O Ata o le Faatuatua
O Ulisese ma Emilia Maio
Porto, Potukale
O le uso o Emilia Maio, o Custodia, sa fanau mai ma ni tulaga lē atoatoa ogaoga. I le sefululima tausaga ua mavae, na sau ai Custodia e nonofo ma Emilia ma lona toalua, o Ulisese. I le avea ai o se aiga, ua latou aoaoina o le auaunaga lē manatu faapito faaleaiga o se punavai sili lea o le olioli.
Leslie Nilsson, Tagata Pueata
Emilia:
Ina ua fanau mai lo’u uso o Custodia, sa mafai ona ou iloa vave lava o ia na auina mai le lagi. Na ou vaai i ai i ona mata. Sa ma vavalalata ma Custodia ao ma tuputupu ae. Ona o ona tapulaa, sa masani ona ou tauaveina ai o ia aua sa le mafai ona savali o ia. O nisi taimi e i ai ni osofaiga maimaliu i le aso, ma sa faigata ona tausia o ia i nisi o taimi, ae sa ou latalata lava i taimi uma e fesoasoani ai i lo’u tina. Ina ua ma’i lo’u tina, sa ou tausi mo i la’ua uma.
I le taimi lena, sa faasolo ina matua lo’u tina ma sa faigata ona tausi ia Custodia. Sa tonu ia te ia e alu i se nofoaga autu o le tausiga. Na alu Custodia i se fale e tausi ai tagata e i ai manaoga faapitoa. O le taimi lena na amata ai ona matou pikiina o ia ma matou nonofo faatasi i faaiuga o vaiaso uma lava. Sa matou faia faapea tusa pe fa tausaga.
A o lei maliu lo’u tina, na ma asiasi atu ma lo’u toalua ia te ia. Sa ia uuina o matou lima ma ta’u mai ia i matou sa ia faatuatuaina i matou e tausia Custodia. Sa matou fai atu i ai o le a matou faia. Mo le 15 tausaga ua mavae, sa ma nonofo faatasi ai ma lo’u uso ma tausia o ia.
E moni lava sa faigata i le amataga. Sa manaomia ona ou tuua la’u galuega ina ia tausia lo’u uso. Ae ua avea o se faamanuiaga. Ina ua faatoa ma faaipoipo ma Ulisese, na ma iloaina ai e le mafai ona maua se ma fanau. O Custodia e pei lava o se tamaitiiti na auina mai e le Atua mo i ma’ua e tausia. I le tele o auala, e fesoasoani ai o ia i le faatumuina o le gaogao ua ma lagonaina i le leai o ni fanau. E alofa ma agalelei o ia. E fiafia o ia e ata ma e fiafia e alu i le lotu. O ia o se oliolisaga.
Ulisese
Ina ua valaauina a’u e avea ma se epikopo, sa tatau ona ou mafaufau pe mafai ona ou faataunuuina o’u tiute i le fale ma lo’u valaauga. Na ma talanoa ma Emilia e uiga i ai ma na ma iloa e mafai ona ma faia faatasi lenei mea pe a tuu atu lo ma faatuatuaga i le Atua.
O le auauna atu i lo’u aiga e i ai lava i taimi uma le siitiaina o a’u faaleagaga. E ui lava e le o lava lo ma taimi na o ma’ua o se ulugalii, ma te felata’i lava le tasi i le isi faaleagaga. Ma te felata’i o se aiga O le taimi atoa na ma vaaia ai le aao o le Alii o fesoasoani mai ia i ma’ua. Na Ia faaalia mai ia i ma’ua le tele o vavega. Ua matuā faamanuiaina lava i ma’ua.
E fiafia le aiga o Maio e o i se faleaiga i le lotoifale, lea latou te feasiasia’i ai ma a la’ua uo ma tuaoi.
Sa tu se uo a le aiga o Maio e faatalofa ia Custodia. Ua fai mai Emilia e tosina atu tagata ia Custodia aua “o ia e alofa ma agalelei. O ia o se oliolisaga.