Pe Tatau Ea Ona Tatou Taliaina le Valaauga?
Atatusi mai le Getty Images
I le avea ai ma matua o se tamaitiiti laitiiti ma se pepe, sa faafaigata ai ona ma faataunuuina ni valaauga o le Ekalesia. O lea la, ina ua valaauina lo’u toalua e avea ma epikopo o se uarota a talavou nofofua matutua, sa faatumulia uma i maua i le lē mautonu.
Sa faatumulia o ma mafaufau i fesili e faatatau i lo ma gafatia e pulea mea uma faatasi ai ma le tiutetauave faaopoopo. Sa ma iloaina i ni nai aso mulimuliane talu ona maua le valaauga ua ou toe maitaga i le ma tama lona tolu. Ona o lo’u talaaga faalefomai, sa faigata ai lava maitaga na muamua atu. A o ma talanoaina mea o le a ma faamoemoe e tutupu i ni nai masina na sosoo ai pe a talia e lo’u toalua le valaauga, sa ma lē mautinoa le mea e fai. Sa amata ona ma tatalo faatauanau mo le faamafanafanaga ma le taitaiga.
I se tasi taimi, sa mafaufau ai lo’u toalua pe tatau ea ona ia faamatala atu lo ma tulaga i le peresitene o le siteki ma lē taliaina ai le valaauga. O lenei mea sa sili ona foliga sa’o ia i maua, ae a o ma tatalo ma anapogi, sa faamanatu mai ia i maua upu a Peresitene Thomas S. Monson (1927–2018): “Pe a tatou i ai i le feau a le Alii, ua tatou agavaa mo le fesoasoani a le Alii” (“Duty Calls,” Ensign, Me 1996, 44).
Na faamafanafanaina o ma loto ma faamāmāina o ma popolega. Sa ma mauaina le faamautinoaga e lei sau lenei valaauga mai le peresitene o le siteki. Sa maua mai i le Alii, ma sa Ia silafia ae ma te lei iloaina ua ou maitaga ina ua faasafua mai le valaauga. E mafai ona Ia faia mea sili atu mo lo ma aiga nai lo le mea e mafai e lo’u toalua na o ia pe afai na te lē taliaina lenei valaauga.
Faatasi ai ma le faatuatua i o maua loto, sa talia ai e lo’u toalua le valaauga ma sa matou faia i aso taitasi a o matou i ai. O l’ou maitaga lona tolu na faamaonia le avea ma se vavega tele, ma na fanau mai lo ma atalii e soifua maloloina ma malosi. O tausaga na ou faaaluina e auai ai i la matou uarota ma le ma fanau, sa fesoasoani ia i maua e ola vavalalata ai e le gata o se aiga ae faapea foi i tagata o le uarota. A o galue ai ma le filiga lo’u toalua i lona valaauga, sa ou aoao ai e liliu atu i le aiga o la’u uarota mo se fesoasoani i la’u fanau.
Ma te faafetai ma lo’u toalua i le toatele o le Au Paia faatuatua ma, sili ona taua, i lo tatou Tamā Faalelagi mo le fesoasoani ia i maua a o ma taumafai e faapaleni le galuega, aiga, ma le auauna atu i le Ekalesia.