Ina Ia Latou Iloa Oe
O lo’u faanaunauga faamaoni ia outou iloa Iesu i Ona mau suafa ma ia outou avea e faapei o Ia.
I ni nai tausaga talu ai, sa i ai so’u aafiaga na suia ai le olaga i le taimi o le sauniga faamanatuga i le matou uarota i Arisona. A o ta’u mai i le tatalo o le faamanatuga lo tatou loto ina “ia ave i [o tatou lava luga] le suafa o [Iesu Keriso],”1 sa faamanatu mai ia te a’u e le Agaga Paia faapea o Iesu e tele ona suafa. Ona oo mai ai lea o le fesili lea i lo’u loto: “O le fea suafa o Iesu e tatau ona ou tauaveina i o’u lava luga i le vaiaso lenei?”
E tolu suafa na oo mai i lo’u mafaufau, ona ou tusia lea i lalo. O na igoa taitasi e tolu o loo i ai uiga faaKeriso ia sa ou manao e atia’e atoatoa. I le vaiaso na sosoo ai, sa ou taulai atu i na suafa e tolu ma sa ou taumafai e opoina o latou uiga ma amioga e o faatasi ai. Talu mai lena taimi, ua faaauau pea ona ou faia lena fesili e avea o se vaega o la’u lava tapuaiga patino: “O le fea o suafa o Iesu e tatau ona ou tauaveina i o’u lava luga i lenei vaiaso?” O le taliina o lena fesili ma le taumafai e atia’e uiga fesootai faaKeriso ua faamanuiaina ai lo’u olaga.
I Lana Tatalo Faatoga maoae, sa faaalia ai e Iesu le upumoni taua lenei: “Ma o le ola e faavavau foi lenei ia latou iloa oe le Atua moni e toatasi atoa ma le ua e auina mai o Iesu Keriso lea.”2 O le asō ou te fia faasoa atu ia te outou faamanuiaga ma le mana e maua mai le iloa o Iesu Keriso e ala i Ona mau suafa.
O se tasi ala faigofie tatou te iloa ai se tasi o le aoaoina lea o latou igoa. Na i ai se faaupuga faapea, “o le igoa o se tagata o se mea aupito suamalie ma se faaleoga e sili ona taua i soo se gagana.”3 Pe ua i ai ea sou aafiaga i le valaauina o se tagata i se igoa sese po o le galo foi o o latou igoa? Sa i ai se taimi na ma valaauina ai ma lo’u toalua o Alexis, se tasi o le ma fanau ia “Lola.” Ae paga lea, atonu ua outou mate’ia, o Lola o le matou taifau! Pe lelei pe leaga le taunuuga, o le galo o le igoa o se tagata e ta’u atu ai i lena tagata atonu e te le iloa lelei i latou.
Na silafia e Iesu ma ta’u tagata i o latou igoa. Ia Isaraelu anamua, na fetalai le Alii, “Aua le fefe: aua ua ou faatauina oe, ua ou valaauina oe i lou lava igoa; e faia oe mo’u.”4 I le taeao o le Eseta, o le molimau a Maria o le Keriso toetu sa faamautuina ina ua ta’ua e Iesu o ia i lona igoa.5 E faapena foi, sa valaau e le Atua ia Iosefa Samita i lona igoa a o tali atu ai i lana tatalo o le faatuatua.6
I nisi tulaga, na tuu atu e Iesu i Ona soo ni igoa fou na ogatusa ma lo latou natura, malosiaga, ma gafatia. Na tuu atu e Ieova ia Iakopo le igoa foi o Isaraelu, o lona uiga “o se ua manumalo faatasi ma le Atua” po o le “faamuamua le Atua.”7 Na tuu atu e Iesu ia Iakopo ma Ioane le igoa o Poaneki, o lona uiga o “tagata faititili.”8 O le silasila atu i lona tulaga ta’ita’i, na avatu ai e Iesu ia Simona le igoa o Sefa po o Peteru, o lona uiga o se papa.9
E faapei lava ona silafia e Iesu i tatou taitoatasi i se igoa, o se tasi o auala e mafai ona iloa atili ai Iesu o le “aoaoina lea o Ona mau suafa. Faapei o igoa o Isaraelu ma Peteru, o le tele o suafa o Iesu o faalaniga e fesoasoani tatou te malamalama ai i Lana misiona, faamoemoega, amioga, ma uiga. A oo ina tatou iloa le mau suafa o Iesu, o le a sili ona tatou malamalama i Lana misiona paia ma Ana amioga lē faapito’au. O le iloa o ona mau suafa e musuia ai foi i tatou ia avea atili e faapei o Ia—e atia’e uiga faaKeriso ia e aumaia ai le olioli ma le faamoemoe i o tatou olaga.
I ni nai tausaga ua mavae, sa suesue ai e Peresitene Russell M. Nelson ia mau uma e faatatau ia Iesu Keriso i le Taiala o Autu.10 Ona ia valaaulia lea o talavou matutua e suesue mau lava nei. E tusa ai ma le mau suafa o Iesu, na saunoa Peresitene Nelson, “Suesue i mea uma e uiga ia Iesu Keriso e ala lea i le saili ma le agaga tatalo ma le filiga ia malamalama po o a uiga o Ona faalaniga ma suafa taitasi eseese mo oe lava ia .”11
I le mulimuli ai i le valaaulia a Peresitene Nelson, sa amata ai ona ou atia’e la’u lava lisi o le mau suafa o Iesu. O la’u lava lisi i le taimi nei ua silia ma le 300 igoa, ma ou te talitonu e tele atu isi ou te le’i mauaina.
E ui o loo i ai nisi o suafa o Iesu o loo faapolopolo mo na o Ia lava,12 ou te fia faasoa atu suafa e lima ma faalaniga e i ai lona faatatauga mo i tatou taitoatasi. Ou te valaaulia outou e atia’e sa oe lava lisi pe a oo ina e iloa Iesu i Ona mau suafa. O le faia o lena mea, o le a e iloa ai e tele isi suafa—faatasi ai ma o latou uiga faaKeriso e o faatasi ai—o le a e manao e tauave i ou lava luga o se soo o le feagaiga a Iesu.13
Muamua, o Iesu o le Leoleo Mamoe Lelei.14 O lena tulaga, e silafia e Iesu Ana mamoe,15 “e valaau ana lava mamoe i se igoa,”16 ma, o le avea ai ma Tamai Mamoe a le Atua, na ofo atu ai Lona soifua mo Ana mamoe.17 E faapena foi, e finagalo Iesu ia avea i tatou ma leoleo mamoe lelei, aemaise i o tatou aiga ma le avea ai o ni uso ma tuafafine a auaunaga. O se tasi auala tatou te faapupula atu ai lo tatou alofa mo Iesu o le fafagaina lea o Ana mamoe.18 Mo na mamoe atonu o loo taase, e o atu leoleo mamoe lelei i le vao e saili le mamoe ua leiloa ona nofo ai lea o ia faatasi ma i latou seia latou toe foi mai i le saogalemu.19 O leoleo mamoe lelei ma pe a faatagaina ai i tulaga faalelotoifale, e tatau ona tatou saili e faaalu ia lava se taimi e auauna atu ai i tagata i o latou fale. Ia tatou auaunaga, o feau tusitusia ma tekinolosi, e ao ona faaaoga e faalautele ai, ae ia le suitulaga ai le faafesootai patino.20
Lona lua, o Iesu o le Faitaulaga Sili o Mea Lelei Atalī.21 I le iloa ai ua toe o ni nai itula oo mai Lona Faasatauroga, na fetalai ai Iesu: “Ua ou fai atu nei mea ia te outou, ina ia outou maua le filemu ia te au. E maua foi outou e le puapuaga i le lalolagi, a ia outou loto tetele, ua ou manumalo i le lalolagi.”22 O le asō, a o tele ina feeseeseai talitonuga o le lalolagi ma fevaevaeai, o loo i ai se manaomia tele mo i tatou e folafola atu ma ola i le ta’uleleia, vaai i itu lelei, ma le faamoemoe. E ui i soo se faigata i lo tatou tuanai, ae faasino pea lava le faatuatua i le lumanai,23 e tumu i le faamoemoe, e mafai ai ona tatou faataunuu le valaaulia a Iesu ia tatou loto tetele.24 O le ola fiafia i le talalelei e fesoasoani tatou te avea ai ma soo o mea lelei o le a oo mai.
O se tasi o faalaniga o Iesu e Le Liu Lava, o Ananafi, ma le Aso, ma le Faavavau.25 O le Faifaipea o se uiga faaKeriso. Sa faia e le aunoa e Iesu le finagalo o Lona Tama,26 ma faaloaloa mai pea e le aunoa Lona aao e laveai, fesoasoani, ma faamalolo i tatou.27 A tatou faifai pea atili le ola ai i le talalelei, o le a avea atili i tatou e faapei o Iesu.28 E ui o le a feagai le lalolagi ma si’itaga tetele o le lilifa atu i mea lauiloa a o felafoaiina tagata e pei o peau, ma feaveaiina i matagi uma lava o mataupu,29 o le ola faifai pea i le talalelei e fesoasoani ia i tatou e mausali ai ma lemaluelue i le taimi o afa o le olaga.30 E mafai foi ona tatou faapupula atu le faifai pea e ala i le taliaina o le valaaulia a Peresitene Nelson ia “faaavanoa se taimi mo le Alii.”31 E maua le malosiaga faaleagaga tele mai mea iti faigofie32 e pei o le atiina a’e o “mausa paia ma faiga faavae amiotonu”33 o le tatalo i aso taitasi, salamo, suesue o tusitusiga paia, ma le auauna atu i isi.
Lona fa, o Iesu o Le Paia o Isaraelu.34 O le soifuaga o Iesu o se mamanu o le paia. A tatou mulimuli ia Iesu, e mafai ona avea i tatou ma sē paia i Isaraelu.35 Tatou te faateleina i le pa’ia pe a tatou asiasi e le aunoa i le malumalu, lea, e vane ai le “E Paia i le Alii” i luga a’e o faitotoa ulufale uma. O taimi uma tatou te tapuai ai i totonu o le malumalu, tatou te tuua ua faaeeina i le mana tele e faia ai o tatou fale ma nofoaga o le paia.36 Mo soo se tasi e le o i ai se pepa faataga e ulufale ai i le malumalu paia, ou te valaaulia oe e vaai lou epikopo ma tapena oe lava e ulu atu pe toe foi atu i lena nofoaga paia. O le taimi i le malumalu o le a faateleina le paia i o tatou olaga.
Toe tasi le suafa mulimuli o Iesu o Ia e Faamaoni ma le Moni.37 E pei lava ona faamaoni ma moni Iesu e le aunoa, o Lona finagalo moni ia tatou faaalia nei uiga auaumama i o tatou olaga. Pe a oo ina tautevateva lo tatou faatuatua, e mafai ona tatou ole atu ia Iesu, “Le Alii e, laveai mai au,” e pei lava ina amata magoto ifo Peteru i le sami sousou o Kalilaia.38 I lena aso, sa aapa ifo ai Iesu e laveai le soo o le a malemo. Na Ia faia foi lena mea mo a’u, ma o le a Ia faia foi mo oe. Aua lava ne’i e fiu ia Iesu—O le a le fiu lava o Ia ia te oe!
Pe a tatou moni ma faamaoni, ua tatou mulimuli i le valaau a Iesu “ina tumau ia outou ia te au,” lea foi e mafai ona faauiga “nonofo faatasi ma au.”39 Pe a faafetaia’ia i tatou i fesili, pe a ulagia i tatou ona o lo tatou faatuatua, pe a tusitusilima mai tamatamailima o le faatauemu ia i tatou e i latou o loo i fale tetele ma le ateatea o le lalolagi, tatou te tumau faamaoni ma tatou te tumau moni. I o tatou taimi ua valaau mai le Faaola: “Vaai mai ia te a’u i mafaufauga uma; aua le masalosalo, aua le fefe.”40 A o tatou faia, Na te aumaia ia i tatou le faatuatua moomia, faamoemoe ma le malosi e tumau faatasi ai ma Ia.41
Uso e ma tuafafine pele, e finagalo Iesu ia tatou iloa o Ia aua ua na o lona suafa lava i lalo o le lagi e mafai ona faasaoina ai i tatou.42 O Ia o le Ala, ma le Upumoni, ma le Ola—e le alu atu lava se tasi i le tama, pe a le ui mai ia te Ia.43 Ua na o Iesu lava le ala! Ona o lena le mafuaaga, ua talo mai ai Iesu “O mai ia te au,”44 “Mulimuli mai ia te au,”45 “Savavali faatasi ma au,”46 ma “Aoao ia te au.”47
Faatasi ai ma lo’u loto atoa, ou te molimau atu ia Iesu Keriso—o loo soifua o Ia, e alofa o Ia ia te outou, ma Na Te silafia oe i lou igoa. O Ia o le Alo o le Atua,48 le Alo Pele e Toatasi o le Tama.49 O Ia o lo tatou Papa, lo tatou Olo, lo tatou Talita, lo tatou Maluapapa, ma o lo tatou Lavea’i.50 O Ia o le Malamalama e Susulu i le Pogisa.51 O Ia o lo tatou Faaola52 ma lo tatou Togiola.53 O Ia o le Toetu ma le Ola.54 O lo’u faanaunauga faamaoni ia outou iloa Iesu i Ona mau suafa ma ia outou avea e faapei o Ia a o outou faata’ita’ia Ona uiga paia faaleatua i o outou olaga. I le suafa o Iesu Keriso, amene.