O Le Mataupu Faavae e Faavavau o le Alofa

Saunia e Elder Hugo Montoya

O Le Fitugafulu

E moni le alofa o lo tatou Tama Faalelagi mo Ana fanau taitoatasi. O loo i ai o Ia iina mo i latou taitoatasi.

O le mataupu faavae e faavavau o le alofa e faaalia e ala i le ola ai i poloaiga sili e lua: alofa i le Atua ma lou loto atoa, agaga, mafaufau, ma le malosi ma le alofa i lou tuaoi e pei o oe lava ia te oe.¹

Ou te manatua lo’u taumalulu muamua sa ou nofo ai iinei i Iuta—sa i mea uma le kiona. O le sau mai le Toafa o Sonoran, o aso muamua sa ou fiafia i ai, ae ina ua mavae ni nai aso, sa ou iloa ai e tatau ona ou alapo e aveese le kiona mai le auala taavale.

I se tasi taeao, i le ogatotonu o se afā kiona, sa ou afu, i le suōina o le kiona, ma sa ou vaaia lo’u tuaoi o tatalaina lana faletaavale i le isi itu o le auala. E matua o ia nai lo au, o lea sa ou mafaufau ai afai ou te vave uma, e mafai ona ou fesoasoani ia te ia. O lea na sii ai lo’u leo, ma sa ou fesili atu ia te ia, “Uso, e te manaomia se fesoasoani?”

Sa ataata o ia ma fai mai, “Faafetai lava, Elder Montoya.” Ona ia toso mai lea o se masini feula kiona mai lona fale taavale, faaola le afi, ma i ni nai minute sa ia aveesea uma ai le kiona i luma o lona fale. Ona ia kolosia lea o le auala ma lana masini ma fesili mai ia te au, “Elder, e te manaomia se fesoasoani?”

Faatasi ai ma se ataata sa ou fai atu, “Ioe, faafetai lava.”

Tatou te naunau e fesoasoani i le tasi ma le isi ona tatou te alolofa i isi, ma o manaoga o lo’u uso e avea ma o’u manaoga ma o’u manaoga e avea ma ona. Po o le a lava le gagana e tautala ai lo’u uso po o fea le atunuu e sau ai, tatou te alolofa i le tasi ma le isi ona o i tatou o uso, o fanau a le Tama e tasi.

Ina ua fofogaina mai auaunaga, na saunoa Peresitene Russell M. Nelson, “O le a tatou faatinoina se faiga fou atu, ma paia atu e tausia ai ma auauna atu i isi.”² Ia te au, o le paia atu o lona uiga o le sili atu ona patino, loloto atili, e pei o le ala a le Faaola: “Ia outou fealofani,”³ taitoatasi.

E le lava le aloese mai le avea ma se maa tu’ia mo isi; e le lava le matau o e le tagolima i luga o le auala ma pasi ane. Ia tatou faaaogaina avanoa uma e fesoasoani ai i o tatou tuaoi, e tusa lava pe na o le pau lea o le taimi tatou te feiloai ai ia te ia i lenei olaga.

Ua avea i se ā le alofa i le Atua ma poloaiga sili muamua?

Ou te manatu ona o Lona uiga ia i tatou. O i tatou o Ana fanau, Na te vaaia lo tatou manuia, tatou te faalagolago ia te Ia, ma o Lona alofa e puipuia i tatou. O Lana fuafuaga e aofia ai le faitalia; o lea, atonu o le a tatou faia ai ni mea sese.

Na te faatagaina foi i tatou ina ia tofotofoina ma faaosoosoina. Ae pe o tatou faia ni mea sese pe pauu atu i faaosoosoga, ua saunia e le fuafuaga se Faaola ina ia mafai ai ona togiolaina i tatou ma toe foi atu i le afioaga o le Atua.

O faigata i o tatou olaga e mafai ona faaosofia ai le masalosalo e uiga i le faataunuuga o folafolaga na faia ia i tatou. Faamolemole ia faalagolago i lo tatou Tama. Na te tausia lava Ana folafolaga, ma e mafai ona tatou aoao i mea e finagalo o Ia e aoao mai ia i tatou.

E tusa lava pe a tatou faia le mea sa’o, o tulaga i o tatou olaga e mafai ona suia mai le lelei i le leaga, mai le fiafia i le faanoanoa. E tali mai le Atua i a tatou tatalo e tusa ai ma Lona alofa mutimutivale ma le alofa e le iu ma i Lana lava taimi.

O le vaieli lea na inu ai Elia na mago.⁴
Ua gau le aufana uamea lelei a Nifae.⁵
Sa faailogatagata ma tuliese mai le aoga se tamaitiiti laitiiti.
O se tamaitiiti ua leva ona faatalitali i ai na maliu i totonu o ni aso o le fanau mai.

E suia tulaga.

Pe a suia tulaga mai le manuia ma le lelei i le faaletonu ma le lē lelei, e mafai lava ona tatou fiafia aua e le faalagolago le fiafia i tulaga ae o o tatou uiga faaalia i tulaga. Na saunoa Peresitene Nelson, “O le olioli tatou te lagonaina e itiiti lava se mea e faatatau i tulaga o o tatou olaga ao mea uma o loo faatatau i le taulaiga o o tatou olaga.”⁶

E mafai ona tatou nofonofo ma faatalitali mo tulaga e suia i latou lava, pe e mafai ona tatou vaavaai mo, ma aumaia ni tulaga fou.

Sa savali atu Elia i Sarefata, lea na avatu ai e se fafine ua oti lana tane se meaai ma vaiinu.⁷
Sa faia e Nifae se aufana laau ma tuli manu e aai ai.⁸
Sa saofai le tamaitiiti e faalogologo ma tusi ni faamatalaga i autafa o le faamalama, ma o le asō o ia o se faiaoga o le aoga tulagalua.
Ua atiina ae e le ulugalii se faatuatua tele i le Faaola o Iesu Keriso ma faalagolago i le ata o le faaolataga. O lo laua alolofa mo le tamaitiiti ua leva ona faatalitali i ai lea na maliu faafuasei e sili atu nai lo lo laua faavauvau.

Pe a ou faalogo i fesili “Tama Faalelagi, o e i ai moni iina? Ma o e faafofoga ma tali mai i tatalo a tamaiti [uma]?,”⁹ ou te fia tali atu: “Sa i ai o Ia, o loo i ai o Ia, ma o le a i ai pea o Ia iina mo oe ma a’u. O a’u o Lona atalii, o Ia o lo’u Tama, ma o loo ou aoao ia avea ma se tamā lelei, e pei o Ia.”

Ma te taumafai lava ma lo’u toalua ia i ai iina mo le ma fanau i soo se taimi, i soo se tulaga lava, ma i soo se auala. E tulaga ese tamaiti taitoatasi; e tele lo latou taua i le Atua, ma e tusa lava po o a o latou luitau, agasala, ma vaivaiga o i ai, e alofa le Atua ia i latou, ma e faapena foi i ma’ua.

Ina ua ou mauaina lenei valaauga o se Pulega Aoao, i le aso mulimuli a o lei oo i la ma malaga i Sate Leki sa faatasia la’u fanau uma ma o latou aiga i lo matou fale mo se afiafi faaleaiga, lea sa ma faaalia atu ai lo ma’ua alolofa ma le lotofaafetai. Ina ua uma le lesona, sa ou tuuina atu se faamanuiaga faaleperisitua i la’u fanau taitoatasi. Sa maligi loimata o tagata uma. Ina ua uma faamanuiaga, sa faailoa mai e lo’u atalii ulumatua upu o le lotofaafetai mo tagata uma mo le alofa tele na ma tuuina atu ia i latou mai le aso na latou fananau mai ai seia oo mai i lena taimi.

Faamanuia lau fanau, tusa pe ua 5 pe 50 tausaga lo latou matutua. Ia faatasi ma i latou; ia i ai mo i latou. E ui o le tuuina atu [o le tausiga] o se tiutetauave ua faavaeina e ala i le mamanu faalelagi, ae e le tatau ona galo ia i tatou ona faasoa atu se taimi fiafia ma a tatou fanau.

E moni le alofa o lo tatou Tama Faalelagi mo Ana fanau taitoatasi. O loo i ai o Ia iina mo i latou taitoatasi. Ou te le iloa pe faapefea ona Ia faia, ae o loo Ia faia. O Ia ma Lana Ulumatua ua tasi i le faia o le galuega ma le mamalu o le Tama “ia aumaia le tino ola pea ma le ola faavavau o le tagata.”¹⁰ Ua La auina mai ia i tatou le Agaga Paia e taiala i tatou, e lapatai i tatou, ma faamafanafana i tatou pe a tatau ai.

Sa Ia faatonuina Lona Alo Pele e foafoa lenei lalolagi matagofie. Sa Ia faatonuina Atamu ma Eva ma tuu atu ia i laua lo la faitalia. Sa Ia auina mai avefeau mo le tele ma tele o tausaga ina ia mafai ona tatou maua Lona alofa ma Ana poloaiga.

Sa i ai o ia i le Vao Paia i le taliina o le fesili faamaoni a Iosefa talavou ma valaau mai ia te ia i lona igoa. Na Ia fetalai mai: “O Lo’u Atalii Pele Lenei. Faalogo ia te Ia!”¹¹

Ou te talitonu o le faatinoga silisili o le alofa o le Atua mo i tatou na tupu i Ketesemane, lea na tatalo ai le Alo o le Atua soifua, “Lo’u Tama e, afai e mafai, ia ave ese lenei ipu ia te au: a e aua le faia lo’u loto, a o lou finagalo.”¹²

Ua ou matauina o le vaega itiiti e mafai ona ou malamalama i ai i le Togiola a Iesu Keriso e faateleina ai lo’u alofa mo le Tama ma Lona Alo, e faaitiitia ai lo’u manao e agasala ma ia le faalogogata, ma faateleina ai lo’u naunau ia lelei atu ma faia ia sili atu ona lelei.

Sa savali Iesu e aunoa ma se fefe ma e aunoa ma se masalosalo i Ketesemane, faalagolago i Lona Tama, ma le iloaina e tatau ona Ia solia na o Ia le soligavine. Sa Ia onosaia tiga uma ma le faalumaina. Sa tuuaia, faamasinoina, ma faasatauroina o Ia. I le taimi o Ona lava tiga ma puapuaga i luga o le satauro, sa taulai atu Iesu i manaoga o Lona tina ma Lona soo pele. Na Ia ofo atu Lona ola.

I le aso lona tolu sa toetu mai ai o Ia. Ua gaogao le tuugamau; O loo tu o Ia i le itu taumatau o Lona Tama. La te faamoemoe o le a tatou filifili e tausia a tatou feagaiga ma toe foi atu i lo La’ua afioaga. O lenei esetete lona lua e le o lo tatou esetete faaiu lea; e le o i tatou o ni o o lenei aiga faalelalolagi, ae o i tatou o ni tagata e faavavau o loo ola i ni aafiaga le tumau.

O Iesu o le Keriso, o le Alo o le Atua soifua. O loo soifua o Ia, ma ona o loo soifua o Ia, o le a ola faavavau fanau uma a le Atua. Faafetai i Lana taulaga togiola, ua mafai ai ona tatou nonofo faatasi ma i La’ua. I le suafa, o Iesu Keriso, amene.