O Afafine Tulagaese o le Atua

Saunia e Jean B. Bingham

Peresitene Aoao o le Aualofa

Mai se lauga na tuuina atu i le Konafesi a Tamaitai i le Iunivesite o Polika Iaga ia Me 5, 2017.

O le aapa atu i ni auala laiti ma le faigofie e mafai ona faamanuiaina ai o tatou aiga ma isi i ni auala tulaga ese.

O la’u tala e faatauvaa lava. I lo’u tuputupu ae, sa ou fiafia e aoao, ae ou te le i sili lava i se vasega. E le mafai ona ou mitamita i ni tomai poto. Ou te taina le piano ae na o le tautoai lava i le taina o se viiga. Ou te fiafia e asiasi i falemataaga o faatufugaga, ae o au taleni o le tusiata e gata lava i le ‘osi’osi o mamanu i totonu o la’u api. E mafai ona ou suiina se sakete e mafai ona ofuina, ae o le tuufaatasia o se suti e mautinoa lava e le oo i ai lo’u tomai.

E ui ina sa faamanuiaina a’u i le ola maloloina lelei ma fiafia e tamoe i le paka po o le aau i le vaituloto, ae ou te le i auai lava i taaloga a le aoga i soo se tulaga lava. E le i valaauliaina lava a’u i se siva a le aoga, ma e le i avea foi a’u ma se peresitene i se mea. Sa lei avea a’u ma se tasi o le vaega lauiloa, ma o se tasi o uo e mataina lona lalelei sa iloiloina lelei o’u foliga ma faapea mai, “Ia, o le a e lē matuā aulelei lava, ae e mafai ona e manaia.” I se isi faaupuga, o a’u sa na o le averesi lava.

O nisi o outou atonu e fesootai i nei ituaiga aafiaga, ma lagona faapea o oe ua na o sina averesi—atonu foi o i lalo ifo o le averesi. Afai o oe o se tagata—aemaise lava, tamaitai—atonu na e oo i na taimi o lou lē mautonu ma le lotovaivai ona e le o mafai ona e ausia atoa le ituaiga tagata e te mafai e avea ai oe.

Ae peitai, e oo lava i lo’u tulaga masani, sa silafia e Tamā Faalelagi lo’u tāua ma sa fesoasoani ia te au e amata ai ona atiina ae meaalofa ma alofa tunoa Na te silafia o le a fesoasoani ia te au e avea ai ma tagata sa Ia fuafuaina e avea ai a’u. Ia e iloa o le a saunia e lou Tamā Faalelagi mea uma e te manaomia ina ia avea ai ma se afafine tulagaese o le Atua. E mafai e i tatou uma taitoatasi ona avea ma ni tagata ofoofogia ona o la tatou taufuifui faapitoa o taleni ma tomai.

E le pei la o le lalolagi, i Lona malo e leai se tulaga o le manumalo e mo na o se toatasi pe toalua. O Ona afafine taitoatasi ua aoaoina ma saunia ma faameaalofaina i le muai olaga faatasi ai ma se gafatia ofoofogia e avea ai o se masiofo i le malo selesitila.

Lou Gafatia mo le Maoae Silisili

O le a se mea e te manao e ausia i lou olaga? O a au sini i ma faanaunauga? Afai o lau sini mo se taimi umi o le ulufale atu lea i le malo selesitila e ola e faavavau faatasi ai ma o tatou Matua Faalelagi ma tagata alofagia o aiga, o lena taulaiga e tasi o le a sili atu le mamao e avea i ai oe nai lo lou manatu nei e mafaia (tagai i le 1 Korinito 2:9).

Ua ia te oe le gafatia maoae mo le lelei auā o oe o se afafine o le feagaiga a Matua Faalelagi. O le faamaoniga o lou gafatia mo le maoae silisili na e fanau mai ma oe o le mea moni faigofie o lea sa e fanau mai i le lalolagi auā sa e faia le filifiliga i le muai olaga e talia le ata o le faaolataga a Tamā Faalelagi ma ia mulimuli i le faataitaiga a Lona Alo, o Iesu Keriso. Ma talu ai ona sa naunau Iesu Keriso e tauave i Ona luga agasala ma vaivaiga—po o lē atoatoa—o i tatou taitoatasi (tagai i le Alema 7:11–13) ma faataunuuina lena faatuatuaga paia e ala i Lana Togiola e le iu, ua mafai ona tatou maua le talitonuga uma e mafai ona avea i tatou ma mea uma na foafoaina i tatou e le Atua e avea ai. A o tatou osia ma tausia feagaiga paia, tatou te faaalia lo tatou naunau e faataunuu lena gafatia paia. Ua tatou iloa e le mafai ona tatou faia lenei mea e i tatou lava, ae e ala i le alofa o Tamā Faalelagi ma le alofa tunoa o le Faaola, e mafai ai ona tatou faataunuuina mea uma e manaomia mo le faaeaga.

O lena manatu na lagolagoina a’u ina ua valaauina a’u e avea ma Peresitene Aoao o le Aualofa. O le iloaina e le o ia te au le poto ma le tomai e faataunuu ai mea e manaomia, ae ui i lea ou te maua le mafanafana ma le malosi mai le iloa o le Atua “ua ia te ia le poto uma, ma le mana uma, i le lagi ma le lalolagi” (Mosaea 4:9) ma afai tau lava o le tatou taumafai , tau lava o lo tatou faia, e tusa lava po o le a le lē atoatoa o le a i ai, o le Alii “o le a i ai i o [tatou] lima taumatau ma lo [tatou] agavale, … Ma si’o faataamilo [tatou] e [Ana] agelu, e sapasapai [tatou] i luga” (Mataupu Faavae ma Feagaiga 84:88). Pau lava le mea Na te manaomia o le “loto ma le mafaufau malie” (Mataupu Faavae ma Feagaiga 64:34). Pe a tatou usiusitai i Ana poloaiga, o le a faamalolosia i tatou ina ia faataunuuina mea uma e manaomia i lenei olaga faapea foi ma le ulufale atu i Lona malo i le olaga a sau. O le filifiliga ina ia avea ma se soo o Iesu Keriso e aumaia ai ia i tatou le avanoa e faaaoga ai se aafiaga e sili-atu-nai-lo-le-mea-na-mafaufauina ia i latou o siomia i tatou.

Po o fea lava tatou te nonofo ai, o le faatulagana o lo tatou aiga, o le tele o a tatou teugatupe i le faletupe, po o le a le umi ua avea ai i tatou ma tagata o le Ekalesia, e mafai lava ona avea i tatou taitoatasi ma se faatosinaga malosi mo le lelei. O le ola ma le amiosao i le aiga ma le nuu, o le faaaoga o se leo malu ma upu agalelei i se tamaitiiti e i ai ni luitau po o se tagata faigata e te lua galulue, o le faaalia o ou tulaga faatonuina e ala i le tauagafau o ou laei, ma lou aapa i fafo atu o lau li’o mafanafana e faamasani atu ia i latou o e nonofo latalata ia te oe ua na o nisi lava o le tele o faiga faigofie e mafai ona tatou faia o le a uunaia ai isi e tulai a’e foi i se tulaga maualuga atu.

O i latou ua masani i le talafaasolopito o le faato’aina o nofoaga fou i le lalolagi ua iloa o le tele o taulaga sa amata o ni faatasitasiga lē faatulagaina lelei a ni alii o e na o mai e fai pisinisi ma maua ai o latou tamaoaiga. Ae ana le oo mai tamaitai i fuainumera faateteleina ma finau e faatuina lotu ma aoga ma se siosiomaga faatulagaina lelei lea na faato’ā agai moni ai lava i luma i le mea ua ta’ua o le olaga maopoopo aoaoina.

“Mo se taimi umi lava, na faalagolago ai tagata i faatosinaga amiotonu a tamaitai,” o le saunoaga lea a Elder D. Todd Christofferson o le Korama a Aposetolo e Toasefululua. “E ui e mautinoa lava e le na o le pau lea o le faatosinaga amiotonu na faia i le lalolagi, o le faavae talafeaga sa tuuina atu e tamaitai ua faamaonia le tulaga ese o le aoga i le manuia o tagata uma. Masalo, ona o se tulaga aoao, ua tele lava ina le talisapaiaina ai lenei sāo o tamaitai. … E aumaia e tamaitai faatasi ma i latou i le lalolagi se uiga auaumama faapitoa, se meaalofa faalelagi lea latou te atamamai ai i le faaosofia o na uiga e pei o le faatuatua, lototele, malamalama i lagona o isi, ma faaleleiga atili o mafutaga ma aganuu.”¹

Ua tuuina mai i tamaitai ni meaalofa lea e mafai ai ona latou vaai i faamatalaga auiliili faapea ai foi ma se ata lautele, e masani lava ona i ai i le taimi e tasi. Ia saili i na meaalofa ma faaaoga, uso pele!

Ou te manatua le ta’u mai e Peresitene James E. Faust (1920–2007) ia i tatou i lona siufofoga mauoa ae maualalo: “O outou tuafafine e le mafai ona outou iloa le mea e gata mai ai lo outou uunaiga. O outou tuafafine e faatamaoaigaina tagata uma. … O tamaitai uma taitoatasi na te aumaia sona lava malosiaga ese, ma tulaga ese i le aiga ma le Ekalesia.”²

O Le A le Uiga o le Aualofa ia te Oe?

I le avea ai ma tamaitai matutua o le O Le Ekalesia a Iesu Keriso o le Au Paia o Aso e Gata Ai, ua tatou auai faatasi i se tasi o faalapotopotoga aupito leva ma aupito telē a tamaitai i le lalolagi. Faatasi ai ma le silia ma le 7.1 million tuafafine i le lalolagi atoa, ua ia i tatou se sootaga e mafai ona faavavau.

O le Aualofa e sili atu nai lo na o se vasega i le aso Sa. E pei ona aoao mai Peresitene Faust, o se usoga na faavaeina le lagi. O se nofotaga e aoao ai. O se faalapotopotoga o la latou maliliega faavae o le tausia lea o isi e pei ona faailoa mai i la tatou mautauave, “E Le Uma Le Alofa.”

“O le auai i le Aualofa … e saunia ai se aiga e ese mai [lo tatou] aiga faalelagi, lea e mafai ai ona [tatou] faaaumea faatasi ma isi o e latou te faasoaina [o tatou] talitonuga ma tulaga faatauaina.”³

Sa i ai patupatu ma luitau i le aluga o le ala. Afai sa i ai sou aafiaga e le fiafia i le Aualofa, ia manatua o loo tatou aoao uma lava. O se nofoaga saogalemu mo tamaitai e aumai ai a latou fesili ma mo i latou o loo sailia le faasinomaga ma le faamoemoega. O se nofoaga o le a fesoasoani ia i tatou e fua mai le tagata lava ia ma faaleleia atili faatasi.

Afai e te masani i le faamatalaga ua faafou o le faamoemoega a le Aualofa, ua e iloa “o le Aualofa e fesoasoani e saunia ai tamaitai mo faamanuiaga o le ola e faavavau a o latou faateleina le faatuatua i le Tama Faalelagi ma Iesu Keriso ma Lana Togiola; [a o latou] faamalolosia tagata taitoatasi, aiga, ma auaiga e ala i sauniga ma feagaiga; ma [a o latou] galulue i le lotogatasi e fesoasoani atu ia i latou e manaomia le fesoasoani.”⁴

O le numera tasi, tatou te galulue e faataunuu o tatou gafatia paia. O le faia o lena mea, tatou te “galulue faatasi uma” e alolofa atu, “e faafiafia ma faamanuia i le suafa [o le Faaola].”⁵ Tatou te auai i le galuega o le faaolataga, lea e aofia ai galuega faifeautalai a tagata o le ekalesia, faatumauina tagata liliu mai, faamalolosia tagata ua le toe toaaaga mai, galuega faalemalumalu ma talafaasolopito o aiga, ma le aoaoina o le talalelei⁶—mea uma lava o loo ua outou faia.

O Fea Ou te Amata ai?

O fea ma e faapefea ona faia lenei galuega? A o tuu atu o tatou lima e opo ai se uso matamuli i le lotu, a o tatou aapa atu i se tamaitai talavou o loo tauivi, ao tatou galulue e fafaga ma faalavalava ma aoao se tamaitiiti i aso uma, ao tatou faasoa atu le mea e faafiafiaina ai i tatou e uiga i le talalelei toefuataiina ma o tatou tuaoi, ao tatou auai atu i le malumalu i se taimi avanoa, ao tatou galulue e atinae a tatou taleni ma le sini o le avea o se meafaigaluega a le Alii—o nei galuega uma lava ma le tele atu foi o isi auaunaga faigofie ae ‘anoa o ni vaega o le galuega o le faaolataga. Lena la tatou misiona, ma e matuā lautelē moni lava,⁷ ae e mafai ona fai pe a tatou faia taitoatasi se mea—ma tausisi i ai!

E pei ona saunoa mai Ema Samita, le uluai Peresitene Aoao o le Aualofa, i le 1842, “O le a tatou faia se mea maoae.”⁸

Mo se faataitaiga, sa mafaufau se tina talavou pisi lava i Arisona, ISA, po o le a se mea e mafai ona ia faia e fesoasoani ai i se aiga fou faatoa taunuu i lona nuu. Na vave ona ia iloaina e mafai ona ia tuuina atu ia i latou ni nai mea mo lo latou fale mautotogi gaogao. Ina ua latou asiasi atu ma lana fanau i le aiga e avatu i ai mea, sa ia iloaina ai e leai se atotupe a le tina e ave ai ana meatotino patino. Sa ia iloa o ia ma le toatele o ana uo sa i ai ni ato e le o faaaogaina, o lea sa ia tuuina ai se talosaga i luga o ala o faasalalauga faaagafesootai. O lena amataga faigofie na faateleina i se faleteuoloa e tumu i mea e manaomia e aiga e lei leva ona taunuu atu i ai, ma sa fesoasoani e fausia se sootaga matagofie i le va o nei tamaitai e eseese faatuatuaga.

Na molimau mai Sister Eliza R. Snow, le Peresitene Aoao lona lua o le Aualofa, e uiga i faamanuiaga o le Aualofa: “Afai e i ai ni afafine ma ni tina i Isaraelu o lagonaina [le faatapulaaina] i lo latou lalolagi i le taimi nei, e mafai nei ona latou maua le mau avanoa mo malosiaga uma ma le gafatia mo le faia o mea lelei lea ua sili ona faamanuiaina ai.”⁹

O lea la, o le a se mea tulaga ese o le a e filifili e fai? Filifili se mea e tusa ai ma lou taimi ma punaoa avanoa. “Aua le momo’e televave atu pe galue sili atu nai lo le malosi ua ia te oe ma ala ua tuu atu … ; ae ia e filiga “ (Mataupu Faavae ma Feagaiga 10:4). Pe o lau galuega o le faaolataga e tele lava i le aiga i lenei taimi o le olaga po o lau uunaiga e oo atu i le lalolagi atoa, po o i se mea lava i le va lena, o loo faafiafiaina le Alii i au taumafaiga pe a e taulai atu i le tautuaina o fanau a le Atua ma le sini faavavau o le toe foi atu ia te Ia o se vaaiga fou ma lelei atu o lou lava tagata faaleagaga. E pei ona faaupuina manino mai e Elder Dieter F. Uchtdorf o le Korama a Aposetolo e Toasefululua, “O le faaeaga o le tatou sini lea; o le avea ma soo o la tatou faigamalaga lea.”¹⁰

A o tatou agai i luma i lenei faigamalaga o le avea ma soo, ia tatou filifili uma e aapa atu i ni auala faatauvaa ma faigofie lea e faamanuiaina ai o tatou aiga ma isi i ni auala tulagaese. Ia tatou faatauaina a tatou fegalegaleaiga i lenei faalapotopotoga na mamanuina mai le lagi ma iloa ai ma mulimuli ia Iesu Keriso, o Ana aoaoga ma faataitaiga atoatoa o le a toe taitai atua i tatou i lo tatou Tamā Faalelagi.