaga i o outou olaga. O nei mea uma o le a saunia ai oe e mau faatasi ma i La’ua ma maua ai mana fatufatu faaopoopo14 i le olaga a sau.
I le iuga o lenei olaga faitino, o le a fesili mai le Matai ia i tatou e tuu atu se tala o ou tiutetauave faatausimea paia, e aofia ai le ala na tatou tausia ai Ana foafoaga. Ou te tatalo o le a tatou faalogo ai iina i Ana upu alofa o musumusu mai i o tatou loto: “Ua lelei ia, le auauna lelei e, ma le faamaoni: ua e faamaoni i nai mea iti, ou te tofia oe e pule i mea e tele: ina ulufale mai ia i le fiafia o lou Alii.”15 I le suafa o Iesu Keriso, amene.