O Le Aoaoga Faavae Autu o le Avea Ai Ma Ni Ō
O le aoaoga faavae autu o le avea ma ni ō e tiu i le mea lenei: Ua tasi a’u ma Keriso i le feagaiga o le talalelei.
Ou te fia tautala e uiga i le mea ua ou faaigoaina o le aoaoga faavae autu o le avea ma ni ō i Le Ekalesia a Iesu Keriso o le Au Paia o Aso e Gata Ai. O lea aoaoga faavae autu e tolu vaega: (1) o le matafaioi o le avea ma ni ō i le faapotopotoina o le nuu o le feagaiga a le Alii, (2) o le taua o le auauna atu ma le ositaulaga i le avea ma ni ō, ma le (3) o le totonugalemu o Iesu Keriso i le avea ai ma ni ō.
O Le Ekalesia a Iesu Keriso o le Au Paia o Aso e Gata Ai i lona uluai amataga, sa tele i Amerika papa’e i Matu, ma Au Paia Europa i matu ma se vaega o Tagatanuu Amerika, Amerika Aferika, ma Tagata o Atumotu o le Pasefika. O le taimi nei, i le toe valu tausaga aulia le lona 200 tausaga o lona faavaeina, ua matuai faateleina le Ekalesia i le faitauaofai ma le eseese i Amerika i Matu ma faapena foi i le lalolagi atoa.
A o faaauau pea le vave faatupula’ia o le faapotopotoina ua loa ona valoia o le nuu o le feagaiga a le Alii, o le Ekalesia o le a aofia moni ai atunuu uma, ituaiga, gagana, ma nuu.1 E le’i fuafuaina lenei mea pe o se paluga na faifaamalosi ae o se mea na tatou faamoemoe o le a tupu lava ia, e faailoa mai ai o loo ao mai e le upega o le talalelei mai atunuu uma ma nuu uma.
Ua faamanuiaina i tatou i le vaai atu i le aso ua faatuina ai foi ma Siona i konetineta uma ma i o tatou lava nuu tuaoi. E pei ona saunoa le Perofeta o Iosefa Samita, sa taulai atu ma le sagisagi fiafia le nuu o le Atua i tupulaga uma mo lenei aso, ma “o i tatou o tagata alofagia ua filifilia e le Atua e aumaia ai le mamalu o Aso e Gata Ai.”2
I le tuuina mai ai ia i tatou o lenei avanoa, e le mafai ona tatou faatagaina ai se faailogalanu, faailogatagata faivaega, po o isi faiga faaitu’au e i ai i totonu o le Ekalesia o aso e gata ai a Keriso. Na poloai mai le Alii, “Ia tasi outou; ma afai tou te lē tasi e lē a aʼu outou.” 3 E ao ona tatou filiga i le lia’ieseina o le faailogatagata ma le faailogalanu mai le Ekalesia, mai o tatou fale, aemaise ai mai i o tatou loto. A o faatupulaia le eseese o le faitau aofai o la tatou Ekalesia, e tatau ona matuai atili mafanafana ma musuia la tatou faafeiloai. Tatou te manaomia le tasi ma le isi.4
I lana Tusi Muamua i Korinito, o loo tautino atu ai e Paulo e faapea o i latou uma ua papatisoina i le Ekalesia ua tino e tasi o Keriso:
“Aua pei o le tino ua tasi ia, ma ona itu tino e tele, a o itu tino uma, e ui ina tele, o le tino e tasi lava ia; e faapea lava Keriso.
“Aua foi o le Agaga e toatasi na papatisoina ai i tatou uma i le tino e tasi, po o Iutaia, po o Eleni, po o pologa, po o sa’oloto; ma ua faainumia i tatou uma i le Agaga e toatasi.
“Ina ne’i i ai i le tino se maseiga, a ia fetausiai faatasi uma itu tino.
“Ma pe afai e tiga le itutino e tasi, ia tiga faatasi ai itutino uma lava; po o le faamamaluina foi o le tasi itutino, ia olioli faatasi ma itutino uma lava.”5
O se faalogona o le avea ai ma ni ō e taua i lo tatou soifua manuia faaletino, faalemafaufau, ma le faaleagaga. Peitai, e mafai lava i nisi taimi e ono lagona ai e i tatou taitoatasi le le taliaina o i tatou. I taimi e faalotovaivaia ai, tatou te ono lagonaina ai e pei o le a tatou le agavaa lava mo tulaga faatonuina maualuluga o le Alii po o faamoemoega o isi.6 Atonu tatou te faifaamalosi ma le le faamoemoeina faamoemoega i luga o isi—pe o i tatou lava—ae e le o ni faamoemoega o le Alii. Atonu tatou te fesootai i ni ala maaleale faapea o le taua o le agaga e faavae i luga o ni ausiaga patino po o ni valaauga, ae e le o mea ia e fua ai lo tatou tulaga i le silafaga a le Alii. “E silasila le Alii i le loto.”7 E manatu o Ia i o tatou naunauga ma moomooga ma mea ua avea ai i tatou ma ni ō.8
Na tusia e Sister Jodi King lona lava aafiaga i tausaga ua tuanai:
“E le i i ai lava muamua ia te au se lagona faapea e le i taliaina a’u i le lotu seia oo ina amata ona tauivi lo’u toalua o Cameron ma le tulaga o le lē fanau/pā. O tamaiti ma aiga o e na masani ona aumaia ia te au le olioli e vaai atu i ai i le lotu ia ua amata ona mafua ai ona ou faanoanoa ma tiga.
“Sa ou lagonaina le pa i le leai o se tamaitiiti i o’u lima po o se ato napekini e uu. …
“O le Aso Sa aupito sili ona faigata o le ma Aso Sa muamua lava i se uarota fou. Talu ai sa leai se ma fanau, o lea sa fesiligia ai i maua pe faatoa ma faaipoipo ma o afea na ma fuafua e amata ai se ma aiga. Sa ou lelei lava i le taliina o nei fesili e aunoa ma le faatagaina o i latou e aafia ai a’u—na ou iloa lava latou te lei faamoemoe e faatiga mai.
Peitai, i lea aso Sa patino, o le taliina o na fesili sa matuai faigata lava. Faatoa uma lava ona ma iloa, i le maea ai o le loto faamoemoe, ua faamanuiaina i maua—ae toe iu ane foi—e lei maitaga lava.
“Sa ou savali atu i totonu i le sauniga faamanatuga ma le lagona nutimomoia, ma o le taliina o na fesili masani ‘fefaamasania’i’ sa faigata ia te au. …
“Ae o le Aoga Sa na matuā nuti ai lava lo’u fatu. O le lesona—sa faamoemoe e faatatau i le matafaioi paia o tina—sa vave ona suia i se sauniga o faitioga. Sa goto ifo lo’u fatu ma maligi lemu ifo o’u loimata i o’u alafau a o ou faalogo atu i tina o faitio e uiga i se faamanuiaga ou te tuuina atu soo se mea ina ia ou mauaina.
“Sa vave ona ou tuua le lotu. I le taimi muamua, sa ou le toe manao ou te toe foi i ai. Sa ou le toe manao e toe maua lena lagona o le faaesea. Ae i lena po, ina ua uma ona ma talanoa ma lo’u toalua, sa ma iloa ai o le a ma o atu pea i le lotu e le gata ona ua talosagaina ai i maua e le Alii ae ona sa ma iloa uma foi o le olioli lea e maua i le faafouina o feagaiga ma le lagonaina o le Agaga i le lotu e sili mamao atu nai lo le faanoanoa sa ou lagonaina i lena aso. …
“I le Ekalesia, ua i ai tina ua maliliu a latou tane, ua tatala faaipoipoga, ma nofofua o le au paia; i latou e i ai tagata o aiga ua pauu ese atu mai le talalelei; o tagata e i ai gasegase po o faigata tautupe; o tagata o loo aafia i le tosina atu i le itupa e tasi; o tagata o loo galulue e faatoilalo vaisu po o masalosaloga; o tagata fou ua liliu mai; o tagata faatoa siitia mai i le uarota; o ulugalii ua siitia ese fanau; ma e alu pea lava pea le lisi.
“Ua valaaulia i tatou e le Faaola ia o mai ia te Ia—e tusa lava po o a o tatou tulaga o i ai. Tatou te o mai i le lotu ia faafouina a tatou feagaiga, ia faateleina lo tatou faatuatua, ia mauaina le filemu, ma ia faia e pei ona Ia faia i le atoatoa i Lona soifuaga—o le auauna atu lea i isi o e lagona e pei e lē taliaina i latou.”9
Sa faamatala mai e Paulo e faapea o le Ekalesia ma ona tofi na tuuina mai e le Atua “ina ia faaatoatoaina ai le au paia, latou te fai ai le galuega a auauna, ia atiina ae ai le tino o Keriso:
“Seia tatou oo atu i tatou uma lava ma le lotogatasi ma i le faatuatua ma le iloa lelei o le Alo o le Atua, ina ia fai ma tagata matua, ia oo i le fua o le ua matua, e tatau ma le tumu o Keriso.”10
O se tala faanoanoa faa’ata’ata, a oo ina lagona e se tasi ua ia le ausia le tulaga silisili i itu uma o le olaga, ona fai lea o le faaiuga faapea e le o latou o ni ō le faalapotopotoga tonu na fuafuaina e le Atua e fesoasoani ia tatou agai ai i luma i le mea silisili.
Tuu i le Alii ma i latou ua Ia poloaiina e faia le faamasinoga, ae ia fiafia e alolofa ma taulima e le tasi le isi i le mea sili tatou te mafaia. Tatou fesili atu ia te Ia e faaali mai ia i tatou le ala, i lea aso ma lea aso, e “aumaia … e matitiva, ma e mumutu, ma e pipili, atoa ma e tauaso”11—o lona uiga, o tagata uma i le tausamaaga tele a le Alii.
O se vaega e lua o le aoaoga faavae autu o le avea ai ma ni ō, o a tatou lava saofaga. E ui ina seāseā tatou mafaufau i ai, ae o le tele o le avea ai o i tatou ma ni ō e sau mai a tatou auaunaga ma osigataulaga tatou te faia mo isi ma mo le Alii. O le soona taulai atu i o tatou manaoga faaletagata lava ia po o lo tatou lava sologa lelei e mafai ona le taulau ai lena faalogona o le avea ai ma ni ō.
Tatou te taumafai e mulimuli i le aoaoga faavae autu a le Faaola:
“O se fia sili ia te outou, ia fai o ia ma a outou auauna. …
“E pei o le Atalii o le tagata e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui a’i tagata e toatele.”12
O le avea ai ma ni ō e le sau a o tatou faatalitali i ai, ae a o tatou aapa atu e fesoasoani i le tasi ma le isi.
Ae paga lea, o le taimi nei, o le faapaiaina o le tagata lava ia mo se faamoemoega po o le ositaulagaina o soo se mea mo soo se isi tagata ua avea ma mea e feteenai ma uiga masani faaleaganuu. I se tusiga mo le Deseret Magazine i le tausaga na te’a nei, sa faamatala ai e le tusitala o Rod Dreher se talanoaga ma se tina talavou i Putapesi:
“O lea ou te i luga o se taavaleafi ma se … uo faatoa atoa lona 30—ta faaigoaina ia Kristina—a o ta agai atu e faatalanoa se tamaitai [Kerisiano] matua o lē, sa tatalia ma lona toalua ua maliu, ia sauaga a le setete komunisi. A o ma saalutulutu atu i magaala o le aai, e talanoa lava Kristina i le faigata ona faamaoni i uo o lana tupulaga e uiga i tauiviga sa fetaia’i ma ia o se ava ma se tina o se fanau laiti.
“O faigata o Kristina e matuai le aloa’ia lava mo se tamaitai talavou o loo aoao pe faapefea ona avea o se tina ma se ava—ae o le uiga faaalia fuaao i lana tupulaga e faapea, o faigata o le olaga o se taufaamata’u i le soifua manuia o le tagata ma e ao ona le taliaina. Pe i ai ni taimi la te taua’imisa ai ma lona toalua? E tatau la ona ia tuua o ia, o latou tala ia. Pe faaita o ia e lana fanau? E tatau la ona ia auina atu i latou i nofoaga e tausi ai tamaiti i le aso.
“E popole Kristina ne’i le taliaina e ana uo na faigata, e oo lava i mafatiaga o se vaega masani o lona olaga—ma atonu foi o se vaega o se olaga lelei, pe afai e aoao i tatou e na mafatiaga i le ala e onosai ai, agalelei ma agaalofa. …
“… Na maua e le alii poto faapitoa i faiganuu o tapuaiga o Christian Smith i le Iunivesite o Notre Dame i lana suesuega o tagata matutua [ta’i] 18–23 tausaga, e faapea o le toatele o i latou e talitonu o le sosaiete e le sili atu ’i se aofaga o tagata taitoatasi pulefaitalia e na o le fiafia lava i le faamoemoe o le olaga.’”13
E ala i lea filosofia, soo se mea e iloa e se tasi e faigata “o se ituaiga o sauaga.”14
O le eseesega, o o tatou tuaa paionia na afua mai ai se faalogona loloto o le avea ai ma ni ō, lotogatasi, ma le faamoemoe ia Keriso e ala i osigataulaga sa latou faia e auauna ai i misiona, fauina malumalu, lafoai fale mautu ona o sauaga ma toe amata foi, ma i se anoanoai o isi ala na tuuto atu ai i latou lava ma a latou meatotino i le faamoemoe o Siona. Sa latou loto e ositaulaga e oo lava i o latou ola pe a tatau ai. O i tatou uma o e ua faamanuiaina i lo latou tutumau. E moni foi lena mea mo le toatele i ona po nei, o ē atonu ua le toe maua mafutaga ma aiga ma uo, ua faaleaogaina avanoa faigaluega, pe ua mafatia i le faailogalanu po o sauaga o se taunuuga o le papatisoina. Peitai, o lo latou taui, o se faalogona mamana o le avea ai ma ni ō o le nuu o le feagaiga. Soo se osigataulaga tatou te faia i le galuega a le Alii e fesoasoani e faamautu ai lo tatou nofoaga faatasi ma Ia, o le na ofoina mai Lona soifua e sui a’i le toatele.
O le elemene mulimuli ma sili ona taua o le aoaoga faavae autu o le avea ai ma ni ō, o le matafaioi totonugalemu lea a Iesu Keriso. Tatou te le auai i le Ekalesia ona o le na o le faaaumea, po o le a lava lona taua. Tatou te auai mo le togiolaina e ala i le alofa ma le alofa tunoa o Iesu Keriso e oo mai ai. Tatou te auai e faamautu ia sauniga o le faaolataga ma le faaeaga mo i tatou lava ma i latou tatou te alolofa i ai i itu uma o le veli. Tatou te auai e auai i se galuega faatino tele e faatuina ai Siona e sauniuni ai mo le toe afio mai o le Alii.
O le Ekalesia o le tausimea o feagaiga o le faaolataga ma le faaeaga lea na ofoina mai e le Atua ia i tatou e ala i sauniga o le perisitua paia.15 E ala i le tausiga o nei feagaiga tatou te maua ai le lagona aupito maualuga ma le loloto o le avea ai ma ni ō. Na tusia talu ai nei e Peresitene Russell M. Nelson:
“O le taimi lava e osia ai e oe ma a’u se feagaiga ma le Atua, o le a sili atu ona vavalalata lo tatou sootaga ma Ia nai lo le taimi a o lei faia a tatou feagaiga. O lenei ua fusia faatasi i tatou. Ona o la tatou feagaiga ma le Atua, o le a lē pa’u ai lava o Ia i Ana taumafaiga e fesoasoani ia i tatou, ma o le a tatou le faatinoina lava Lona onosai alofa mutimutivale ia i tatou. Ua tofu i tatou ma se nofoaga faapitoa i le loto o le Atua. …
“… O Iesu Keriso o le e faamaonia na feagaiga (tagai i le Eperu 7:22; 8:6).”16
Afai tatou te manatua lenei mea, o faamoemoega maualuga o le Alii mo i tatou, o le a musuia ai, ae e le faalotovaivaia ai.
E mafai ona tatou lagona le olioli a o tatou tulitulimata’ia, taitoatasi ma faalepotopotoga, “o le fua o le tumu o Keriso.”17 E ui i ni le fiafia ma ni to’atuga i le ala, ae o se faigamalaga maoae. Tatou te si’i a’e ma fefaamalosiaua’i le tasi ma le isi i le tulimata’i atu i le ala agai i luga, ma le iloa po o a lava faigata ma po o le a foi le faatuatuai o faamanuiaga folafolaina, e mafai lava ona “tatou lototetele; aua ua manumalo [Keriso] i le lalolagi,”18 ma ua tatou faatasi ma Ia. O le tasi ai ma le Tama, le Alo, ma le Agaga Paia o le aunoa lea o se masalosalo i le avea ai ma ni ō a’ia’i.19
O lea, o le aoaoga faavae autu o le avea ai ma ni ō, e tiu i le mea lenei—e mafai e i tatou taitoatasi ona faamautinoa atu: na maliu Iesu Keriso mo a’u; Na silafia e Ia ua ou agavaa mo Lona toto. E alofa o Ia ia te a’u ma e mafai ona faia ai le eseesega uma i lo’u olaga. A ou salamo, o le a faaliliuina a’u e Lona alofa tunoa. Ua tasi o a’u ma Ia i le feagaiga o le talalelei; ou te auai i Lana Ekalesia ma le malo; ma ou te auai i Lona faamoemoe e aumaia le togiola i fanau uma a le Atua.
Ou te molimau atu o outou o ni ō, i le suafa o Iesu Keriso, amene.