Tatalo mo Uncle Dan
Sa fiafia Isapela e tatalo! I le taeao sa ia faia ai se tatalo faa “taeao manuia”. Sa ia faafetai atu ia Tamā Faalelagi mo le la susulu ma se aso fou.
I le taimi o ‘aiga o le aoauli sa ta’u atu e Isapela ia Tamā Faalelagi e uiga i le aluga o lona aso. Sa tatalo o ia mo se fesoasoani ina ia agalelei atu i ona uso pe a latou taunuu i le fale mai le aoga.
I le taimi e momoe ai sa tatalo faatasi le aiga o Isapela. Sa latou amata i taimi uma lava i le talanoa e uiga i tagata o e atonu e manaomia nisi faamanuiaga faaopoopo.
I le po nei fai mai Papa, “Faamolemole tatalo mo Uncle Dan. Ua aveesea lana galuega.”
Sa lagona e Isapela le faanoanoa. E le tele se mea na te iloa e uiga i galuega a tagata matutua, ae sa ia iloa o le aveesea o se galuega e leaga. Sa alofa o ia i le uso o lona tamā. Sa ia faia ni popukoni manaia. Ma o le taimi mulimuli na ia sau ai, sa ia faaali atu ai ia Isapela le auala e fai ai tagafeni!
“O le a ou tatalo mo ia ia maua sana galuega,” o le tala lea a Maria. O ia o se tasi o uso matutua o Isapela. O lona taimi lea e tatalo leotele ai mo le aiga.
O le aso na sosoo ai, na fesili atu ai Isapela ia Papa pe ua maua se galuega a Uncle Dan.
“E le i maua,” o le tala lea a Papa. “O nisi taimi e le tali mai ai ni tatalo i le taimi lava lena.”
“E tatau la ona tatou tatalo pea mo ia?” Na fesili ai Isapela.
Sa luelue le ulu o Papa. “O le a tāua tele lena mea ia Uncle Dan.”
O aso uma lava,sa tatalo ai pea Isapela ma ona uso mo Uncle Dan. Sa latou tatalo mo ia ia maua sana galuega. Sa latou tatalo mo ia ina ia lava se tupe mo mea na te manaomia. Sa latou tatalo mo ia ina ia lagona le alofagia.
Sa fiafia Isapela e mafai ona ia fesoasoani ia Uncle Dan i ana tatalo. O le tatalo mo ia na ia lagona ai le fiafia ma le malosi.
Sa latou fesoasoani foi ia Uncle Dan i isi auala. I se tasi aso sa latou fesoasoani ai ia Uncle Dan e faamama lona fale. I se isi aso, na tutu ai Isapela ma Mama e matamata i se ata tifaga ma Uncle Dan.
Na mavae atu vaiaso. Mulimuliane, sa maua e Papa se tala fiafia.
“O Uncle Dan e lua ana faatalanoaga o galuega i le vaiaso lenei!” Fai mai ai Papa.
Sa lagona e Isapela le fiafia i totonu. Sa fiafia o ia e mafai ona ia tatalo mo tagata sa ia alofa i ai. ●
Ata na tusia e Holly Jones