O Le Taliaina/Aofia ai i le Ekalesia e ala i vaaiga o le Lē Fanau/Pā

Saunia e Jodi King

O le feagai ai ma le lē fanau/pā na ou lagona ai e pei e le i ai so’u nofoaga i le lotu.

E le i i ai lava muamua ia te au se lagona faapea e le i taliaina a’u i le lotu seia oo ina amata ona tauivi lo’u toalua o Cameron ma le tulaga o le lē fanau/pā. O tamaiti ma aiga o e na masani ona aumaia ia te au le olioli e vaai atu i ai i le lotu ia ua amata ona mafua ai ona ou faanoanoa ma tiga.

Sa ou lagonaina le pa i le leai o se tamaitiiti i o’u lima po o se ato napekini e uu. I le Aualofa, sa faasilasila vasega taalo a tamaiti pepe, o tina sa talatalanoa, ma sa foliga mai o lesona uma lava e fesootai lava i tua i le tulaga faatina.

Sa ou lagona le lotovaivai.

Sa lei i ai sa’u tamaitiiti e aumai i le vasega taalo a tamaiti pepe. Sa lei i ai ni a’u tala faaletagata lava ia e faasoa atu ai e uiga i le tausiaina o la’u tama i le talalelei.

Sa matuai ou manao lava ia avea ma se vaega o talanoaga e uiga i le tulaga faatina ma faauo atu i tamaitai i la’u uarota, ae sa ou lagonaina sa leai se fesootaiga i lo matou va aua e le o a’u o se tina.

O le aso Sa aupito sili ona faigata o le ma aso Sa muamua lava i se uarota fou. Talu ai sa leai se ma fanau, o lea sa fesiligia ai i maua pe faatoa ma faaipoipo ma o afea na ma fuafua e amata ai se ma aiga. Sa ou lelei lava i le taliina o nei fesili e aunoa ma le faatagaina o i latou e aafia ai a’u—na ou iloa lava latou te lei faamoemoe e faatiga mai.

Peitai, i lenei aso Sa patino, o le taliina o na fesili sa matuai faigata lava. Faatoa uma lava ona ma iloa, i le maea ai o le loto faamoemoe, ua faamanuiaina i maua—ae toe iu ane foi—e lei maitaga lava.

Sa ou savali atu i totonu i le sauniga faamanatuga ma lagona nutimomoia, ma tali atu pea i na fesili masani “fefaamasania’i” sa faigata ia te au. I le taimi o le faamanatuga, sa faasolo vave la’u vaai i le au paia e vaavaai ai nisi ulugalii laiti e leai ni fanau e ono mafai ona ma fesootai i ai ma lo’u toalua. Ma te lei iloa atu lava se isi.

Ae o le Aoga Sa na matuā tata’e ai lava lo’u fatu. O le lesona—sa faamoemoe e faatatau i le matafaioi paia o tina—ae sa vave ona suia i se sauniga o faitioga. Sa goto ifo lo’u fatu ma maligi lemu ifo o’u loimata i o’u alafau a o ou faalogo atu i tina o faitio e uiga i se faamanuiaga lea sa ou fia tuu atu soo se mea ina ia ou mauaina.

Sa ou alu i fafo ma le lotu. I le taimi muamua, sa ou le toe manao ou te toe foi i ai. Sa ou le toe manao e toe maua lena lagona o le faaesea. Ae i lena po, ina ua uma ona ma talanoa ma lo’u toalua, sa ma iloa ai o le a ma o atu pea i le lotu e le gata ona ua talosagaina ai i maua e le Alii ae ona sa ma iloa uma foi o le olioli lea e maua i le faafouina o feagaiga ma le lagonaina o le Agaga i le lotu e sili mamao atu nai lo le faanoanoa sa ou lagonaina i lena aso.

Tatou Te Lagonaina Uma Lava e Pei e Lē Taliaina i Tatou i Nisi Taimi

O lena aafiaga na tupu i le fa tausaga talu ai. Ua mavae atu le taimi. Ma e le o i ai lava sa’u pepe i o’u lima po o se taga napekini i lo’u lima, ae ua ou iloa nei e sili atu nai lo se isi lava taimi ou te auai ma taliaina a’u i le lotu.

A o faagasolo pea lo’u malamalama i lo’u lava faavauvau, ua sili atu ona ou maitauina i latou o siomia a’u. O loo ou vaai faasolo pea i le au paia, ae o lea ua ou taumafai e iloa atu i latou o e o ono malaga mai i le lotu ma lagona e pei e lē taliaina i latou. Ma ua ou aoao mai ai tatou te lagonaina uma lava e pei e lē taliaina i tatou i nisi taimi.

I le Ekalesia, ua i ai tina ua maliliu a latou tane, ua tatala faaipoipoga, ma nofofua o le au paia; i latou e i ai tagata o aiga ua pauu ese atu mai le talalelei; o tagata e i ai gasegase po o faigata tautupe; o tagata o loo aafia i le tosina atu i le itupa e tasi; o tagata o loo galulue e faatoilalo vaisu po o masalosaloga; o tagata fou ua liliu mai; o tagata faatoa siitia mai i le uarota; o ulugalii ua siitia ese fanau; ma e alu pea lava pea le lisi.

Atonu e lagona e i tatou taitoatasi faapea o o tatou tofotofoga po o tulaga e taofia ai i tatou mai le auai/taliaina, ae o le mea moni lava, o o tatou olaga tulaga ese, ma o tatou mafatiaga taitoatasi o mea moni ia e sili ona taliaina ai i tatou i le Ekalesia a Keriso.

E Talia/Aofia Faatasi i Tatou ma lo Tatou Faaola

O le faamoemoega o le avea ma se tagata o le Ekalesia o le mulimuli lea ia te Ia. E talia faatasi i tatou ma lo tatou Faaola, ma talia ai foi i tatou i Lana Ekalesia. Ua Ia fetalai mai ia i tatou, “Ia outou o mai ia te au, o outou uma o e tigaina ma mafatia i avega, o a’u foi e malolo ai outou” (Mataio 11:28).

Ua valaaulia i tatou e le Faaola ia o mai ia te Ia—e tusa lava po o a o tatou laasaga. Tatou te o mai i le lotu ia faafouina a tatou feagaiga, ia faateleina lo tatou faatuatua, ia mauaina le filemu, ma ia faia e pei ona Ia faia i le atoaatoa i Lona soifuaga—o le auauna atu lea i isi o e lagona e pei e lē taliaina i latou.

Atonu e i ai taimi e na o a’u ai lava o le Aualofa e leai se fanau. Ma taimi e fesili mai ai pea tagata pe aisea ua leai ai se ma fanau. Atonu e faigata na taimi, ae e ui e tele aafiaga faigata, e sili mamao ai lava le tele o aafiaga sili atu ona fiafia.

O le lagonaina o le Agaga i le lotu ma le faaalia o lo’u alofa mo lo’u Faaola o le a sili atu i taimi uma lava nai lo soo se lagona o le tuuatoatasi. Ou te iloa o loo i ai le filemu ia Keriso. Ou te iloa e i ai le faamalologa i le auai i le lotu. Ou te iloa o loo faamanuiaina i tatou a o faaauau pea ona tatou o i ai. Atonu e ese lava o tatou tofotofoga mai tofotofoga o isi i le lotu, ae o o tatou aafiaga faaletagata lava ia e mafai ona fesoasoani ia i tatou ina ia agaalofa atili ai i isi o e atonu o loo lagona e pei e lē taliaina i latou. Ma o se taunuuga, e mafai e na aafiaga ona fusia faatasi ai i tatou.

Ou te iloa o le faasoa atu o la’u molimau ma le tatalaina o lo’u loto, e mafai ai ona ou fesoasoani i isi ia malamalama o i latou—ma tagata taitoatasi uma lava—e taliaina o tagata O Le Ekalesia a Iesu Keriso o le Au Paia o Aso e Gata Ai.