“Ma sa Ta’ua e le Alii Lona Nuu o Siona”
Saunia e Sharon Eubank
Fesoasoani Muamua i le Au Peresitene Aoao o le Aualofa
Tau ina ia tatou faataunuuina le poloaiga faaperofeta e fausia Siona—ia tasi le loto ma tasi le mafaufau, nonofo i le amiotonu, ma taumafai ia leai se mativa i totonu o i tatou.
Ata na tusia e Dan Burr
Pe a asiasi atu tagata i le Nofoaga Autu o Galuega Alofa a le Ekalesia i le Aai o Sate Leki, e masani ona ou talosagaina i latou e faitau leotele se saunoaga na faia e Iosefa Samita lea e tautau i le pito i luma: “[O se tagata o le Ekalesia] e tatau ona fafagaina i latou e fia aai, faaofu e le lavalava, e tausi fafine ua oti a latou tane, e soloia loimata o e matuaoti, e faamafanafana i e mafatia, pe o i totonu o lenei Ekalesia, pe le auai foi i se lotu, po o fea lava na te maua ai i latou.”1
Sa faia le saunoaga lea i se taimi sa matuai ogaoga le telē o le aitalafu a le Ekalesia, sa faanonofo e taitai ia tagata liliu mai i se atunuu fou, ma sa fausiaina le malumalu i Navu. Na mafai faapefea e le Perofeta o Iosefa ona mafaufau e tausi i e matitiva i lenei Ekalesia, aemaise foi nisi atu tagata? Ae e oo lava i lalo o na tulaga pagatia, na malamalama Iosefa o le tausiga o i latou e lē tagolima, e tatau lava i taimi uma ona avea ma taulaiga tutotonu o le nuu o le feagaiga a le Alii.
O Se Vaaiga Mamao o Siona
O se tasi o galuega muamua sa faia e Iosefa ina ua mavae le faatulagaina o le Ekalesia ia Aperila 1830 o se faaliliuga musuia o le Tusi Paia Sa ou manatunatu soo pe aisea. I lenei taimi ogaoga le faigata i le talafaasolopito o le Ekalesia, aisea sa ia galue ai i le toefaaliliuina o le Kenese? O lena tusi sa matuā lava lona lauiloa. Ae o lena galuega faaliliu na iu lava ina avea ma tusi a Mose i le Penina Tau Tele, faatasi ai ma faamatalaga taua o aoaoga faavae e ogaoga le taua i le Ekalesia i aso nei.
O nei mataupu na faaalia mai ai aafiaga o Mose ma Enoka, ia e i ai ni tulaga e matuā ofoofogia le tai tutusa lava ma aafiaga a Iosefa lava ia. Sa valaauina e le Alii ia perofeta taitasi e faia se galuega tele. Sa faaali atu e le Alii ia i latou taitoatasi Ana foafoaga ina ia mafai ona latou vaai atili ai i la latou vaega i le fuafuaga (tagai i le Mataupu Faavae ma Feagaiga 76; Mose 1; 7). O se aotelega o la latou galuega autu e mafai ona faapea: Faapotopoto mai Isaraelu e pei o se malo faalefaitaulaga, fausia Siona, ma saunia e faafeiloai atu ia Iesu Keriso.
Ae e faapefea ona faataunuuina se mea faapea? Ua tuuina mai e Enoka se tali manino: “Ma sa ta’ua e le Alii Lona nuu o Siona, ona sa tasi o latou loto ma tasi le mafaufau, ma sa mau i le amiotonu; ma sa leai se mativa i totonu o i latou” (Mose 7:18; faaopoopo le faamamafa).
O se vaega tutotonu o le misiona i aso e gata ai a le Ekalesia o le tineia lea o le mativa o loo i ai i o tatou nuu ma i o tatou loto; faatu se Siona soofaatasi; ma saunia tagata mo le toe afio mai o Iesu Keriso, le Alo o le Atua.
Fesoasoaniga i le Ala a le Alii
O le faitau tiriliona o tālā na faaaluina e malo ma faalapotopotoga i le seneturi na mavae atu e tineia ai le mativa. Ae peitai mo galuega uma sa faia i ni faamoemoega lelei, e tele nauā lava sa lē faamanuiaina ma ma’umau. Aisea? Aua na faafuaseia ona faatupuina ai le faalagolago nai lo le tomai.
O le ala a le Alii o le fausia lea o tagata e foai ma tagata e talia, ina ia mafai ai e tagata ona avea ma sui mo i latou lava, ma ia faaeaina ai e matitiva ma ia “ia faamaulaloina e mauoa” (Mataupu Faavae ma Feagaiga 104:16). O nisi taimi tatou te ta’ua ai lenei mea o le faalagolago o le tagata ia te ia lava, ae o lona uiga moni lava o le tatalaina lea o mana paia i totonu o tagata taitoatasi uma e faafoia ai ona ia lava faafitauli faatasi ma le fesoasoani a le Atua, ma mafai ai e i latou ona liliu e auauna atu i isi.
Faataitaiga Tuai ma Fou
Sa faia fiafia lava e Iosefa Samita le auauna atu i isi i le ala a le Alii. Ina ua maea ona saili galuega James Leach ma lona uso faaletulafono i Navu mo le tele o aso e aunoa ma le faamanuiaina, sa la naunau lava e talosaga i le Perofeta mo se fesoasoani. Sa faamatala e James:
“Na ou faapea atu, ‘Lau Susuga Samita, pe a mafai faamolemole, o i ai ni au galuega e mafai ona ma faia, ina ia mafai ai ona maua ni mea e tausi [ai lo matou aiga]?’ Na vaai mai ia i maua ma foliga fiafia, faatasi ai ma se lagona o le agalelei, na faapea mai, ‘Ia, alii, o a mea e mafai ona oulua faia? … E mafai ona oulua eliina se alavai?’ Na ou tali atu o le a ma faia le mea e sili ona ma mafai.
“… Ina ua uma na ou alu ma tau atu ia te ia ua maea. Na oo mai o ia ma tagai i ai ma faapea mai, ‘… A na faapea na ou faia lava e a’u semanu e lē mafai ona sili atu. O mai loa tatou o.” Na ia taitai atu le ala i le faleoloa, ma fai mai ia i maua e piki le fasi puaa e sili ona lelei mo i maua. I lo’u matamuli, na ou fai atu ai e sili pe a tuu mai e ia se mea mo i maua. Na ia pikiina fasi puaa silisili ona lapopoa ma lelei se lua ma taga falaoamata mo i maua taitotasi, ma sa fesli mai po ua lava lena. Na ma fai atu ma te naunau e faia nisi galuega mo ia mea, ae na ia fai mai, ‘Afai ua oulua malilie, alii, ua ou [malie foi].’
“Na ma matua faafetai atu ia te ia, ma sa ma o loa i le fale ma le olioli i le loto-agalelei o le Perofeta a lo tatou Atua.”2
O se faataitaiga faaonapo nei o le faapaleniina o le agalelei ma le ola faalagolago o le tagata ia te ia lava na tupu i le 2013 ina ua agi atu Afā Haiyan i Filipaina tutotonu, ma faaleagaina pe faatamaia ai le ova atu i le miliona o fale o aiga. Nai lo le na o le tuuina atu o fesoasoani e aunoa ma se faatulagana, lea e ono i’u i le ola faalagolago ma le faama’umau, sa faaaoga ai e le Ekalesia mataupu faavae o le ola tutoatasi e fesoasoani ai i tagata na aafia e atinae tomai sa manaomia e toefausia ai. Sa faatauina mai mea e faaaoga i le fausia o fale, ma sainia konekarate ma faufautua faufale. O tagata sa manaomia fale sa tuuina atu i ai mea faigaluega, totoga o fale, ma aoaoga faamasani, a o faia lava e i latou galuega o le fausiaina o o latou fale. Sa latou fesoasoani i o latou tuaoi ina ia latou faia foi lena mea.
I le faaiuga, sa maua e tagata auai taitoatasi se tusipasi o matataeseese e molimauina o latou tomai fou na aoaoina ma faaagavaaina ai i latou mo avanoa autu faigaluega. O lenei tuufaatasiga o fesoasoani e o lua ma le aoaoga i le galuega sa le gata sa fausiaina ai fale—sa fausia ai tomai. Sa sili atu mea na faia ai nai lo na o le toe maua o se fale—na toefuatai mai ai le talitonuga o tagata ia i latou lava.3
E Taua Saofaga Laiti
E lē manaomia ona tatou mauoa ina ia fesoasoani atu. Sa tusia e se alii talavou lona aafiaga ma Iosefa Samita: “Na ou i ai i le fale o Iosefa … Ae o nisi alii na nonofo i luga o le pa. Na sau i fafo Iosefa ma talanoa mai ia i matou uma. E lei umi lava ae sau loa se alii ia te ia ma faapea mai o se uso mativa lea na nofo tau mamao mai le taulaga na mu uma lona fale i le po ua tuanai atu. Toeitiiti lava o tamaloloa uma na fai mai na latou lagona le alolofa i lea alii. Na tuu le lima o Iosefa i lana taga, ma aumai i fafo le lima tala ma faapea mai, ‘Ou te alofa i lenei uso i le aofaiga e lima tala; o le a le tele o lo outou alofa [mo ia]?’”4
Talu ai nei sa ou feiloai ai i se tamaitiiti e 10 tausaga mai se nuu maotua lea sa faaaluina lana fasitupe laititi e faatau ai se pepa ua totogi faameaalofa o le a maua ai se tui puipuia mo se tamaitiiti. Na faitau le tamaitiiti e uiga i tamaiti o e sa pe itutino i le faama’i pipili, ma sa le manao o ia e mafatia nisi tagata i lenei lava faama’i. Sa ou maofa i le tele o lana suesuega sa fai ma lona magafagafa i lana saofaga laitiiti.
E manino lava o loo tofu i tatou ma se mea e tuuina atu, ma o le taua moni lava o la tatou saofaga e le mafai ona fuatia i le na o lona malosiaga tautupe.
O le Mana o le Tuufaatasia o Loto
Afai tatou te faamaoni i a tatou feagaiga, o le a tatou taumafai taitoatasi ina ia tasi le loto ma tasi le mafaufau, ia ola i le amiotonu, ma ia leai se mativa ia i tatou. O lenei mea o le a lalaga faatasi ai o tatou loto ma fesoasoani ai e tuuitiitia le faimea faapito i le lalolagi. Ae o loo i ai se mana e sili atu pe a tuufaatasi e tagata o le feagaiga la latou taumafaiga: o aiga, korama, Aualofa, vasega a Tamaitai Talavou, ma siteki e mafai ona faatulagaina e talanoaina ni manaoga faapitoa i o latou nuu, i se aafiaga maoae.
O le faalapotopotoga o fesoasoaniga alofa a le Ekalesia, o le Auaunaga Alofa a le Au Paia o Aso e Gata ai, ua tuufaatasia ai le tele o taumafaiga laiti e fesoasoani ai i tagata i faalavelave faafuasei i le lalolagi atoa.5 E foai atu ma le limafoai e tagata o le Ekalesia ia taimi, tupe, ma tomai. O le tele o nei foai e tauagafau: o ni foai tupe laiti po o ni nai itula o le volenitia. O lenei mea ua avea ma se faatusatusaga faaonaponei i tupe iti a le fafine ua oti lana tane (tagai i le Mareko 12:41–44); o nei sao laiti ua faaali atu ai i le lalolagi mea e mafai e tina ua oti a latou tane ma faifaatoaga ma tamaiti e tai 10 tausaga ona faia pe a latou tuufaatasi a latou punaoa ona ole atu lea i le Alii e faaopoopo i ai Lana faatelega (tagai i le 1 Korinito 3:6).
Ua mamao le mea ua tatou oo mai i ai talu mai uluai aso o le Ekalesia i le fausiaina o tulaga mo Siona, ae peitai o loo tele lava mea e tatau ona fai. Ia faamanuia le Atua ia i tatou taitoatasi e saili atu ia i latou o loo manaomia le fesoasoani ma faia le mea tatou te mafaia e faamāmā ai a latou avega ma faamalosia ai lo latou gafatia. Ma ia faamanuia foi o Ia i Lana Ekalesia e faamaopoopo ma faalautele taumafaiga taitasi a ona tagata, ma ia faataunuuina le poloaiga faaperofeta e fausia Siona—ia tasi le loto ma tasi le mafaufau, nonofo i le amiotonu, ma taumafai ia leai se mativa i totonu o i tatou—seia toe afio mai le Faaola.