Na Toe Avea A’u Ma Tagata 14 Tausaga
A o ou i ai i pisinisi i Rochester, Niu Ioka, ISA, sa ou filifili e fai se malaga puupuu i le nofoaga o le talafaasolopito o le Ekalesia i Palamaira, pe tusa ma le 25 maila (40 km) le mamao. Sa faapitoa lava lo’u manao e vaai i le Vao Paia.
I le taimi lena, sa ou tauivi ai ma le lē mautonu i le galuega ma le aiga, ma sa ou moomoo mo se aafiaga paia a a’u lava ia o le a faamautinoa mai ai ia te a’u i se auala mamalu sa silafia a’u e Tamā Faalelagi.
O tausaga ia a o lei fausiaina le Maota Autu mo Tagata Asiasi Mai i le Mauga o Kumora ma le Malumalu o Palamaira Niu Ioka. Sa ou paka latalata i le fale o le aiga o Samita, alu ese mai le taavale, ma mulimuli i faailoga i le Vao Paia. Faatasi ai ma se tatalo i lou loto, sa ou savali atu ai i luga o le ala i le va o laau. Sa ou mafaufau loloto a o ou savali, ma sa ou tootuli foi e tatalo. Sa ou lagona le toafilemu, ae sa ou lē vaaia se malamalama faaniutu ma sa leai se lagona lofituina. Sa mamafa pea o’u fatiatama’i ma popolega i lo’u mafaufau.
Sa fai si ou lē fiafia, ma sa ou agai atu i le fale ogalaau toefauina lea sa nonofo ai le aiga o Samita. Sa ou vaai faalemafaufau ia i latou o galulue, faitauina tusitusiga paia, ma tatalo ai iina. Sa ou asiasi atu i le potu i luga ma le umukuka, faatasi ai ma Iona magalafu piliki, le laulau laupapa ma nofoa, fola laupapa, ma meaafale faatauvaa. Sa faateia au i le manatu faapea o se fale e pei o lenei sa ola ai se taulealea e 14 tausaga le matua ina ua, tumu i fesili, sa naunau o ia e alu ma ole atu i le Atua.
A o ou tu i le faitotoa, sauni ou te alu, sa ou tilotilo atu i le vao paia. Sa ou iloa na alu Iosefa Samita i le vao lata ane, tatalo, ma iloa atu le Atua le Tamā ma Lona Alo, o Iesu Keriso. Na faafuasei lava, ona ufitia au i le agaalofa mo Iosefa. Sa pei lava sa ou lagonaina le mea na lagona e Iosefa a o lei tatalo o ia. Sa leai so’u poto, ae sa ou iloa e mafai ona ou ole atu i le Atua ma maua mai ai tali (tagai Iakopo 1:4–5). Sa ou manatua le auala na ou tatalo ai ma le faatuatua a o ou talavou ma lagona ai le filemu ma le faamautinoaga. Sa ou lagonaina foi lena lava faamoemoe ma le alofa ua faatumulia ai lo’u loto. Sa pei lava ua toe 14 o’u tausaga.
Sa punou ifo lo’u ulu ma tuuina atu se tatalo le leoa o le lotofaafetai. Sa ou mauaina la’u tali. O Tamā Faalelagi sa Na silafia lelei a’u. Ma afai e faaauau pea ona ou faalagolago ia te Ia, o le a Ia faaauau pea ona tali mai.