Taulai atu i le Malumalu

Saunia e Peresitene Russell M. Nelson

Peresitene o Le Ekalesia a Iesu Keriso o le Au Paia o Aso e Gata Ai

Ou te folafola atu o le faateleina o taimi e i ai i totonu o le malumalu o le a manuia ai lou olaga i auala e le mafai e se isi lava mea ona e manuia ai.

Uso e ma tuafafine pele, i le gasologa o nei sauniga ofoofogia e lima o le konafesi aoao, ua tatou toe lagonaina ai foi le matala mai o lagi! Ou te tatalo ua outou faamaumauina a outou uunaiga ma o le a tulitatao pea na mea. Ua saunia i taimi uma lo tatou Tama Faalelagi ma Lona Alo Pele, o Iesu Keriso, e fesoasoani ia te oe. Ou te uunaia outou ia faateleina a outou taumafaiga e saili atu i le La fesoasoani.

Talu ai nei, sa ma maua ai ma Sister Nelson le avanoa e muai matamata ai i le vaega fou o le vaitau 4 o ata faasolo o le Tusi a Mamona. ¹ Na musuia i ma’ua e na ata! Se’i o’u faaali atu lava se vaega puupuu mai le ata o loo faaalia ai le faaali atu o le Faaola i le au sa Nifae.

E taua tele le filifili o le Faaola e faaali atu i tagata i le malumalu. O Lona maota lea. E faatumulia i Lona mana. Ia ‘aua lava ne’i see ese le tatou vaai mai mea o loo faia e le Alii mo tatou i le taimi nei. O loo Ia faia Ona malumalu ia mauagofie atili. O loo Ia faatelevaveina le saoasaoa o loo tatou fausiaina ai malumalu. O loo Ia faateleina lo tatou tomai e fesoasoani ai e faapotopoto Isaraelu. O loo Ia faafaigofieina foi mo i tatou taitoatasi ona faamamāina faaleagaga. Ou te folafola atu o le faateleina o taimi e i ai i totonu o le malumalu o le a manuia ai lou olaga i auala e le mafai e se isi lava mea ona e manuia ai.

E 168 malumalu o loo tatou faaaogaina i le taimi nei ma le 53 malumalu fou o loo fausiaina, ma le isi 54 o loo i ai i le vaega muamua o le mamanuina!² Ou te fiafia lava e faasilasila atu a tatou fuafuaga e fausia se malumalu i nofoaga taitasi nei: Busan, Korea; Naga, Filipaina; Santiago, Filipaina; Eket, Nigeria; Chiclayo, Peru; Buenos Aires City Center, Atenitina; Londrina, Pasila; Ribeirão Prêto, Pasila; Huehuetenango, Kuatemala; Jacksonville, Florida; Grand Rapids, Michigan; Prosper, Texas; Lone Mountain, Nevada; ma Tacoma, Uosigitone.

O loo tatou fuafua foi e fausia ni malumalu se tele i nofoaga tetele tu taulaga ua filifilia lea o loo i ai se lu’itau tele i taimi o femalagaa’iga i se malumalu o loo faaaoga. O lea la, ou te fiafia ai e faasilasila atu ni nofoaga faaopoopo se fa e latalata i le Aai o Mekisiko ia o le a fausiaina ai ni malumalu fou i Cuernavaca, Pachuca, Toluca, ma Tula.

O’u uso e ma tuafafine pele, ia outou taulai atu i le malumalu i auala tou te le’i taulai atu ai lava muamua. Ou te faamanuia ia te outou ia outou latalata atili i le Atua ma Iesu Keriso i aso uma. Ou te alofa ia te outou. Ia faatasi le Atua ma outou se’ia tatou toe feiloai foi, ou te tatalo ai i le suafa paia o Iesu Keriso, amene.