O Lo’u Motu o le Faatuatua
Ata na tusia e Allen Garns
A o ou tamaitiiti i le Motu o Robinson Crusoe, e 416 maila (670 km) e tu ai mai le talafatai o Chile, na aoaoina matou ma o’u uso ma tuafafine e o’u matua e uiga i le faatuatua ma le tutumau.
O se tasi o a laua lesona e le galo na tupu i se timuga tetele i se tasi aso Sa. Sa iloa e o’u matua sa i ai sa la tautinoga e tausi ma le Alii—sa tatau lava ona la o i le lotu. Sa malepelepe o matou faamalu, o lea sa na o ni matou peleue ma seevae e malutia ai i matou mai le matagi. Na maua e lo’u tina le manatu e ufiufi i matou i taga lapisi palasitika. Matou te le i maasiasi i le avea ai ma na o tagata na savavali atu i le auala i le timu. Sa matou iloa sa matou faia le mea e finagalo le Alii matou te faia.
Ina ua matou taunuu i le fale lea sa matou faaaogaina mo se falesa, na matou iloa ai e na o i matou lava na auai i lena aso. Na faapena le tele o Aso Sa. Sa avea lo’u tamā ma peresitene o le paranesi ma sa masani ona ia taitaia sauniga e na o tamaiti ma ni nai uso toalaiti o le Aualofa e auai. Na te faamanuiaina foi ma tufaina le faamanatuga.
Ua ou misia na aso na matou auai atu ai o se aiga i le lotu. O le usuina faatasi o viiga ma le aoaoina e uiga i lo tatou Tama o i le Lagi ma Lona Alo, o Iesu Keriso, e avea pea ma se manatuaga faapelepele. O loo i ai pea lo’u loto i le Motu o Robinson Crusoe. O o’u manatuaga uma i le olaga faateineitiiti, e aofia ai aoaoga o le talalelei na ou maua mai o’u matua, na tupu iina.
I le toaitiiti ai o nai tagata o le Ekalesia i le motu, sa lei i ai ni a matou polokalama po o punaoa ia o loo fiafia ai le toatele o le au paia. Ae na aoaoina i matou e o’u matua ia auai i le lotu, tatalo, ma faitau tusitusiga paia. Sa ou maua le malosi ma le taitaiga a o ou faitau i tusitusiga paia ma ni taimi o faaaliga faaletagata lava ia. Ou te manatua se tasi aso Sa faapitoa ina ua ou maua le faamautinoaga e auauna atu i se misiona.
Ina ua avea a’u ma se teine aoga i le kolisi i Vina Del Mar, Chile, sa ou manatuaina o’u matua o matou savavali mai i le lotu i le la, timu, uatoa, ma le matagi. I aso Sa taitasi, sa uunaia a’u e lenei manatuaga ou te alu ese mai lo’u moega, sauni, ma alu i le lotu—e tusa lava po o le a se mea o tupu mai i fafo.
O le talalelei a Iesu Keriso ua avea pea ma totonugalemu o lo’u olaga a o ou teineitiiti, faifeautalai, ma i le taimi lenei o se āvā ma se tinā. O lea la ua i ai lo’u lava aiga, ma o le a ma tuufaasolo atu ma lo’u toalua i le ma fanau le faataitaiga faamaoni a o’u matua.