”Lē Saofagā Le Moni”
Ata na tusia e Cheryl Chalmers
Ua ofoina mai e le Misiona a Nofoaga Faatalafaasolopito a Niu Ioka Penisilevania ni avanoa tulagaese e faasoa atu ai le talalelei a Iesu Keriso. Matou te talai, aoao, ma papatiso e pei ona faia e isi faifeautalai, ae ua ia i matou foi le tofiga matagofie e aoao atu e uiga i mea paia na tutupu i nei nofoaga.
Matou te auauna atu i le faatoaga a le aiga o Samita, le nofoaga o le lomiga o le Tusi a Mamona, o le Nofoaga Autu mo Tagata Asiasi i le Mauga o Kumora, ma le faatoaga a Peteru ma Maria Uitimera. Matou te ave faataamilo malo i nei nofoaga paia ma fesoasoani ia i latou ia masani atili i le talafaasolopito ma mea na tutupu o loo siomia ai le Toefuataiga.
I se tasi aso na ma tuuina atu ai ma la’u soa se malaga maimoa i le faatoaga a le aiga o Samita i se aiga talavou mai Aialani. O i laua o ni tagata fou liliu mai na o le lua tausaga.
A o matou tutu i le fale ogalaau na toefauina lea sa nonofo ai Iosefa Samita ma lona aiga i le tautotogo o le 1820, sa ma faamatalaina ai ma la’u soa mea taua na tutupu i le olaga faatamaitiiti o Iosefa lea na taitai atu ai o ia e ulu atu i se togavao e tatalo ai ia iloa po o fea le ekalesia e tatau ona ia auai. Sa ma faasoa atu ia i latou le aafiaga o Iosefa ina ua faaali mai le Tamā Faalelagi ma Iesu Keriso ia te ia ma tali mai i lana tatalo. Ona ma fesili atu lea ia i latou pe o a ni o latou lagona ina ua latou faatoa iloa e uiga ia Iosefa Samita ma lana uluai faaaliga.
Sa ou faamoemoe o le a latou faamatala mai lagona e pei ona faasoa mai e le toatele o tagata—sa latou lagonaina se mu i o latou loto, pe na latou iloa e tatau ona moni ona o le agaga sa latou lagonaina e matuai mamana lava. Nai lo lena, na latou fai mai na latou manatu sa “lē saofagā le moni.” O lena tali na taofia i maua mo sina minute. Sa ma fesili atu ia i latou e faamalamalama mai le uiga ia i latou.
Sa latou ta’u mai ia i maua faapea sa lelei mea mo i latou ae latou te lei faalogo i le talalelei, ma o le manatu ia suia o latou olaga mafanafana na foliga mai o se mea na lē saofagā ia i latou. Ae ina ua latou mauaina se molimau faaleagaga e moni, sa latou iloaina e tatau ona latou faia se suiga o le olaga.
Na faagaeetia i maua i la latou molimau mataina ma le faamaoni. Ona sa i ai moni lava sa latou molimau o Iosefa Samita ma le talalelei toefuataiina a Iesu Keriso, sa latou naunau ai e faia ni suiga e lē saofagā i o latou olaga ma auai i le Ekalesia. Sa latou faia ona sa latou iloaina o na suiga o mea sili ia mo lo latou aiga!
Sa matuai ou fiafia lava i la’u misiona. E leai so’u masalosalo o nofoaga sa ou auauna atu ai e paia uma. O mea uma lava matou te fai atu ai na tutupu iinei na tutupu moni lava. O se vavega lava.