Mamanu o le Avea ai ma Soo
O le aoao e uiga ia Keriso ma Ana ala e taitai ai i tatou ia iloa ma alolofa ia te Ia.
Mamanu o le Faatuatua
O le taeao nei na vaaia ai e le ma fanau e toalua ma fanau e toatolu a le fanau i Amerika i Matu, ma pe tusa ma le afa o le lalolagi, le susulu o le oso a’e matagofie o le la i sasae. O le isi toatolu ma fanau e toafitu a le fanau i Aferika, ma le isi afa o le lalolagi, na vaaia le pogisa o tolotolo malie a’e i o latou luga a o goto ifo le la i le tafailagi i sisifo.
O lea tulaga faifai pea o le amataga o le aso ma le po o se isi lea faamanatu i aso taitasi o mea moni o loo pulea ai o tatou olaga e le mafai ona tatou suia. Pe a tatou faaaloalogia ma faaogatusa mea tatou te faia ma nei mea moni faavavau, ona tatou iloa lea o le filemu ma le toafimalie i totonu. A tatou le faia, tatou te fememea’i, ma e le galulue mea e pei ona tatou faamoemoeina.
O le ao ma le po o se tasi faataitaiga o mamanu ua tuuina mai e le Atua i tagata uma e ola i le lalolagi, o mea e pei ona i ai moni. O se mea moni a’ia’i o lo tatou ola faaletagata soifua, e le mafai ona tatou aloese ai ma faia e tusa o o tatou lava manao ma sosola ese ai. E faamanatu mai ai ia te a’u i taimi uma ou te lele ai mai Aferika i se konafesi aoao, e toefaatulaga le uati o le tino agai i tua i le 10 itula i le aso e tasi.
Soo se taimi tatou te ānoānoa ai, tatou te iloa ai ua tuuina mai e le Tama Faalelagi ia i tatou ni molimau ua lava o le mea moni e pulea ai o tatou olaga ina ia tatou iloa o Ia ma maua faamanuiaga o le filemu ma le olioli.
Na ala mai i le Perofeta o Iosefa Samita, sa tautino mai ai e le Alii, “O le a Ou tuu atu ia te outou se ata i mea uma, ina ia lē faaseseina outou; ona ua i ai Satani i le salafa o le laueleele, ma ua fealuai o ia e faasese i atunuu.”1
Na faaseseina Korioa le aneti-Keriso, e le’i talitonu i le i ai o se Atua ma le afio mai o Keriso. Na molimau atu le perofeta o Alema ia te ia, “Ua faailoa mai i mea uma o loo i ai se Atua; ioe, e oo i le lalolagi, ma mea uma ua i ona luga, ioe, ma lona faataamilosaga, ioe, ma paneta uma foi o loo i o latou ala masani ai ua molimau mai o loo i ai se Foafoa Silisiliese.”2
Ina ua tauanau atu pea Korioa e avatu se faailoga ona faatoa ia talitonu lea, sa faia e Alema ina ia taia o ia ma gugu. O le faalotomaualaloina i lona mafatiaga, sa tautino atu ai e Korioa na faaseseina o ia e le tiapolo.
E le manaomia ona faaseseina i tatou. O loo tatou vaaia pea i o tatou luma le vavega o ola atamamai. Ma o sina pulato’a ma manatunatu i le ofoofogia o le lagi ua laupae i fetu e le mafaitaulia ma aniva, e uunaia ai le agaga o le loto talitonu e folafola atu “Lo’u Atua e, … ua sili Oe!”3
Ioe, o loo soifua le Atua lo tatou Tama Faalelagi, ma e faaalia mai e Ia o Ia lava ia i tatou uma le taimi i le mau ala.
Mamanu o le Lotomaualalo
Ae ina ia faailoa, talitonu, ma faaauau pea i le Atua, e manaomia ona naunau o tatou loto e talia le Agaga o le upumoni. Na aoao mai Alema e muamua atu le lotomaualalo i le faatuatua.4 Na faaopoopo mai Mamona e faapea e le mafai e soo se tasi e lē “agamalu ma maualalo le loto” ona maua le faatuatua ma le faamoemoe ma talia le Agaga o le Atua.5 Sa tautino mai e le Tupu o Peniamina e faapea o soo se tasi e faamuamua le mamalu o le lalolagi o “se fili i le Atua.”6
O le gauai atu i le papatisoga e faataunuu ai le amiotonu uma tusa lava pe sa amiotonu ma paia o Ia, sa faaalia ai e Iesu Keriso e faapea, o le lotomaualalo i luma o le Atua o se uiga faavae lea o Ona soo.7
E manaomia e soo fou uma ona faaalia le lotomaualalo i luma o le Atua e ala i le sauniga o le papatisoga. O lea, “o i latou uma o e e faalotomaualaloina i latou lava i luma o le Atua, ma mananao e papatiso, ma o mai i luma ma loto momomo ma agaga salamo … ia talia i totonu o lana ekalesia e ala i le papatisoga.”8
O le lotomaualalo e lilifa atu ai le loto o le soo i le salamo ma le usiusitai. Ona mafai ai lea e le Agaga o le Atua ona aumaia le upumoni i lena loto, ma o le a ia maua le talileleia.9
O le leai o se lotomaualalo lea e sili ona saofagā i le faataunuuina o le valoaga a le Aposetolo o Paulo i nei aso e gata ai:
“Aua e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i matua, o e le faafetai, o e amio leaga,
“O e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei.”10
O le valaaulia a le Faaola e aoao ia te Ia o se valaaulia ia fulitua i faatosinga a le lalolagi ma ia avea e faapei o Ia—e agamalu ma lotomaualalo ma agavaivai. Ona mafai lea ona tatou amoina Lana amo ma iloa ai e faigofie—o le avea ma soo e le o se avega mamafa ae o se olioli, e pei ona sa matuai mamana ona aoao mai ai pea i tatou e Peresitene Nelson.
Mamanu o le Alofa
O le aoao e uiga ia Keriso ma Ana ala e taitai ai i tatou ia iloa ma alolofa ia te Ia.
Sa Ia faasino mai e ala i faataitaiga e faapea, faatasi ai ma se uiga faaalia o le lotomaualalo, e mafai ai ona iloa ma alofa i le Atua le Tama ma o tatou loto atoa, ma alolofa i isi a o tatou alolofa ia i tatou lava, e le taofia lava se mea. O Lana galuega i le lalolagi lea na Ia tuu uma ai Lona finagalo ma Lona tino i luga o le fatafaitaulaga, o se mamanu lea mo le faaaogaaga o nei mataupu faavae, lea o loo faavae ai Lana talalelei. O mataupu faavae uma ia o ni vaaiga i fafo ma e faatatau i le ala tatou te fesootai ai i isi, ae le o le sailia o le faamalieina o le tagata lava ia po o se mamalu.
O le tulaga mata’ina o lea mea, a tatou taulai atu a tatou taumafaiga aupito sili i le alofa atu i le Atua ma isi, o le a mafai ai ona tatou iloa lo tatou lava taua moni faalelagi o ni atalii ma afafine o le Atua, faatasi ai ma le filemu ma le olioli atoa e maua mai i lenei aafiaga.
E avea i tatou ma e ua tasi ma le Atua ma le tasi ma le isi e ala i le alofa ma le auauna atu. Ona mafai ai lea ona tatou maua le molimau a le Agaga Paia o lena alofa mama, le fua lea na talanoa ai Liae e “sili ona suamalie, i lo isi fua uma ua ou tofo i ai.”11
O le palealii na maua e Keriso e ala i le tuuina atu ma faia uma mea i Lona tomai e faatu ai le mamanu o le alofa i le Tama ma le alofa ia i tatou, o le mauaina lea o le mana uma, e oo lava i mea uma ua i le Tama, o le faaeaga lea.12
O lo tatou avanoa e faafailele i o tatou agaga se alofa tumau o le Atua ma o tatou tuaoi, e amata i le aiga i mausa paia o le fesootai ma le Tama i aso taitasi i tatalo faaletagata lava ia ma faaleaiga i le suafa o Lona Alo Pele e Toatasi na Fanaua, aoao faatasi e uiga ia i La’ua e ala i suesuega faaletagata lava ia ma faaleaiga o tusitusiga paia, tausia faatasi o le aso Sapati, ma le umia e le tagata lava ia o se pepa faataga o aoga o le malumalu ma faaaogaina faatasi i le tele tatou te mafai ai.
A o tatou tuputupu a’e taitoatasi i lo tatou malamalama ma le alofa o le Tama ma le Alo, tatou te tuputupu a’e i le talisapaia ma le alofa mo le tasi ma le isi. E matuai faateleina lo tatou tomai e alofa ai ma auauna atu i fafo atu o o tatou aiga.
O mea tatou te faia i le fale o le ute moni lea o le avea ma soo olioli tumau. O faamanuiaga aupito matagofie o le talalelei toefuataiina ua ma olioli ai ma lo’u toalua o Gladys i lo matou aiga, na maua mai le aoao ia iloa ma faamamalu le Atua i le fale ma faasoa atu Lona alofa i le ma fanau.
Mamanu o le Auauna Atu
O le alofa i le Atua ma le auauna atu i le tasi ma le isi e faafaileleina i le fale ma le auauna atu i isi i fafo atu o le fale, e oo mai le taimi e faatupulaia ma avea ai ma uiga faaalia o le alofa mamā.
E oo mai faatasi ma le mamanu o le auaunaga tuuto i le malo o le Atua lea ua faaalia i o tatou luma e perofeta soifua ma aposetolo a le Alii. E avea i tatou ua tasi ma i latou.
Ona mafai ai lea ona tatou vaai, e ala atu ia te i latou, i le Alii “i mafaufauga uma,” ina ia tatou “le masalosalo” ma “le matata’u ai.”13
E faapei o perofeta soifua ma aposetolo a le Alii, e mafai ona tatou o atu ma “loto ua tumu i le alofa mama i tagata uma, ma … i le auaiga o le faatuatua, [faatasi ai] ma le amiomama e teuteuina ai [o tatou] mafaufauga e le aunoa; … [ma lo tatou] lototele ua solo malosi i luma o le Atua; ma o le a to ifo i luga o lou agaga le mataupu faavae o le perisitua e pei o le sau mai le lagi.”
Faatasi ai ma perofeta soifua ma aposetolo a le Alii, tatou te mafai ai foi ona auai i se li’o amiomama o le faatuatua e faamalolosia e le auauna atu faapaiaina lea “o le a avea le Agaga Paia ma a [tatou] soa e le aunoa, ma o [tatou] tootoo o le a avea ma se tootoo le feliuliua’i o le amiotonu ma le upumoni; ma o [lo tatou] puleaga o le a avea ma se puleaga tumau ma e aunoa ma se ala faamalosia, o le a tafe mai ia i [tatou] e faavavau ma faavavau lava.”14 Aua o le folafolaga lenei o le fuafuaga a le Tamā. I le suafa o Iesu Keriso, amene.